Roma 2

Ne Bibliaj Tik Nawat

Ne Yudayujmet nusan tateyekchijtiwit

2 Neka taja, takat, su tiktenewaskia seki ipanpa tay kichijtuk, inte tiweli tina tatka, ika kwak tikchiwa juzgar seuk, timuchiwa juzgar taja nusan. Ika kenha tikchiwa tajasan ká titatenewa. ² Tikmatit ka ne Teut kichiwa juzgar muchi ne kichiwat ijkiuni wan ka tejkia. ³ Tay tina, takat? Ka su tikchiwa juzgar ká ne kichiwa ijkiuni melka taja nusan tikchiwa, ne Teut inte yawi metzchiwa juzgar? Tina ka tiaw tichulua?

⁴ Ini tay wey ipatiw: ka yek ne Teut, wan ka yaja kipia tasejselilis wan techchia. Wan yajika taja tikijilwia? Anka te tikmati ka su taja timuyulpata, yaja ika yek ne Teut? ⁵ Iwan ne muyulu takwawak ne inte muyulpata, tikana tinemi kwalan tik ne tunal kwak witz ne kwalan wan ne taneshtilis ipal tay ina ne Teut kwak yawi kichiwa juzgar muchi ken muneki.

⁶ Yaja yawi kikwepilia sejse tay ipal ipatka tay yajasan kichijtuk. ⁷ Ká ne tekitit nejnejmach wan yek, wan kinekit ma inakan ka wey, kinekit kipiat ipatiw, wan te keman kinekit wilewit, yawi kinhajkawa ma yujyultuk senpa. ⁸ Wan ká ne musumat pal kitemuat tay kinekit wan te kitakamatit ne tejkia asunte semaya tay teyek, kiselisket ikwalan.

⁹ Yawit ijiumikit iwan penaj muchi ne takamet wan siwatket ne kichiwat tay teyek. Achtu ne Yudayuj, wan nusan ne Greciajtakat. ¹⁰ Wan yawit inat ka wey wan yawi wey inpatiw wan yawit nejmachnemit muchi ne kichiwat tay yek. Achtu ne Yudayuj, wan nusan ne Greciajtakat. ¹¹ Ika muchi tikenhat ipal ne Teut.

¹² Muchi ká te kishmatit ne tajtuli wan tateyekchijtiwit puliwisket ijkiunisan. Wan muchi ká kishmatit ne tajtuli wan tateyekchijtiwit, iwan ne tajtuli yawit muchiwat juzgar. ¹³ Ika ipal ne Teut inte ne takakit ne tajtuli ká yejyek, sute ne kichiwat tay ina ne tajtuli. ¹⁴ Ika kwak ne tejtechan te kipiat ne tajtuli wan kichiwat tay ina ne tajtuli ijkiunisan, melka te kipiat tajtuli, yejemetsan muchiwat tajtuli. ¹⁵ Yejemet kilwitiat ne itekiw ne tajtuli ijkwilujtuk tik inyujyulu; nusan ne intamatilis ina kenha. Wan tay ne muilwiat tik inyujyulu weli kintenewa pal teyek wan nusan pal yek, ¹⁶ tik ne tunal kwak ne Teut yawi kichiwa juzgar tay ne kipiat ne takamet minashtuk, ken ina ne nuyeknawatilis, itech ne Mawaltijtuk Yeshu.

Ne itajtuli Moshe

¹⁷ Su taja Yudayuj timunutza, wan timusewia tik ne tajtuli, wan timuweymati iwan Teut, ¹⁸ wan tikmati ne taelewilis, wan tay kineki ina, wan timutajtulmachtijtuk, ¹⁹ wan tina ka taja teujilwitiani ipal pupuyumet, se tawil ipal ne kunyuanemit, ²⁰ se tiskaliani ipal melemet, se tamachtiani ipal sulinmet, se kipia ne tetzilnaj ipal ne tamatilis wan ipal ne tejkia ijtik ne tajtuli: ²¹ su tikmachtia ne sekit, ken ka te timumachtia?

Titanajnawatia ma inte titechtekikan, wan taja titechteki; ²² tina ma inte timawiltikan, wan timawiltia; tikijia ne teujteutzitzin, wan titeupantapana; ²³ tikweymati ne tajtuli, wan te tikchiwa tay ina nian tiktakamati ne Teut, ²⁴ ika ken muijkwilujtuk:

²⁵ Yajika tel, metzpalewia ma shimuyawalteki su tikchiwa tay ina ne tajtuli. Su taja se te kichiwa tay ina ne tajtuli, te tatka ipatiw ne mutayawaltekilis. ²⁶ Wan su se kipia itzuntepul tajpia muchi tay ina ne tajtuli ka yek, taika te yawi mupua ne itzuntepul ken tayawaltekilis? ²⁷ Wan su ijkiuni, metztenewa ne kipia itzuntepul wan kichiwa tay ina ne tajtuli taja ká te tikchiwa tay ina melka timuyawaltektuk.

²⁸ Ika te se Yudayuj ká ne muita ken se, nian ne tayawaltekilis tay ne muita tik munakayu, ²⁹ sute ká ne Yudayuj ichtaka, wan ne tayawaltekilis tik muyulu, tesu tik amat: yaja kwak te yawit inat ne takamet ka taja tiyek sute yawi ina ne Teut.