Galatia 1

Ne Bibliaj Tik Nawat

1 Naja, Pawlo, titanijtuk, inte ipal takamet, nian itech imey se takat, asunte itech Yeshu Mawaltijtuk wan Teut iteku ne kiketzki kwak miktuk, ² wan muchi ne tukniwan nuwan, tiktuktiat ini tajkwilul itech ne sejsennemit ipal Galatia.

³ Ma metzinmaka tetasujtalis wan nejmachnemilis ne Teut ká ne tuteku, wan ne tajtzin Yeshu Mawaltijtuk ⁴ ká mutemakak ipanpa ne anmutajtateyekchijtuk pal kiane ma techmakishti itech ini taltikpak teyek, ken kielewia ne Teut wan ne tuteku, ⁵ ne tzitzinaka pal senpa wan senpa, amen.

Sema se yeknawatilis nemi

⁶ Nishpuyawi! Sea talul ankiajkawtiwit ne ká metzinnutzki tik itetasujtalis ne Mawaltijtuk ipanpa ukse yeknawatilis!

⁷ Seuk te kanaj! Metzinkakasujtiwit sejse wan kinekit kipatat ne iyeknawatilis ne Mawaltijtuk. ⁸ Su tejemet, wan hasta su se tanawatiani ipal ilwikak, metzinmakaskia ukse yeknawatilis te kenha ken tay ne timetzinmakaket, ma muchiwa maldictar. ⁹ Ken tinatiwit achtu, nusan nina ashan: asu aka metzinmaka ukse yeknawatilis te kenha ken tay ne ankikwijket, ma muchiwa maldictar.

¹⁰ Yek, seman ká ipal nina? Ne takamet o ne Teut? Anka nimutatemulia nikpaktia takamet? Su kenhayuk nikinpaktiskia, inte niitekitini ne Mawaltijtuk.

Ken ajsik ne yeknawatilis itech Pawlo

¹¹ Nukniwan, shikmatikan ka ne yeknawatilis ne nikyeknawatij naja inte walajtuk itech takamet, ¹² ika nian nikwij naja itech takamet, nian nechmachtijket, sute nechneshtilij Yeshu Mawaltijtuk.

¹³ Ika antakaktiwita ken ikman nimuwikak ken Yudayuj: ken sujsul niktalultia katka ne sennemit ipal ne Teut wan nikijtakua katka, ¹⁴ wan niajki nuishpan ken Yudayuj mas que nukunpawan tik nutechan, ika nitajpia katka mas ne tay katka ne nunoywan kichiwat.

¹⁵ Kwak kitak yek ne Teut, ká nechishtemuj kwak kenhayuk ninemituya tik iijti ne nunan wan ká nechnutzki ipanpa itetasujtalis ¹⁶ pal kineshtia ne ikunew nutech ma nitamaka ne iyeknawatilis ijtik ne tejtechan, nemanha te niknawatij aka, ¹⁷ nian niajki tik Yerushalem itech ne muchijtiwit tijtitanijtuk nuishpan, sute niajki tik Arabia, wan senpa tik Damashek.

¹⁸ Tipan kwak panutiwit yey shiwit, niajki tik Yerushalem itech Kepas nitachia, wan ninakak ka ichan kashtul tunal. ¹⁹ Nian se pal ne sejseuk titanijtuk te nikitak, semaya Yakob ne iikaw ne Tajtzin. ²⁰ Tay ne nikijkwilua wan nimetzinhilwia, nina iishpan ne Teut ka yaja tejkia.

²¹ Tipan niajsik hasta ne tajtal ipal Siria wan Kilikia. ²² Te nechishmatit katka ne sejsennemit ipal ne Mawaltijtuk tik Yudaya. ²³ Sema takaktuyat ka ne ká niakeman kitalultia katka ashan kiyeknawatia nemi ne tayulmatilis ne ikman kijtakua, ²⁴ wan nupanpa kiweychijket ne Teut.