Nnwom 130

Nkwa Asem

Mmoa mpaebɔ

130 Awurade, mifi m’aba a abu nyinaa mu refrɛ wo. ² Tie me sufrɛ, O Awurade; tie me frɛ, na boa me!

³ Sɛ wubu yɛn bɔne ho nkontaa a, anka hena na obeguan atemmu? ⁴ Nanso wode kyɛ yɛn nti na ɛma yetumi gyina w’abufuw ano no. ⁵ Meretwɛn ahopere mu, apɛ Awurade mmoa, na mede me ho to n’asɛm so. ⁶ Metwɛn Awurade ahopere so sen ɔwɛmfo a ɔretwɛn adekyee. ⁷ Israel, fa wo ho to Awurade so efisɛ, ne dɔ wɔ hɔ daa, na bere biara wasiesie ne ho sɛ ɔbɛboa. ⁸ Obegye ne nkurɔfo, Israelfo, afi bɔne nyinaa mu.