Chronological

T‑xiˈlen tchunkˈlal Jesús tzˈiˈben tuˈn San Mateo

Ke tcyman Jesucristo ootxa

1  Ejeeˈ tzunj lu tzˈiˈben cybi tiyˈjil Jesucristo. Ja Jesucristo t‑xeˈchel David, bix jatzen David t‑xeˈchel Abraham.

² Yaltzen te Abraham, tman Isaac. Jatzen te Isaac, tman Jacob. Bixsen te Jacob, cyman Judá cyuyax ke ttzicy bix ke titzˈen. ³ Bixsen te Judá, cyman Fares tuyax Zara, tal Tamar kej lu. Bix te Fares, tman Esrom. Bix te Esrom, tman Aram. ⁴ Bix te Aram, tman Aminadab. Bix te Aminidab, tman Naasón. Bix te Naasón, tman Salmón. ⁵ Bix te Salmón, tman Booz, tal Rahab. Bix te Booz, tman Obed, tal Rut. Bix te Obed, tman Isaí. ⁶ Bix te Isaí, tman jrey David. Bix te David, tman Salomón, tal jxuj xuuj t‑xuˈl jxin Urías.

⁷ Yaltzen te Salomón, tman Roboam. Bix te Roboam, tman Abías. Bix te Abías, tman Asa. ⁸ Bix te Asa, tman Josafat. Bix te Josafat, tman Joram. Bix te Joram, tman Uzías. ⁹ Bix te Uzías, tman Jotam. Bix te Jotam, tman Acaz. Bix te Acaz, tman Ezequías. ¹⁰ Bix te Ezequías, tman Manasés. Bix te Manasés, tman Amón. Bix te Amón, tman Josías. ¹¹ Bix te Josías, tman Jeconías cyuyax ke ttzicy bix ke titzˈen. Eteˈ ke Jeconías tej cyxiˈ kˈiˈn xjal aj Israel tuj Babilonia.

¹² Yaltzen te Jeconías, tman Salatiel. Otk chi pon kˈiˈn aj Israel tuj Babilonia tej titzˈj Salatiel. Bix te Salatiel, tman Zorobabel. ¹³ Bix te Zorobabel, tman Abiud. Bix te Abiud, tman Eliaquim. Bix te Eliaquim, tman Azor. ¹⁴ Bix te Azor, tman Zadoc. Bix te Zadoc, tman Aquim. Bix te Aquim, tman Eliud. ¹⁵ Bix te Eliud, tman Eleazar. Bix te Eleazar, tman Matán. Bix te Matán, tman Jacob. ¹⁶ Bix te Jacob, tman José, tchmil María. Bix ja te María, ttxu Jesús, jaj Cristo tbi, jaj xjal scyˈoˈn tuˈn Dios te cawel tibaj cykilca.

¹⁷ Juˈ tzunj, at cyajlaaj cloj cyiyˈjil xjal e tzaj xeˈt tiˈj Abraham ul tiˈj David. Bix at cyajlaaj cloj cyiyˈjil xjal e tzaj xeˈt tiˈj David ul tej kˈij tej cyxiˈ kˈiˈn aj Israel tuj Babilonia. Bix at cyajlaaj cloj cyiyˈjil xjal e tzaj xeˈt tej kˈij tej cytzyet cyuˈn aj Babilonia ul baj tej titzˈj Cristo. Juˈtzen tten oc Jesucristo t‑xeˈchel jrey David.

Tej tul itzˈj Jesucristo

¹⁸ Bix ja te Jesucristo, Tcwal Dios. Tej tul itzˈj, juˈ e baj cyjulu. Ttxu Jesús, jaj txin María, otk yolen tuyaj xin José tuˈn tmajetxin tuyaxin. Pero te mitknaˈx majetxin tuyaxin, bix te mitknaˈx toc ipan José tiˈjtxin, ya atl taltxin tuj tcˈuˈjtxin. Preñadatltxin tuˈn Espíritu Santo. ¹⁹ Yaltzen te José, jxin xjal tuˈn tmaje tuya María, jun xjal e tnima tley Dios. Juˈ tzunj, tej tel tniyˈxin tiˈj otk tzˈoc María preñada, e tajbexin tuˈn tcyaj ttzokpiˈnxin María, pero yaaˈn cywitz nejenel tuj tja Dios, cuma tcyˈixin tuˈn tcub tchˈixew María. ²⁰ Tajxin tuˈn el tpaaˈn tiibxin tiˈjtxin, pero ul jlet jun tsanjel Dios tuj cyaˈj tuj twitziyˈxin, bix e tkba texin:

―José, tiyˈjil David, miˈn tzaj ttz̈i tiˈja tuˈn tmajey tuya María, cuma tuˈn tipemal Espíritu Santo ma tzˈoc jlet taltxin. ²¹ Bix qˈuitzˈjel jun taltxin, bix cˈoquel tkˈoˈna tbi te Jesús, jatzen japeninaj “Clol xjal.” Jatzen tbi cˈoquel tkˈoˈna, cuma chi cletel xjal tuˈn tuj cyil―tz̈i ángel te José.

²² Cykilcatzen jlu e baj tuˈntzen tjapan baj tyol Dios e cyaj tkbaˈn cye xjal tuˈn jun tyolel. E tkba tyolel Dios cyjulu:

²³ ―Cycyeˈyenc, cˈoquel preñada jun txin mitknaˈx toc ipan jun xinak tiˈj, bix qˈuitzˈjel jun taltxin, bix cˈoquel kˈoˈn tbi te Emanuel, jatzen japeninaj “At Dios kuya”―tz̈i Dios te jun tyolel.

²⁴ Bix el twatl José. Bix e tcuya tuyaj yol e tkba tsanjel Dios texin tuj twitziyˈxin, bix e majexin tuya María. ²⁵ Pero min oc ipanxin tiˈjtxin tejxe tul itzˈj taltxin. Bix oc tkˈoˈnxin tbikˈa te Jesús.

Tej titzˈj Jesús

2  Tejtzen mitknaˈx titzˈj Jesús, ja tzunj xin cawel tibaj cykil twitz txˈotxˈ, Augusto tbixin, e tkbaxin tuˈn tjaw jun tumel te tajlal jteˈ xjal at twitz txˈotxˈ. ² Ja jun tneel censo e bint juˈwa, bix tej tjaw censo, tocx jxin Cirenio cawel tuj Siria. ³ Iltzen tiˈj e pjaˈj ke xjal tuj cytanem ke cyiyˈjil te ootxa, tuˈntzen cykˈonte cyumel te jaaˈke.

⁴ Bix najltzen José tuj tnom te Nazaret tuj departamento te Galilea. Pero tiyˈjil Davidxin, bix jatztzen ttanem David Belén tuj departamento te Judea. Juˈ tzunj il tiˈj e xiˈ José tuj Belén, ⁵ te tzˈibl tiibxin. Bix kˈiˈn María tuˈnxin, cuma t‑xuˈtlxin. Bix chˈitk talentxin.

⁶ Tejtzen cypon José tuya María tuj Belén, bix e pon tumel tuˈn ttzaj itzˈj taltxin. ⁷ Bix itzˈj taltxin. Tneel taltxin, bix xinak. Itzˈj taltxin tuj cyja alimaj, cuma mintiiˈ cyposada e cnet tuj tnom. Bix e jaw tboˈtzˈentxin neeˈ tuj buˈs̈, bix e cuˈx tcotzˈbaˈntxin neeˈ tuj tcublel cywa alimaj.

Ke tsanjel Dios bix ke cylel

⁸ Ttxaˈnxitzen tnom te Belén attzen cab cylel najlke cyiˈ cycarnel. Nchi cˈojlan cycarnel te koniyan. ⁹ Tisen tiiˈ tej tpon jlet jun tsanjel Dios tuj cyaˈj cywitz, bix tspiˈyemal Dios e cub txakpaj cyibaj, bix e jaw seyˈpajke. ¹⁰ Bix e tkba ángel cye cylel:

―Miˈn tzaj ttz̈i cyiˈja, cuma kˈiˈn jun tpocbalel jun tzalajebl wuˈna te cykil xjal. ¹¹ Tuj ja koniyan lu, bix tuj ja tnom lu, ttanem jxin cyiyˈjila David, ma tzˈitzˈj Clol cyey, jxin scyˈoˈn tuˈn Dios te cawel. ¹² Ka cxeˈl cycyeˈxa neeˈ, ojtzen tcnet jun neeˈ cyuˈna boˈtzˈen tuj buˈs̈ bix tcuˈx tuj tcublel cywa alimaj, qˈueleltzen cyniˈya tiˈj ja tzunja―tz̈i ángel cye cylel.

¹³ Tej tbaj tkbaˈn ángel kej yol lu, nukxix tisen tiiˈ tjaw jlet mas nim cybaj ángel te tuj cyaˈj ttxlaj ángel e pon nejl. Nimxsen e jaw cynimsaˈn tbi Dios, bix e xiˈ cykbaˈn:

¹⁴ ―¡Jawnex tbi Dios tuj cyaˈj! Ma tzaj tkˈoˈn jun xtalbil twitz txˈotxˈ tuˈn cyten xjal tuj ttz̈yal tuya Dios―tz̈i ke ángel.

¹⁵ Tej cyaaj meltzˈaj ke tsanjel Dios tuj cyaˈj, bix akˈ ke cylel yolel cyxolx:

―Koˈne cyeyˈlte jneeˈ ma tzˈitzˈj tuj Belén, jatzen neeˈja ma kˈumj tuˈn Dios―tz̈i ke cylel.

¹⁶ Bix e xiˈkexin tuj ajkelbil te cyeyˈlte, bix e cnet María tuya José cyuˈnxin tuyax niˈ ẍlak. Xukaqˈuex tuj tcublel cywa alimaj. ¹⁷ Tejtzen cylontexin neeˈ tuj tcublel cywa alimaj, bix akˈkexin kbalte cye xjal ti otk tkba ángel cyexin tiˈ neeˈ. ¹⁸ E jaw kleeˈ kej xjal e cybi cyyol kej cylel. ¹⁹ Yaltzen te María, minteyˈ akˈtxin, sino nuk e jaw bisentxin tiˈj cykilca otk baj.

²⁰ Bix aj meltzˈaj ke cylel jaaˈ eteˈ cycarnelxin, bix e jaw cynimsaˈnxin tbi Dios. E xiˈ cykˈoˈnxin chjonte te Dios tiˈj cykilca otk cybixin bix otk cyilxin, bix jax eˈla tuj cywitzxin tiˈj e tkba ángel.

Tej tpon kˈiˈn Jesús tuj tja Dios

²¹ Tetzen twajxakan kˈij titzˈjlen tal María, jatzen tumelj tuˈn toc techel tiˈ ttzˈalbil taltxin judíotzen neeˈ. Te xsunj kˈij lu tej toc tbi te Jesús, jaxj tbi e tkba ángel Gabriel te María tej mitknaˈx toc jlet taltxin.

²² Mas yaj, e xiˈ José tuya María tuj Jerusalén, cuma tzin tkbaˈn tley Moisés, oj talen jun xuuj, il tiˈj tuˈn t‑xiˈ oyet jun alimaj, tuˈntzen tcyaj sak xuuj twitz Dios. Juˈ tzunj, tej tpon tumel, e xiˈkexin tuj tja Dios tuj Jerusalén. Bix tex kˈij tej t‑xiˈ oyet jneeˈ Jesús tuj tkˈab Dios. ²³ E binttzen cyuˈn juˈwa tuˈntzen cynimante tley Dios. Tzin tkbaˈn cyjulu: “Jaca juun tneel xinak qˈuitzˈjel t‑xol tal jun xuuj, ckˈojel tuj tkˈab Dios,” tz̈i tley Dios. ²⁴ Bix tuˈn cycuyante tuˈnj tley Dios tiˈj txˈajbilte xuuj, e xiˈ cyoyen María tuya José alimaj te Dios, cuma tzin tkbaˈn tley Dios: “Tuya jun moj cucuˈ bix ka jun moj palomas il tiˈj cxeˈl oyet,” tz̈i tley Dios.

²⁵ Attzen junxin xjal tuj tnom te Jerusalén Simeón tbixin. Jatzen jun xinj kˈiˈnxix tyol Dios tuˈnxin. El tniyˈ Simeón tiˈj tuˈn ttzaj tkˈoˈn Dios jun jawnex Cawel cye Israel laˈ alcye jun kˈij te clolcye, bix nayon tzunxin tiˈj. Tuˈn Espíritu Santo eˈla tniyˈxin. ²⁶ E tkba Espíritu Santo texin tuˈn miˈn cyimxin hasta ojxe toc tcyeˈyenxin jxjal ayonke Israel tiˈj. ²⁷ Tpontzen tumel, e xiˈ kˈiˈnxin tuˈn Espíritu Santo tuj tja Dios. Te tzunj kˈij tej tpon cyiiˈn tman Jesús ja Jesús tuj tja Dios tuˈn tyecˈj te Dios, tisen tzin tkbaˈn ley. ²⁸ Tej toc tcyeˈyen Simeón neeˈ, bix e xiˈxin chleljawte, bix e jaw tnimsaˈnxin tbi Dios tiˈj, bix e xiˈ tkbaˈnxin:

²⁹ ―Taat, baˈntzen tuˈn ncyima tuj ttz̈yal, inayenja ma chin ajbena tey, cuma ma japan baja tiˈ tyola. ³⁰ Ma tzaj tkˈoˈna tuˈn toc ncyeˈyena Jclol keya ma tzul. ³¹ O tsicyˈa ja tuˈn toc Clol cye cykilca xjal twitz txˈotxˈ. ³² Cˈajbel tisen jun spiˈyen cyxol xjal yaaˈn judío, tuˈntzen tel cyniyˈ tiˈj. Bix cˈoquel te jun xjal mas jawnex cyxol t‑xjala, kej Israel―tz̈i Simeón te Dios.

³³ Tejtzen cybinte José tuya ttxu Jesús tyol Simeón tiˈ cycwal, e jaw kleeˈke. ³⁴ Bix e xiˈ tkanen Simeón te Dios tuˈn ttzaj tkˈoˈn Dios xtalbil te cye, bix e xiˈ tkbaˈnxin te María, ttxu neeˈ:

―Ebiˈnc nyola. Ja tala lu cˈoquel te kbalte tiˈj ti pjel te jaca juun aj Israel, ka tuˈn t‑xiˈ tuj castiwa, bix ka tuˈn tel baˈn. Nim cbinel tuˈn, tuˈntzen tel cyniyˈ xjal tiˈj ja Clol cye, pero nim xjal qˈuelel iiqˈuente. ³⁵ Tuˈnj qˈuelel cyiiqˈuen, cchicˈajaxeltzen kaˈxsen cynaabl. Pero kej n‑oc ke cycˈuˈj tiˈjxin, oj tbint cyuˈn juˈwa, cchicˈajaxeltzen baˈn cynaabl. Yal tey, cˈoquex tuj tanema jun nintzaj bisbajil tiˈj tala, tisencˈa cˈoquex twiˈ spada tuj tanema―tz̈i Simeón te María.

³⁶ At junxuj xuuj at tuj tja Dios, Ana tbixuj. Tmeel Fanuelxuj bix tiyˈjil Aserxuj. Kbal tyol Diosxuj. Niˈ tijtl xsunxuj. E majexuj wuuk tyem, ³⁷ bix e tentlxuj viuda ochenticuatro jnabkˈi. Jaca kˈij ocxxuj tuj tja Dios. Cykil kˈij bix cykil akˈbil e naˈnxuj Dios, bix nim maj e cub tpaˈnxuj weyaj tuˈn tnimanxuj Dios. ³⁸ Texsen hora nyolen Simeón tej tpon Ana jaaˈ tocxe María tuya José, bix akˈxuj kˈolx chjonte te Dios tiˈj ti otk bint tuˈn Dios. Bix e xiˈ tkbaˈnxuj cye aj Jerusalén, kej otk tzˈoc ke cycˈuˈj tiˈ tulel Clol cye:

―Ja tzunj ẍlak lu Clol ke―tz̈ixuj.