Taneshtilis 20

Ne Bibliaj Tik Nawat

20 Wan nikitak se tanawatiani waltemu tik ne ilwikak ne kipiatuya ne tay iwan mutentzakwa ne miktan, wan tik ne imey kipiatuya se wey tepusilpika. ² Wan kitzkij ne kuat majwey, ne kuat ipal ikman, yaja ne Tamintuk wan ne Tenewani, wan kilpij pal mil shiwit, ³ wan kitamutak ijtik ne miktan wan kitentzak wan kitetilij ne tentzakka pal kiane intea yawi kinshijshikua ne tejtechan hasta ma tamikan ne mil shiwit. Tipan nemi pal kiajkawat yawi chiupi tiempoj.

⁴ Wan nikitak kujkuijpal, wan inhijpak mutalijket sejse, wan kinmakaket ma welikan kichiwat juzgar. Nusan nikitak ne inhajalmaj ne mutzunkutuntiwit ka imaku Yeshu wan ipanpa ne ipalabraj ne Teut; yejemet inte mutankwaketzket iishpan ne tekwani nian ne itachialis wan te kikwijket ne kwikwil ijpak ne inkwatapal wan ijpak ne inmey. Wan nemiket yultuk wan tatekimakaket mil shiwit iwan ne Mawaltijtuk. ⁵ Ne uksejse mikini inte muyulkwijket hasta tamit ne mil shiwit.

Ini ne achtu muyulkwepalis. ⁶ Kipiat suertej, wan sujsul yejyek, ne nemit tik ne achtu muyulkwepalis. Inhijpak ne ukse mikilis inte yawi kipia tatuktilis, wan yejemet muchiwasket palejmet ipal ne Teut wan ne Mawaltijtuk, wan iwan yawit tatekimakat ijtik ne mil shiwit.

Kwak panut mil shiwit

⁷ Wan kwak panut ne mil shiwit, yawit kishtiat ne Tenewani tik itetzakwiluyan, ⁸ wan yawi walkisa kinshijshikua ne tejtechan nujme ne taltikpak, Gog wan Magog, pal kinsentepewa pal musumat. Wey mupujket ken ne ashal itan ne weyat. ⁹ Wan muchayawket nujme ne tal wan kiyawalujket ne cuartel ipal ne tayulmatit wan ne techan tasujtatuk. Wan kiski tit tik ne ilwikak wan kintuluj. ¹⁰ Wan ne Tamintuk ne kinshijshikua, kitamutaket tik ne timil ipal azufrej kan ne yawit chichinakat ne tekwani wan ne sankataketza nusan ka tunal wan ka tayua pal senpa wan senpa.

¹¹ Wan nikitak se wey kuijpal istak, wan ne ijpak muetztuk, wan ne tal wan ne ilwikak chulujket wejka ne itachialis, wan te kanaj kan weliskiat nemit.

¹² Wan nikinhitak ne miktiwit, ne wejwey wan ne chijchikitik, ejejkatuk iishpan ne kuijpal, wan mutapujket sejse amat, wan nemanha mutapuj ukse amat, yaja ne amat yultuk, wan ne mikinit muchijket juzgar iwan ne tay nemi ijkwilujtuk tik ne ajamat wan kitaket su kichijtiwit tay yek o inte.

¹³ Wan ne weyat temakak ne miktiwit ijtik yaja, wan ne mikilis wan ne Miktanshaput temakaket ne miktiwit ijtik yejemet, wan kitaket tay ne kichijtuya sejse wan muchijket juzgar muchi ne mikinimet. ¹⁴ Wan kimutilijket ne mikilis wan ne Miktanshaput ne timil. Ini inte ne achtu mikilis, yaja ne seuk. Wan ne timil.

¹⁵ Wan su aka inte muajsik tawawasujtuk tik ne amat yultuk, kitamutaket ijtik ne timil.