Apostel 14

Reimer 2001

14 Nu paseadet daut see beid toop enn dee Jude aeare Sienagoog enenn jinje en praedjde, so daut en groot deel, beidest Jude en Jrieche toom Gloowe kjeeme.

² Oba dee onnjehuarsaume Jude raeajde dee Heide opp, en febettade aea Senn jaeajen dee Breeda.

³ Oba see bleewe doa ne lange Tiet, en hilde aun brow to raede fom Herr dee Zeichnes jeef to sien Jnodenswuat, enn daem daut hee Teakjens en Wunnda paseare leet derch aeare Henj.

⁴ Oba daut Follkj enne Staut wea jetrant, walkje weare met dee Jude, oba aundre weare met dee Apostel.

⁵ Aus nu oba en grootet Opprua oppkjeem fonn beides dee Heide uk dee Jude met aeare Aewaschte an schlajcht to behaundle en to steenje,

⁶ en see daut ennworde, retste see ut no dee Staede fonn Likaoonea, Listra en Derbe en Ommjaeajent,

⁷ enn deede doa praedje.

⁸ Enn Listra saut doa eena dee enn siene Feet kjraeplich wea, dee fonn Jeburt aun wea kjraeplich jewast en niemols jegone haud.

⁹ Disa head Paul raede. Dee kjikjt am niel aun, en aus hee sach daut dee Gloowe haud jeheelt to woare,

¹⁰ saed hee met ne lude Stem: "Sto opp, en sto opprecht opp diene Feet!". En hee huppst opp en jinkj!

¹¹ En aus daut Follkj sach waut Paul jedone haud, schreaje see lud en saede enn aeare Likaoonische Sproak: "Dee Jeta sent soo aus Mana jeworde en sent rauf jekome no onns!"

¹² En see nande Barnabas, 'Seeues'; en Paul nande see 'Heermes', wiel hee dee haupt Raedna wea.

¹³ Dee Priesta ut Seeues, dee jrod fere Staut wea, brocht Osse en Bloomekrauns no dee Puat, omm met daut Follkj toop Opfa to brinje.

¹⁴ Oba aus dee Apostel Paul en Barnabas daut heade, reete see aeare Kjleede twei en rande mank daut Follkj, en schreaje,

¹⁵ en saede, "Mana, woaromm doo jie soont? wie sent uk Mana dee deselwje Natua ha aus jie, en praedje ju daut jie fonn dit nutslooset wajch dreihe sele, en junt bekjeare to daem laewendje Gott, dee daem Himel, en de Ead en daut Maea, en aules waut doabenne es, jemoakt haft;

¹⁶ dee enn faeaje Jeschlajchte dee Heide haft enn aeare eajne Waeaj gone lote;

¹⁷ en doch haft hee sikj nich oone Zeichnes jelote, enn daem daut hee Goot jedone haft, haft Raeajen fom Himel jejaeft, en fruchtboare Tiede, en haft onns met Aete, en onnse Hoate met Freid, jefelt."

¹⁸ En met dise Wead beruejde see kaum daut Follkj daut see an nich Opfa brochte.

¹⁹ Donn kjeeme Jude fonn Antiochean en Iekoonean en aewaraede daut Folkkj en steenjde Paul en schlappte am ut dee Staut erut wiel see jleewde hee wea Doot.

²⁰ Oba aus dee Jinja sikj romm am saumelde, stunnt hee opp en jinkj enne Staut enenn. De naeakjste Dach jinje hee en Barnabas no Derbe.

²¹ Aus see doa jepraedicht haude en fael Jinja jemoakt haude, deede see trig no Iekoonian en Listra en Antiochean,

²² en bestaedijde dee Jinja aea Senn en femonde an em Gloowe faust to stone, en daut wie derch fael Triebsaul motte enn Gott sien Rikj enenn kome.

²³ En aus see enn aule Jemeente Aelteste aunjestalt haude, aewajeewe see an daem Herr enn daem see jleewde.

²⁴ See reisde derch Pisidean en kjeeme no Pamfilean,

²⁵ en praedjde daut Wuat enn Perga, en kjeeme no Atallia, en fonn doa fuare see opp Schep no Antiochean,

²⁶ fonn wua see Gott siene Jnod weare aunbefole worde fa dee Oabeit dee see nu ferecht haude.

²⁷ Aus see bott doa jekome weare, fesaumelde see dee gaunse Jemeent en jeewe Berecht waut Gott met an jedone haud, en daut hee dee Heide ne Daea tom Gloowe haud opjemoakt.

²⁸ En see bleewe ne lange Tiet met dee Jinja.