Isaias 4

Ang Biblia (1978)

Hangal na babae (karugtong).

4 At pitong babae ay ^(A)magsisihawak sa isang lalake sa araw na yaon, na mangagsasabi, Kami ay magsisikain ng aming sariling tinapay, at mangagsusuot ng aming sariling kasuutan: tawagin lamang kami sa iyong pangalan; alisin mo ang aming kadustaan.

Ang mga natira ay maliligtas.

² Sa araw na yaon ay magiging maganda at maluwalhati ^(B)ang sanga ng Panginoon, at ang bunga ng lupain ay magiging magaling at mainam sa kanilang mga taga Israel na nangakatanan.

³ At mangyayari, na siyang naiwan sa Sion, at siyang nalabi sa Jerusalem, ^(C)tatawaging banal, sa makatuwid baga'y bawa't ^(D)nasusulat sa mga nabubuhay sa Jerusalem:

^4 (E)Pagka huhugasan ng Panginoon ang karumhan ng mga anak na babae ng Sion, at lilinisin ang dugo ng Jerusalem sa gitna ng bayan sa pamamagitan ng bisa ng kahatulan, at sa pamamagitan ng bisa ng pagniningas.

⁵ At ang Panginoon ay lilikha sa itaas ng buong tahanan ng bundok ng Sion, at sa itaas ng kaniyang mga kapulungan ng isang ^(F)ulap at usok sa araw, at ng ^(G)liwanag ng nagniningas na apoy sa gabi: sapagka't sa itaas ng lahat ng kaluwalhatian ay magkakaroon ng isang kubong na kayo.

⁶ At magkakaroon ng kanlungan upang maging lilim sa kaarawan laban sa init, at ^(H)upang maging kanlungan at kublihan sa bagyo at sa ulan.