Numba 1 From John 3

Hawai‘i Pidgin

Godʼs Kids

3 Tink bout da kine love an aloha da Fadda wen show us! He even wen call us his kids! An we his kids fo real kine, you know. Az why da peopo inside da world donno wat kine peopo us, cuz dey donno wat kine God. ² My good friends, we Godʼs kids awready. God neva show us yet wat kine we goin be bumbye. But we know dat wen Christ come back, we goin be jalike him, cuz we goin see him jalike he stay. ³ Everybody dat know dat, an stay trus Christ, an wait fo him, dat guy make his own heart clean inside, jalike Christ stay clean inside.

⁴ Whoeva do bad kine stuff wen broke Godʼs Rules, cuz wen you do bad kine stuff, dat mean you no listen to Godʼs Rules. ⁵ You guys know dat Christ wen come fo throw out da bad kine stuff we wen do. Christ, he no do bad kine stuff, eva. ⁶ Whoeva stay tight wit Christ no stay do bad kine stuff. Whoeva stay do bad kine stuff, jalike dey neva see Christ o know him fo real kine.

⁷ My good friends, no let nobody bulai you guys. Whoeva stay do da right kine tings, dey stay right, jalike Christ stay right. ⁸ Whoeva stay do bad kine stuff, dey da Devilʼs kid, cuz from da first time da Devil stay do bad kine stuff. Dass why Godʼs Boy wen come, fo bus up da bad kine stuff da Devil stay doing.

⁹ Whoeva Godʼs kids no stay do bad kine stuff, cuz jalike God stay live inside dem now. Dey no stay do bad kine stuff, cuz dey come from God. ¹⁰ Dis how we can know who Godʼs kids an who da Devilʼs kids. Whoeva no do da right kine tings, not Godʼs kids. Whoeva no mo love an aloha fo dea brudda an sista, dey not Godʼs kids too.

Get Love An Aloha Fo Each Odda

¹¹ Da ting you wen hear from da first time say dis: We gotta get love an aloha fo each odda. ¹² Tink bout da story inside da Bible from befo time. No make like Cain. He wen stick wit da Bad Guy, da Devil, an kill his own brudda. How come he wen kill him? Cuz Cain wen do bad kine tings, an his brudda wen do da right kine tings.

¹³ My bruddas an sistas, wen da peopo inside dis world hate you guys, no let dat blow yoa mind. ¹⁴ Us guys not mahke inside no moa, but we wen come alive inside fo real kine. An how come we know dat? Cuz we get love an aloha fo our bruddas an sistas, az why. Whoeva no mo love an aloha, stay cut off from God, jalike dey stay mahke inside. ¹⁵ Whoeva hate dea brudda an sista, jalike dey one guy dat kill peopo. An you know dat one guy dat kill peopo no mo da real kine life dat stay to da max foeva. ¹⁶ Dis how we know wat real love stay like: cuz Christ wen give himself fo mahke fo us. So den, we gotta be ready fo do da same kine ting fo our bruddas an sistas. ¹⁷ If get somebody dat get plenny stuffs, an dey see dat dea brudda o sista no mo notting, but dey no mo pity fo dem, how dey can say dat dey get love an aloha fo God? No can. ¹⁸ My good friends, no can show love wit talk ony, but gotta show da kine love dass fo real, an do good kine tings fo everybody.

We No Need Come Scared In Front God

¹⁹ So, wen us guys get dat kine love an aloha, den we know dat we stick wit wass true. We tell our own heart dat everyting stay okay now, da way God see us. ²⁰ But no matta inside our heart we tinking plenny bout da bad kine stuff we wen do, same time, we know dat God mo big den our heart, an he know everyting bout us guys. ²¹ My good friends, if our heart no tell us we wen do bad kine stuff, we know same time we no need be shame in front God. ²² An we get from God wateva we aks him fo do, cuz we do wat he tell us, an do wat he like. ²³ Dis wat God wen tell us fo do: Trus his Boy Jesus Christ, da Spesho Guy God Wen Send, an get love an aloha fo each odda, jalike he wen tell us. ²⁴ Everybody dat do wat God tell us, dey stay tight wit God, an God stay tight wit dem. Dis how we know dat God stay tight wit us, cuz God wen give us his Spirit.