Mateo 24:36-51

Magandang Balita Biblia

Walang Nakakaalam ng Araw o Oras^(A)

³⁶ “Ngunit tungkol sa araw at oras na iyon ay walang nakakaalam, kahit ang mga anghel sa langit [o maging ang Anak man].^[a] Ang Ama lamang ang nakakaalam nito. ³⁷ Ang^(B) pagdating ng Anak ng Tao ay tulad noong panahon ni Noe. ³⁸ Nang mga araw na iyon, bago bumaha, ang mga tao'y nagsisikain, nag-iinuman, at nagsisipag-asawa hanggang sa araw na pumasok si Noe sa barko. ³⁹ Hindi^(C) nila namamalayan ang nangyayari hanggang sa dumating ang baha at tinangay silang lahat. Gayundin ang mangyayari sa pagdating ng Anak ng Tao. ⁴⁰ Sa panahong iyon, may dalawang lalaking nagtatrabaho sa bukid, kukunin ang isa at iiwan ang ikalawa. ⁴¹ May dalawang babaing nagtatrabaho sa gilingan, kukunin ang isa at iiwan ang ikalawa. ⁴² Kaya't maging handa kayo dahil hindi ninyo alam kung kailan darating ang inyong Panginoon. ⁴³ Unawain^(D) ninyo ito: kung alam ng may-ari ng bahay kung anong oras sa gabi darating ang magnanakaw, siya'y maghahanda at hindi niya pababayaang pasukin ang kanyang bahay. ⁴⁴ Kaya't lagi kayong maging handa, sapagkat darating ang Anak ng Tao sa oras na hindi ninyo inaasahan.”

Dapat Palaging Maging Handa^(E)

⁴⁵ “Sino ang tapat at matalinong alipin? Hindi ba't ang pinamamahala ng kanyang panginoon upang magpakain sa iba pang mga alipin sa takdang oras? ⁴⁶ Pinagpala ang aliping iyon kapag dinatnan siyang tapat na naglilingkod sa pagbabalik ng kanyang panginoon! ⁴⁷ Sinasabi ko sa inyo, gagawin siyang tagapamahala ng kanyang panginoon sa lahat ng mga ari-arian nito. ⁴⁸ Ngunit kung masama ang aliping iyon, sasabihin niya sa kanyang sarili, ‘Matatagalan pa ang pagbabalik ng aking panginoon.’ ⁴⁹ Kaya't sisimulan niyang bugbugin ang kanyang kapwa alipin, at makikipagkainan at makikipag-inuman sa mga lasenggo. ⁵⁰ Babalik ang panginoon ng aliping iyon sa araw na hindi niya inaasahan at sa oras na hindi niya alam. ⁵¹ Bibigyan siya ng kanyang panginoon ng matinding parusa,^[b] at pagkatapos ay isasama sa mga mapagkunwari. Doo'y tatangis siya at magngangalit ang ngipin.”