Nnwom 22:1-18

Nkwa Asem

Awerɛhow mu su ne ayeyi dwom

22 Me Nyankopɔn, me Nyankopɔn, adɛn nti na woagyaw me? Masu mmɔborɔsu repɛ mmoa, nanso ennu. ² Mefrɛ wo awia, me Nyankopɔn, nanso wunnye me so. Mefrɛ wo anadwo, nanso minnya home. ³ Nanso wɔasi wo hene sɛ ɔkronkronni a Israel kamfo wo. ⁴ Yɛn nenanom de wɔn ho too wo so; wɔde wɔn ho too wo so, na wugyee wɔn nkwa. ⁵ Wɔfrɛɛ wo, na wɔnam so fii amane mu. Wɔde wɔn ho too wo so, na woanni wɔn huammɔ.

⁶ Mprempren, menyɛ onipa bio. Meyɛ osunson a wommu no na obiara tiatia ne so. ⁷ Obiara a ohu me di me ho fɛw. Wɔtwe wɔn tɛkrɛma wosow wɔn ti. ⁸ Wɔka se, “Wode wo ho too Awurade so na adɛn nti na onnye wo nkwa? Sɛ Awurade pɛ w’asɛm a, adɛn nti na ɔmmoa wo?”

⁹ Wo na wode me fi m’awo mu bae dwoodwoo. Na meyɛ akokoaa no, wo na wohwɛɛ me so. ¹⁰ Efi bere a wɔwoo me na mede me ho metoo wo so, na woyɛ me Nyankopɔn daa. ¹¹ Ntew wo ho mfi me ho! Amane abɛn, na ɔboafo nni baabi.

¹² M’atamfo atwa me ho ahyia sɛ anantwinini. Wɔatwa me ho ahyia te sɛ anantwinini a wɔn ho yɛ hu a wofi Basan. ¹³ Wobuebue wɔn anom te sɛ agyata a wɔrepɔ so retetew me. ¹⁴ M’ahoɔden asa; asa te sɛ nsu a wɔahwie agu fam. Me nnompe ahodwow. Me koma ayɛ sɛ nku a anan. ¹⁵ Me menewa mu ayow te sɛ mfutuma. Na me tɛkrɛma tare m’anom. Woagyaw me sɛ minwu wɔ mfutuma mu. ¹⁶ Nnebɔneyɛfo atwa me ho ahyia; wɔte sɛ akramankuw a wɔaka me ahyɛ wɔn ntam. Wɔkeka me nsa ne me nan. ¹⁷ Me nnompe nyinaa apuepue. M’atamfo hwɛ me haa. ¹⁸ Wɔbɔ me ntade so ntonto kyekyɛ ma wɔn ho.