2 Pedro 1

Ne Bibliaj Tik Nawat

1 Naja, Shimon Pedro, itekitini wan ititanijtuk Yeshu Mawaltijtuk, nikintajpalua ne tukniwan ne kikwijtiwit tayulmatilis kenha ken tejemet ipal ne yek ipal ne Teut tutamakishtiani Yeshu Mawaltijtuk. ² Ma shikpiakan wey tetasujtalis wan nejmachnemilis tik taishmatilis ipal ne Teut wan ne tutajtzin Yeshu.

³ Ne itajpal Teut techtakulijtuk muchi tay timunekit pal tiyujyultuk wan pal tiyejyek ika tikishmatit ne Teut, ne technutztuk iwan itawilyu wan yek, ⁴ wan ijkiuni techtakulijtuk projpromesaj tetekia wey inpatiw, pal kiane welit ankipiat teukayu kwak tamit anchuluat wejka ne puliwis ipal ne taelewilis tik ne taltikpak.

⁵ Yajika, nusan shimutatemuilikan sujsul pal ankitaliat tik ne anmutayulmatilis ne yek; tik ne yek ne taishmatilis; ⁶ tik ne taishmatilis ne yek muwikalis; tik ne yek muwikalis ne tanejmachselilis; tik ne tanejmachselilis ne yulchipakayu; ⁷ tik ne yulchipakayu ne iknitasujtalis; tik ne iknitasujtalis ne tetasujtalis. ⁸ Ika asu ijtik anmejemet muchi ini muajsi wan tepewi, yawi kichiwa ka anmutekiw kipias ipatiw wan itakil iwan taishmatilis ipal tutajtzin Yeshu Mawaltijtuk; ⁹ wan ká ne inte ijkiuni se pupuyut ne inte tachia wan kielkawa ka mupupujket itajtateyekchijtuk ipal ikman. ¹⁰ Yajika nukniwan, yek ma shimutatemuilikan pal antajpiat ne anmutanutzalis wan anmuishpejpenka, ika asu uni ankichiwat te keman antatzunchalusket, ¹¹ wan ijkiuni yawit metzinkalaktiat ijtik ne tatekimakalis pal senpa ipal ne tutajtzin wan tutamakishtiani Yeshu Mawaltijtuk.

¹² Yajika senpa niaw nimetzinhelnamiktilia muchi ini, melka ankimatit yek ka tejkia. ¹³ Nina ka yek ma nimetzinhilwi pal te ankielkawat muchi ne tujtunal ne ninemiuk ijtik ini nuweyka, ¹⁴ ika nikmati ka nemanha niaw nikajkawa ini nutawipantzin ijkiuni ken ne tutajtzin Yeshu Mawaltijtuk nusan nechneshtilijtuk. ¹⁵ Nusan niaw nimutatemuilia pal anwelit kielnamikit ini sejsenpa kwak naja intea niaw ninemi.

¹⁶ Timetzinneshtilijtiwit ka ne tutajtzin Yeshu Mawaltijtuk weli wey wan yawi witz, tesu ken se cuentoj ne inte tejkia asunte ken tachianimet ne tikitztiwit ne iweykayu tejemetsan, ¹⁷ wan kikwij itech Teut tuteku honor wan wey tzitzinakalis kwak mukakik ina se ipal ne sujsul wejkapan wey tzitzinakalis:

¹⁸ Wan tejemet ká tinemituyat itech tik ne tepet ipal Teut tikakket uni tay kiski tik ne ilwikak, ¹⁹ wan tikmatit sujsul yek ne ipalabraj ne taketzani, wan ankichiwat yek su ankikejketzat ken se tawil tajtawia tik se kan kunyua hasta kwak yawi tanesi wan yawi kisa ne Neshtamalani tik ne tuyujyulu.

²⁰ Ini achtu shikmatikan, ka muchi tay muijkwilujtuk, inte aka weli ina isel tay kineki ina, ²¹ ika nian se teutaketzalis kiski niakeman itech takat, asunte ne Ijiutzin kichijki ka tanutzket ne takamet wan inaket tay ne Teut kinekik.