Deuteronomio 34

Ang Biblia (1978)

Ang kamatayan ni Moises.

34 At sumampa si Moises mula sa mga kapatagan ng Moab ^(A)sa bundok ng Nebo, sa taluktok ng Pisga, na nasa tapat ng Jerico. At itinuro ng Panginoon ang buong lupain ng Galaad ^(B)hanggang sa Dan,

² At ang buong Nephtali at ang lupain ng Ephraim at ng Manases, at ang buong lupain ng Juda ^(C)hanggang sa dagat kalunuran,

³ At ang Timugan at ang ^(D)Kapatagan ng libis ng Jerico na ^(E)bayan ng mga puno ng palma hanggang sa ^(F)Soar.

⁴ At sinabi ng Panginoon sa kaniya, ^(G)Ito ang lupain na aking isinumpa kay Abraham, kay Isaac, at kay Jacob, na sinasabi, Aking ibibigay sa iyong binhi: ^(H)aking pinatingnan sa iyo ng iyong mga mata, nguni't hindi ka daraan doon.

⁵ Sa gayo'y si Moises na lingkod ng Panginoon ay namatay roon sa lupain ng Moab ayon sa salita ng Panginoon.

⁶ At kaniyang inilibing siya sa libis sa lupain ng Moab na nasa tapat ng Beth-peor; nguni't ^(I)sinomang tao ay hindi nakaaalam ng libingan niya hanggang sa araw na ito.

^7 (J)At si Moises ay may isang daan at dalawang pung taong gulang nang siya'y mamatay: ^(K)ang kaniyang mata'y hindi lumabo, ni ang kaniyang talagang lakas ay humina.

⁸ At iniyakan ng mga anak ni Israel si Moises sa mga kapatagan ng Moab, na ^(L)tatlong pung araw: sa gayon, natapos ang mga araw ng pagtangis sa pagluluksa kay Moises.

⁹ At si Josue na anak ni Nun ay napuspos ng ^(M)diwa ng karunungan: sapagka't ipinatong ni ^(N)Moises ang kaniyang mga kamay sa kaniya; at dininig siya ng mga anak ni Israel, at ginawa nila ang gaya ng iniutos ng Panginoon kay Moises.

¹⁰ At ^(O)wala pang bumangong propeta sa Israel na gaya ni Moises, ^(P)na kilala ng Panginoon sa mukhaan,

¹¹ Sa lahat ng mga tanda at mga kababalaghan na iniutos ng Panginoon gawin sa lupain ng Egipto kay Faraon at sa lahat ng kaniyang mga lingkod, at sa kaniyang buong lupain,

¹² At sa buong makapangyarihang kamay at sa buong dakilang kakilabutan, na ginawa ni Moises sa paningin ng buong Israel.