Lucas 9:51-56

Ang Bagong Tipan: Filipino Standard Version

Hindi Tinanggap si Jesus

⁵¹ Nang papalapit na ang araw ng pagtanggap sa kanya sa langit ay itinuon niya ang kanyang sarili sa pagpunta sa Jerusalem. ⁵² Nagpadala siya ng mga sugo na mauuna sa kanya. Umalis ang mga ito at pumasok sa isang nayon ng mga Samaritano upang maghanda para sa kanya. ⁵³ Ngunit hindi siya tinanggap ng mga tagaroon sapagkat siya'y nagpasya nang pumunta sa Jerusalem. ⁵⁴ Nang makita ito ng mga alagad na sina Santiago at Juan ay sinabi nila, “Panginoon, gusto ba ninyong magpaulan tayo ng apoy mula sa langit upang tupukin sila?” ⁵⁵ Subalit humarap sa kanila si Jesus at sila'y sinaway. ⁵⁶ Pumunta sila sa ibang nayon.