Ezekiel 15
Ang Dating Biblia (1905)
15 At ang salita ng Panginoon ay dumating sa akin, na nagsasabi.
2 Anak ng tao, ano ang higit ng puno ng baging kay sa alin mang puno ng kahoy, ng sanga ng puno ng baging na nasa gitna ng mga punong kahoy sa gubat?
3 Makakakuha baga ng kahoy doon upang gawing anomang kayarian? o makakakuha baga roon ang mga tao ng tulos upang mapagsabitan ng anomang kasangkapan?
4 Narito, inihahagis sa apoy na parang panggatong; sinusupok ng apoy ang dalawang dulo niyaon, at ang gitna niyao'y nasusunog; magagamit baga sa anomang gawain?
5 Narito, ng buo pa, hindi nagagamit sa anomang gawain: gaano pa nga kaya, pagka nasupok ng apoy, at nasunog, magagamit pa baga sa anomang gawain?
6 Kaya't ganito ang sabi ng Panginoong Dios, Kung paano ang puno ng baging sa gitna ng mga puno ng kahoy sa gubat, na aking ibinigay sa apoy na panggatong, gayon ko ibibigay ang mga nananahan sa Jerusalem.
7 At aking ititingin ang aking mukha laban sa kanila: sila'y magsisilabas sa apoy, nguni't susupukin sila ng apoy; at inyong malalaman na ako ang Panginoon, pagka aking itiningin ang aking mukha laban sa kanila.
8 At aking sisirain ang lupain, sapagka't sila'y gumawa ng pagsalangsang, sabi ng Panginoong Dios.
Ezekiel 15
Ang Biblia, 2001
Itinulad sa Baging na Ligaw ang Jerusalem
15 At ang salita ng Panginoon ay dumating sa akin, na sinasabi,
2 “Anak ng tao, sa ano nakakalamang ang puno ng baging sa alinmang puno ng kahoy,
ng sanga ng puno ng baging na nasa gitna ng mga punungkahoy sa gubat?
3 Makakakuha ba ng kahoy doon upang gawing anuman?
O makakakuha ba roon ang mga tao ng tulos upang mapagsabitan ng anumang kasangkapan?
4 Iyon ay inihahagis sa apoy bilang panggatong.
Kapag natupok na ng apoy ang dalawang dulo niyon,
at ang gitna niyon ay nasusunog,
iyon ba'y mapapakinabangan pa?
5 Narito, nang ito'y buo pa, hindi ito ginamit sa anuman,
gaano pa nga kaya, kapag ito'y natupok ng apoy at nasunog,
magagamit pa ba sa anumang gawain?
6 Kaya't ganito ang sabi ng Panginoong Diyos: Gaya ng puno ng baging sa gitna ng mga punungkahoy sa gubat, na aking ibinigay sa apoy bilang panggatong, gayon ko ibibigay ang mga naninirahan sa Jerusalem.
7 Ihaharap ko ang aking mukha laban sa kanila; at bagaman sila'y makatakas sa apoy, tutupukin pa rin sila ng apoy. Inyong malalaman na ako ang Panginoon, kapag iniharap ko ang aking mukha laban sa kanila.
8 At aking sisirain ang lupain, sapagkat sila'y gumawa ng kataksilan, sabi ng Panginoong Diyos.”
Ang Bagong Tipan: Filipino Standard Version, Copyright © Philippine Bible Society 2009.
