Levitico 18

Magandang Balita Biblia

Mga Bawal na Pagtatalik

18 Sinabi pa ni Yahweh kay Moises, ² “Ito ang sabihin mo sa mga Israelita: ‘Ako si Yahweh ang inyong Diyos. ³ Huwag ninyong gagayahin ang mga kaugalian sa Egipto na inyong pinanggalingan o ang mga kaugalian sa Canaan na pagdadalhan ko sa inyo. ⁴ Ang sundin ninyo'y ang mga kautusan at tuntuning ibinigay ko sa inyo. Ako si Yahweh, ang inyong Diyos. ⁵ Ang^(A) sinumang tutupad ng aking mga kautusan at tuntunin ay mabubuhay; ako si Yahweh.’

⁶ “Huwag kayong makipagtalik sa malapit na kamag-anak. Ako si Yahweh. ⁷ Huwag kayong makipagtalik sa inyong ina, iyan ay kahihiyan sa inyong ama. Hindi ninyo dapat halayin ang inyong ina. ⁸ Huwag^(B) kayong makipagtalik sa ibang asawa ng inyong ama, inilalagay ninyo sa kahihiyan ang inyong sariling ama. ⁹ Huwag^(C) kayong makipagtalik sa inyong kapatid na babae, maging siya'y anak ng inyong ama o ng inyong ina, ipinanganak man siya sa inyong lupain o sa ibang bayan. ¹⁰ Huwag kayong makipagtalik sa inyong apo, maging sa anak ninyong lalaki o babae; iyan ay kahihiyan sa inyo. ¹¹ Huwag kayong makipagtalik sa anak ng inyong ama sa ibang babae, sapagkat siya'y kapatid din ninyo. ¹² Huwag^(D) kayong makipagtalik sa kapatid na babae ng inyong ama, siya'y kadugo ng inyong ama. ¹³ Huwag kayong makipagtalik sa kapatid na babae ng inyong ina, siya'y kadugo ng inyong ina. ¹⁴ Huwag kayong makipagtalik sa asawa ng inyong tiyo, tiya mo na rin siya. ¹⁵ Huwag^(E) kayong makipagtalik sa inyong manugang na babae; siya'y asawa ng inyong anak na lalaki. Hindi ninyo dapat ilagay sa kahihiyan ang inyong sariling anak. ¹⁶ Huwag^(F) kayong makipagtalik sa inyong hipag; taglay niya ang kapurihan ng inyong kapatid. ¹⁷ Huwag^(G) kayong makipagtalik sa anak o sa apong babae ng isang babaing nakatalik ninyo noon. Maaaring ang mga iyon ay kamag-anak ninyo, at iyan ay kahalayan. ¹⁸ Hindi ninyo maaaring maging asawa ang inyong hipag kung buháy pa ang inyong asawa. Inilalagay ninyo sa kahihiyan ang iyong asawa na kanyang kapatid.

¹⁹ “Huwag^(H) kayong makipagtalik sa isang babae habang siya'y may regla sapagkat siya'y marumi. ²⁰ Huwag^(I) ninyong durungisan ang inyong sarili sa pakikiapid sa asawa ng iba. ²¹ Huwag^(J) ninyong ibibigay ang alinman sa inyong mga anak upang sunugin bilang handog kay Molec sapagkat ito'y paglapastangan sa pangalan ng inyong Diyos. Ako si Yahweh. ²² Huwag^(K) kayong makipagtalik sa kapwa ninyo lalaki; iyan ay karumal-dumal. ²³ Huwag^(L) kayong makipagtalik sa alinmang hayop sapagkat durungisan ninyo ang inyong sarili kung gagawin ninyo ito. Hindi rin dapat pasiping ang sinumang babae sa anumang hayop; ito ay kasuklam-suklam.

²⁴ “Huwag ninyong durungisan ang inyong sarili sa alinman sa mga gawaing ito. Ganyan ang ginawa ng mga bansang nauna sa inyo, kaya ko sila sinumpa. ²⁵ Pati ang lupain nila'y naging kasuklam-suklam, kaya pinarusahan ko at itinakwil ang mga mamamayan doon. ²⁶ Kaya dapat ninyong sundin ang aking mga utos at tuntunin, at iwasan ninyo ang lahat ng gawaing ipinagbabawal ko, maging Israelita o dayuhan man kayo. ²⁷ Ang mga taong nauna sa inyo rito ay namuhay sa ganoong karumal-dumal na gawain kaya naging kasumpa-sumpa ang kanilang lupain. ²⁸ Kapag sila'y inyong tinularan, palalayasin din kayo sa lupaing ito, tulad ng nangyari sa kanila. ²⁹ Sapagkat ang sinumang gumawa ng alinmang karumal-dumal na gawaing ito ay dapat itiwalag sa sambayanan.

³⁰ “Sundin ninyo ang ipinag-uutos ko at huwag ninyong gagayahin ang mga kasuklam-suklam na kaugalian nila upang hindi kayo maging maruming tulad nila. Ako si Yahweh, ang inyong Diyos.”