Salmo 95

Ang Salita ng Dios (Tagalog Contemporary Bible)

95 Halikayo, magsiawit tayo nang may kagalakan!
    Sumigaw tayo sa pagpupuri sa Panginoon na ating Bato na kanlungan at tagapagligtas.
² Lumapit tayo sa kanya nang may pasasalamat,
    at masaya nating isigaw ang mga awit ng papuri sa kanya.
³ Dahil ang Panginoon ay dakilang Dios.
    Makapangyarihang hari sa lahat ng mga dios.
⁴ Siya ang may-ari ng kailaliman ng lupa at tuktok ng mga bundok.
⁵ Sa kanya rin ang dagat pati ang lupain na kanyang ginawa.
⁶ Halikayo, lumuhod tayo at sumamba sa Panginoon na lumikha sa atin.
⁷ Dahil siya ang ating Dios
    at tayo ang kanyang mga mamamayan na gaya ng mga tupa sa kanyang kawan na kanyang binabantayan at inaalagaan.
    Kapag narinig ninyo ang tinig niya,
⁸ huwag ninyong patigasin ang inyong mga puso,
    katulad ng ginawa noon ng inyong mga ninuno doon sa Meriba at sa ilang ng Masa.
⁹ Sinabi ng Dios, “Sinubok nila ako doon, kahit na nakita nila ang mga ginawa ko.
¹⁰ Sa loob ng 40 taon, lubha akong nagalit sa kanila.
    At sinabi kong silaʼy mga taong naligaw ng landas at hindi sumusunod sa aking mga itinuturo.
¹¹ Kaya sa galit ko, isinumpa kong hindi nila makakamtan ang kapahingahang galing sa akin.”