Zacarias 10

Ang Biblia (1978)

Ang Israel at ang Juda ay pagpapalain ng Panginoon.

10 Hingin ninyo sa Panginoon ang ^(A)ulan sa kapanahunan ng huling ulan, sa Panginoon na nagpapakidlat; at kaniyang bibigyan sila ng ulan, at ang bawa't isa'y ng damo sa parang.

² Sapagka't ang mga teraf ay nagsalita ng walang kabuluhan, at ^(B)ang mga manghuhula ay nangakakita ng isang kabulaanan; at ^(C)sila'y nangagsaysay ng mga kabulaanang panaginip, sila'y nagsisialiw ng walang kabuluhan: kaya't sila'y nagsisiyaon ng kanilang lakad na parang mga tupa, sila'y nadadalamhati, ^(D)sapagka't walang pastor.

³ Ang aking galit ay nagalab laban sa mga pastor, at aking parurusahan ^(E)ang mga lalaking kambing; sapagka't dinalaw ng Panginoon ng mga hukbo ang kaniyang kawan na sangbahayan ni Juda, at kaniyang gagawin silang parang magilas na kabayo sa pagbabaka.

⁴ Sa kaniya lalabas ang ^(F)batong panulok, sa kaniya ang ^(G)pako, sa kaniya ^(H)ang busog na pangbaka, sa kaniya ang bawa't pinuno na magkakasama.

⁵ At sila'y magiging parang mga makapangyarihang lalake, na yayapakan nila ang kanilang mga kaaway sa putik sa mga lansangan sa pagbabaka; at sila'y magsisilaban, sapagka't ang Panginoon ay sumasakanila; at ang mga mangangabayo ay mangatutulig.

⁶ At aking palalakasin ang sangbahayan ni Juda, at aking ililigtas ang sangbahayan ni Jose, at aking ibabalik sila uli; sapagka't ako'y naawa sa kanila; at sila'y magiging parang hindi ko itinakuwil: sapagka't ako ang Panginoon nilang Dios, at aking didinggin sila.

⁷ At ang mga sa Ephraim ay magiging parang makapangyarihang lalake, at ang kanilang puso ay ^(I)mangagagalak na gaya ng sa alak; oo, ito'y makikita ng kanilang mga anak, at mangagagalak: ang kanilang puso ay masasayahan sa Panginoon.

Titipunin ng Panginoon ang kaniyang nangalat na bayan.

⁸ Aking susutsutan ^(J)sila, at sila'y pipisanin; sapagka't aking tinubos sila; at sila'y magsisidami ng gaya ng kanilang dinami.

⁹ At aking pangangalatin ^(K)sila sa gitna ng mga bansa; at aalalahanin nila ako ^(L)sa mga malayong lupain; at sila'y nagsisitahang kasama ng kanilang mga anak, at magsisipagbalik.

¹⁰ Aking dadalhin uli sila mula sa lupain ng Egipto, at pipisanin sila ^(M)mula sa Asiria; at aking dadalhin sila sa lupain ng Galaad at Libano; at ^(N)walang dakong masusumpungan para sa kanila.

¹¹ At siya'y ^(O)magdadaan ng dagat ng kadalamhatian, at hahawiin ang mga alon sa dagat, at ang lahat ng kalaliman sa Nilo ay matutuyo; at ang kapalaluan ng Asiria ay mababagsak, at ang cetro ng Egipto ay ^(P)mawawala.

¹² At aking palalakasin sila sa Panginoon; at ^(Q)sila'y magsisilakad na paitaas at paibaba sa kaniyang pangalan, sabi ng Panginoon.