Titus 2

Ne Bibliaj Tik Nawat

2 Shitanutza tay yawi yek iwan ne yek tamachtilis.

² Ne chuletket ma te kiunikan wey; ma muwikakan yek; ma kipiakan itzuntekun yek; ma nemikan yek tik tayulmatilis, tik tetasujtalis wan tik tanejmachselilis.

³ Ne lamatket kenhaya, ma muwikakan ken yek ipal Teut; ma te tatejtenewakan; ma te ingustoj sujsul ne atata; ma tamachtikan tay yek, ⁴ pal ne sijsiwapipil kipiakan itzuntekun yek pal kiane yawit kitasujtat inshulejyu wan inpilawan; ⁵ ma kipiakan yek intzuntekun tel; ma chijchipawak; ma tekitikan tik ne kal; ma yejyek; ma kitakamatikan inshujshulejyu pal kiane te yawit kukujtaketzat ne ipalabraj ne Teut.

⁶ Ne takapiltzinmet kenhaya shiktajtani ma kipiakan itzuntekun yek. ⁷ Tik muchi, shimuishpanu ken se ejemploj ipal ne yejyek tekit. Shikinmachti ma te kwalukan; ma muwikakan yek; ⁸ ma taketzakan yek pal te aka weli kinhilwia tatka, pal kiane ne ká ipal ne seuk ladoj yawi ishpinawa wan te yawi kipia tatka teyek pal ina tupanpa.

⁹ Ne tekitinimet ma kitakamatikan intekuyu wan ma kichiwakan muchi tay yaja kineki; ma te najnankilikan; ¹⁰ ma te kikwikan tatka ichtaka sute ma kilwitikan muchi yek tayulmatis pal kiane yawit kichiwat ka muchi inat ka wey ne itamachtilis ne tutamakishtiani Teut.

¹¹ Ika muneshtij ishpan muchi ne itetasujtalis ne Teut tamakishtiani ¹² ne techmachtia ma tikajkawakan ne tay teyek wan ne tajtaelewilis ipal ini taltikpak; tik ne taltikpak pal ashan ma tinemikan iwan tutzuntekun yek, ken muneki wan ken nemi yek; ¹³ ma kichiakan ne wey tejchialis wan ne muneshtilis tzitzinaka ipal ne wey Teut wan tutamakishtiani Yeshu Mawaltijtuk ¹⁴ ne mutemakak ka tumaku pal techmakishtia itech muchi tay te yek, wan ma kipupu ipal se techan te ken muchi.

¹⁵ Shitanutza wan shitajtani wan shiteajajwa iwan muchi ne tatuktilis; ma te aka metzilwi tatka.