Tietus 2

Reimer 2001

2 Oba du raed daut waut jesunde Lea es.

² Elre Mana sele nichta senne, eaboa, aunstendich, jesunt em Gloowe, enne Leew, enn Jedult.

³ Soo sele dee elre Fruehes uk sikj eaboa oppfeare auset dee Heilje tookjemt, nich schlajchtet noraede, nich aun fael Wien feskloft, en sele goodet unjarechte,

⁴ soo daut see dee jinjre Fruehes ennleare kjene daut see aeare Mana sele goot senne, Kjinje goot senne,

⁵ eaboa, rein, aeare Husoabeit wiedastale, jescheit senne, aeare eajna Mana unjadon, daut Gott sien Wuat nich jelastat woat.

⁶ Femon dee jinjre Mana uk daut see aunstendich sele senne enn aulem.

⁷ Bewies die aus en Faeabilt enn goode Woakje, onnfedorwe em unjarechte, eaboa,

⁸ jesunde, heelsaume Lea, soo daut dee, dee jaeajenaun sent sikj schaeme motte wiel see nusscht schlajchtet ha no to raede.

⁹ Femon dee Sklowe daut see aeare eajne Meista enn aules unjadon sent, an tom Jefaule laewe, nich jaeajenaun.

¹⁰ See sele nich staele, leewa gooda Gloowe bewiese, soo daut see onns Gott en Heilaunt siene Lea utstraume kjenne enn aule Dinje.

¹¹ Dan Gott siene radende Jnod es aulamaun ferndach jekome,

¹² en deit onns unjarechte daut wie Gottloosichkjeit en weltliche Losst aufsaje sele, en feninftich, jeistlich, en gottesferchtich en dise jaeajenwoatje Tiet laewe sele,

¹³ en luare no dee seelje Hopninj enn onns groota Gott en Heilaunt Jesus Christus sien kome,

¹⁴ dee sikj selfst fa onns han jeef daut hee onns rade mucht fonn aulet Jesatsloosichkjeit, en onns rein moake daut wie sien eajnet Follkj kunne sene, iewrich enn goode Woakje.

¹⁵ Dit suast du raede, en femone, en trajchtwiese met follmacht. Lot die kjeena fe-achte.