Salmo 100

Ang Pulong Sa Dios

100 Kamong mga katawhan sa tibuok kalibotan,
panghugyaw kamo sa kalipay ngadto sa Ginoo.
² Alagari ninyo ang Ginoo uban ang kalipay.
Duol kamo kaniya nga nagahugyaw sa pagmaya.
³ Ilha ninyo nga ang Ginoo, Dios!
Siya ang naghimo kanato ug iya kita.^[a]
Iya kitang katawhan nga giatiman niya sama sa mga karnero.
⁴ Sulod kamo sa iyang templo uban ang pagdayeg ug pagpasalamat.
Dayega ninyo siya ug pasalamati.
⁵ Kay maayo ang Ginoo;
ang iyang gugma walay kataposan,
ug ang iyang pagkamatinumanon nagapadayon hangtod sa kahangtoran.