Lucas 22:54-71

Ang Biblia (1978)

⁵⁴ At kanilang dinakip siya, at ^(A)dinala siya, at ipinasok siya sa bahay ng pangulong saserdote. ^(B)Datapuwa't sa malayo'y sumusunod si Pedro.

^55 (C)At nang makapagpadikit nga sila ng apoy sa gitna ng ^(D)looban, at mangakaupong magkakasama, si Pedro ay nakiumpok sa gitna nila.

⁵⁶ At isang alilang babae, na nakakakita sa kaniya samantalang siya'y nakaupo sa liwanag ng apoy, ay tinitigan siya, at sinabi, Ang taong ito ay kasama rin niya.

⁵⁷ Datapuwa't siya'y nagkaila, na nagsasabi, Babae, hindi ko siya nakikilala.

⁵⁸ At pagkaraan ng isang sangdali ay nakita siya ng iba, at sinabi, Ikaw man ay isa sa kanila. Datapuwa't sinabi ni Pedro, Lalake, ako'y hindi.

⁵⁹ At nang makaraan ang may isang oras, ay pinatotohanan ng iba pa, na nagsasabi, Sa katotohanan, ang taong ito'y kasama rin niya; sapagka't siya'y Galileo.

⁶⁰ Datapuwa't sinabi ni Pedro, Lalake, hindi ko nalalaman ang sinasabi mo. At pagdaka, samantalang siya'y nagsasalita pa, ay tumilaok ang manok.

⁶¹ At lumingon ang Panginoon, at tinitigan si Pedro. At naalaala ni Pedro ang salita ng Panginoon, kung paanong sinabi niya sa kaniya, ^(E)Bago tumilaok ang manok ngayon, ay ikakaila mo akong makaitlo.

⁶² At siya'y lumabas, at nanangis ng kapaitpaitan.

^63 (F)At nililibak si Jesus, at siya'y sinasaktan ng mga taong nangagbabantay.

⁶⁴ At siya'y piniringan nila, at tinatanong siya, na sinasabi, Hulaan mo; sino ang sa iyo'y humampas?

⁶⁵ At sinabi nila ang ibang maraming bagay laban sa kaniya, na siya'y inaalimura.

⁶⁶ At nang araw na, ay nagkatipon ang kapulungan ng matatanda sa bayan, ang mga pangulong saserdote, at gayon din ang mga eskriba, at dinala siya sa kanilang Sanedrin, na sinasabi,

⁶⁷ Kung ikaw ang Cristo, ay sabihin mo sa amin. Datapuwa't sinabi niya sa kanila, Kung sabihin ko sa inyo, ay hindi ninyo ako paniniwalaan:

⁶⁸ At kung kayo'y aking tanungin, ay hindi kayo magsisisagot.

⁶⁹ Datapuwa't ^(G)magmula ngayon ang Anak ng tao ay mauupo sa kanan ng kapangyarihan ng Dios.

⁷⁰ At sinabi nilang lahat, Kung gayo'y ikaw baga ang ^(H)Anak ng Dios? At sinabi niya sa kanila, Kayo ang nangagsasabi ^(I)na ako nga.

⁷¹ At sinabi nila, Ano pa ang kailangan natin ng patotoo? sapagka't tayo rin ang nangakarinig sa kaniyang sariling bibig.