Juan 8

Mushuj Testamento Diospaj Shimi

Huainayacuj huarmita japishpami Jesuspajman pushamushcacuna

8 Chai q'uipaca Jesusca, Olivo yuracuna tiyan urcumanmi rirca. ² Cayandij tutamantaca Diospaj huasiman tigramujpimi, tucuicuna paipajman shamujpi, yachachishpa tiyacurca. ³ Chaipica Mandashcata yachachijcunapish, fariseocunapish shuj huarmitami huainayacujta japishpa, Jesuspajman pushamurcacuna. Chai huarmita tucuicunapaj chaupipi churashpami, ⁴ cashna nircacuna:

–Yachachij, cai huarmitaca huainayashpa siricujtamari japimunchij. ⁵ Moisés Mandashcapica, cashna huarmicunataca: “Rumihuan shitashpa huañuchichun” nishpamari mandashca. Canca caitaca, ¿imatataj ningui?– nircacunami.

⁶ Jesús pandarijpica juchachingaraicullami, chashna tapurcacuna. Ashtahuanpish Jesusca cumurishpa, pambapi maquihuan quillcacurcallami. ⁷ Paicuna tapuracujpimi Jesusca, umata huichi jatarichishpa:

–Maijan cancuna jucha illajlla cashpaca, cai huarmitaca, pairaj rumihuan shitachun– nirca.

⁸ Shina nishpaca, cutin cumurishpa pambapi maquihuan quillcashpa catircallami. ⁹ Chashna nijta uyashpaca, quiquin shungullataj juchayuj cashcata juchachijpimi, yuyajcunamanta callarishpa q'uipa huiñaicunacama, shuj shujlla tucuicuna llujshircacuna. Jesusca, gentecunapaj chaupipi shayachishca huarmindijllami saquirirca. ¹⁰ Jesús huichilla ricushpaca, chai huarmilla chaipi shayacujtami ricurca. Pi shujta mana ricurijpimi:

–Huarmi, ¿canta juchachijcunaca maipitaj? ¿Canta llaquichishun nicujcunaca, manachu pi imata nirca?– nijpica:

¹¹ –Amito, mana pi llaquichihuanchu– nircami.

Chashna nijpi Jesusca:

–Ñucapish mana imata ninichu. Rilla, cutinca amataj juchallinguichu– nircami.

Jesusca cai pachata achijyachij Luzmi

¹² Jesusca, cutin yachachishpa catishpaca cashnami nirca:

–Ñucaca, cai pachapaj Luzmi cani. Maijanpish ñucata catijca, mana amsapi puringachu. Ashtahuanpish causaita cuj Luztami charinga– nircami.

¹³ Chashna nijpi, fariseocunaca:

–Canllataj alli ricurisha nishpallamari, chashna nicungui. Can quiquinllamanta huillashcaca yangallamari– nircacunami.

¹⁴ Shina nijpi, Jesusca cashnami nirca:

–Ñucallamantataj huillacujpipish, Ñuca huillashcaca mana yangachu. Ñucaca maimanta shamushcata, maiman rina cashcatapish yachanimari. Ashtahuanpish cancunaca Ñuca maimanta shamushcata, maiman ricushcatapish mana yachanguichijchu. ¹⁵ Cancunaca aicha yuyachishca shinami, juchachinguichij. Ñucaca, pitapish mana juchachinichu. ¹⁶ Ñuca juchachishpaca, ima juchachina tiyajpitajmi juchachisha. Imalla rurashcata ricuchingapajca mana ñucallachu cani, ñucata cachaj Yayahuanmi cani. ¹⁷ Cancunata Mandashcallapitajmi cashna Quillcashca: “Ima ricushcata ishquipura huillajpica mana llullachu” nishcami. ¹⁸ Chaipi nicushca shinallataj, Ñucapish Ñucallamantataj huillajmi cani. Ñucata cachaj Yayapish ñucamanta huillacunmi– nircami.

¹⁹ Chashna nijpimi, paicunaca:

–¿Maipitaj Cambaj Yayaca?– nijpi, Jesusca:

–Cancunaca Ñucatapish, Ñuca Yayatapish mana rijsinguichijchu. Ñucata rijsishpaca, Ñuca Yayatapish rijsinguichijmanmi– nirca.

²⁰ Jesusca Diospaj huasipi yachachicushpaca, cullquita churana c'uchullapimi cai shimicunataca rimarca. Chaipi cajpipish Paita japishun yuyacujcunaca, horas manaraj pajtashcamantami, mana japircacuna.

Jesusca ‘Mana cai pachamantachu cani’ nishcami

²¹ Jesusca cutinmi paicunataca:

–Ñucaca rigrinimi, Ñuca rishca huashami mashcanguichij. Ashtahuanpish cancunapaj juchallapitajmi huañunguichij. Ñuca ricunmanca mana shamui tucunguichijchu– nircami.

²² Shina nijpi judiocunaca: «¿Maipi huañugricushpachu: “Ñuca ricunmanca, cancunaca mana shamui tucunguichijchu” nicun, imashi?» nircami.

²³ Chashna nijpimi, Jesusca cashna nirca:

–Cancunaca cai ucumantami canguichij, Ñucaca jahuamantami cani. Cancunaca cai pachamantami canguichij, Ñucaca mana cai pachamantachu cani. ²⁴ Cancunataca cai pachallamanta cajpimi: “Cancunapaj juchacunallapitajmi huañunguichij” nircani. Ñuca pi cajta mana crishpaca, cancunapaj juchacunallapitajmi huañunguichij– nircami.

²⁵ Chashna nijpimi:

–Canca, ¿pitaj canguiari?– nijpi Jesusca, paicunata cashna nirca:

–Ñucaca, callarimantapacha huillacushcallatajmi cani. ²⁶ Cancunataca achcatami rimanatapish, juchachinatapish charini. Shina cajpipish Ñucata Cachaj imallata nichun nishcallatami, cai pachapi causajcunamanca rimani– nircami.

²⁷ Shina nijpipish Yaya Diosmanta Jesús chashna nicushcataca, mana entendircacunachu. ²⁸ Chaimantami, Jesusca cashna nirca:

–Runa Aichayuj Ñucata jahuaman huarcushpami, Ñuca pi cashcataca rijsinguichij. Chaipimi imatapish Ñuca quiquin yuyaillamantaca, mana ruraj cashcata yachanguichij. Ñucaca, Yaya yachachishcallatami rimani. ²⁹ Ñucata cachaj Yayaca Ñucahuanmari. Pai cushicunallata ruraj cajpimi, mana Ñucallata saquishca– nircami.

³⁰ Jesús chashna rimajpica, achcacunami Paitaca crircacuna.

Abrahampaj huahuacuna cashpaca pai shinami canguichijman

³¹ Jesusca, Paita crij judiocunataca, cashnami nirca:

–Ñuca huillashca Shimicunata crishpa, mana huashaman tigrashpaca, Ñuca yachacujcunatajmi canguichij. ³² Cashcatataj huillaj shimicuna cashcatami rijsinguichij. Chai Shimicunami cancunataca, huatashca shinamanta cacharichinga– nircami.

³³ Chashna nijpimi:

–Ñucanchijca, Abrahammanta miramushcacunamari canchij. Mana pipaj maquipi huatashcacuna canchijchu. ¿Ima nishpataj: “Cachariringuichijmi” ninguiari?– nishpami tapurcacuna.

³⁴ Shina nijpimi Jesusca, cashna nirca:

–Pipish juchallata rurashpa causajtaca, juchami huatashcata charicun. Chaica chashnatajmari. ³⁵ Servichun randishcalla runaca, mana huasipi causacunllachu. Ashtahuanpish churimi yayahuanca causacungalla. ³⁶ Chashna cajpimi cancunaca, Diospaj Churi cacharichijllapi, cacharishcataj saquiringuichij. ³⁷ Cancuna Abrahammanta miramushca cajtaca yachanitajmari. Shina cashpapish Ñuca huillashca shimicunata cancunapaj shungupi mana chasquishpami, Ñucataca huañuchishun nicunguichij. ³⁸ Ñuca Yaya imallata rurajtaca, Ñucatajmi ricurcani. Chaimantami cancunamanca, chaita huillacuni. Cancunapish cancunapaj yayata uyashpami, chaita caticunguichij– nircami.

³⁹ Shina nijpi paicunaca:

–Ñucanchij yayaca Abrahammari– nijpimi, Jesusca cashna nirca:

–Abrahammanta miramushcacunataj cashpaca, Abraham shinallatajmari ruranguichijman. ⁴⁰ Ashtahuanpish cancunaca, ¡Taita Dios ima nishcata uyashpa, chaita huillashcamantami Ñucataca, huañuchishun yuyanguichij! Abrahamca, mana chashna ruranmanchu carca. ⁴¹ Cancunaca, cancunapaj yaya shinallatajmi ruracunguichij– nircami.

Chashna nijpica:

–¡Ñucanchijca, mana huainapaj huahuacunachu canchij! ¡Shujlla Yayatamari charinchij, Paica Taita Diosmari!– nircacunami.

Diablopaj huahuacuna cashcamantami, ñucataca mana cringuichij

⁴² Shina nijpimi, Jesusca cashna nirca:

–Taita Dios cancunapaj Yaya cajpica, Ñucataca c'uyanguichijmanmari. Ñucaca, Taita Diospajmantami shamurcani. Mana quiquin yuyaillamantachu shamurcani. Paimari Ñucataca cacharca. ⁴³ Cancunallataj Ñuca huillashcata mana uyashun nishcamantami, Ñuca rimashcataca mana entendinguichij. ⁴⁴ Cancunaca cancunapaj yaya diablopaj huahuacunamari canguichij. Chaimanta cancunapaj yayapaj munaillatamari rurashun ninguichij. Paica callarimantapacha huañuchijmi. Paipica llullanalla tiyashcamanta, mana llulla canapica mana saquirishcachu. Paica llullapaj yaya cashcamantaca, llullata rimashpaca, pai rimana cashca shinallatajmi riman, paica llullami. ⁴⁵ Ashtahuanpish Ñucataca, mana llullashpa huillajpimari mana cringuichij. ⁴⁶ ¿Pi cancunataj Ñuca ima juchata rurashcata ricuchi tucunguichij? Cashcatataj Ñuca huillajpica, ¿ima nishpataj mana cringuichigari? ⁴⁷ Maijanpish Diospaj cajcunaca, Diospaj Shimitaca uyanmi. Ashtahuanpish cancunaca mana Diospaj cashpami, Paipaj Shimitaca mana uyashun ninguichij– nircami.

Cristomi huiñaita ña tiyashcamanta tucuita callarichishca

⁴⁸ Chaimantami judiocunaca, cashna rimarcacuna:

–Cantaca ‘Supai japishcami cangui, samariataj samaria runa’ nishpaca, allillatatajmi nicunchij– nircacunami.

⁴⁹ Chashna nijpi Jesusca, cashnami cutichirca:

–Ñucataca, ima supai mana japishcachu. Ashtahuanpish Ñuca Yayatamari jatunyachicuni. Cancunaca Ñucataca, manamari jatunyachinguichijchu. ⁵⁰ Mana Ñucachu jatunyachichun mashcacuni, Ñuca Yayami Ñucata jatunyachichun munan, cancuna mana chasquishcamantaca Paimari juchachinga. ⁵¹ Pipish Ñuca imalla nishcata caźujca manataj huañungachu, chaica chashnatajmari– nircami.

⁵² Chashna nijpimi judiocunaca, cashna nirca:

–Abrahampish, Dios ima nishcata huillajcunapish huañurcamari. Canca: “Pipish Ñuca huillashcata caźujca, mana huañungachu” ninguimari. Cunantajca Cantaca, supai japishca cashcata ricunchijtajmi. ⁵³ ¿Canca ñucanchij ñaupa yaya Abrahamta yallichari canguiari? Paipish, Dios ima nishcata huillajcunapish huañurcami. Canca, ¿pi cashcatapishchari yuyangui?– nircacunami.

⁵⁴ Chashna nijpica, Jesusca cashnami nirca:

–Ñuca quiquinllataj ‘Allimi cani’ nirijpica, chaica yangallamari canman. Ñuca Yayamari ñucataca sumajyachicun. Cancunapish Paillatatajmari, ‘Ñucanchij Diosmi’ nicunguichij. ⁵⁵ Chashna nishpapish, Paitaca mana rijsinguichijchu. Ñucaca Paita rijsinimari. “Paita mana rijsinichu” nishpaca, cancuna shinallataj llullami caiman. Ashtahuanpish Ñucaca Paita rijsishcamantami, Pai ima nishcata caźuni. ⁵⁶ Cancunapaj ñaupa yaya Abrahamca, Ñuca shamuna punllata ricusha yuyashpami cushicurca. Ña ricushpacarin, ashtahuanmi cushicurca– nircami.

⁵⁷ Chashna nijpi judiocunaca:

–Manaraj pichca chunga huatayujllapish canguica. ¿“Abrahamtaca ricurcani” ninguichu, imamí?– nircacunami.

⁵⁸ Shina nijpi Jesusca:

–Abraham manaraj tiyajpimari Ñucaca ña tiyarcani, chaica chashnatajmari– nircami.

⁵⁹ Chashna nijpica rumicunata japishpami, shitashun nircacuna. Ashtahuanpish Jesusca, Diospaj huasimantaca, paicunapaj chaupillatataj allijlla miticushpa llujshircallami.