I Corinthios 3:10-15

Biblia Sacra Vulgata

¹⁰ Secundum gratiam Dei, quae data est mihi, ut sapiens architectus fundamentum posui: alius autem superaedificat. Unusquisque autem videat quomodo superaedificet.

¹¹ Fundamentum enim aliud nemo potest ponere praeter id quod positum est, quod est Christus Jesus.

¹² Si quis autem superaedificat super fundamentum hoc, aurum, argentum, lapides pretiosos, ligna, foenum, stipulam,

¹³ uniuscujusque opus manifestum erit: dies enim Domini declarabit, quia in igne revelabitur: et uniuscujusque opus quale sit, ignis probabit.

¹⁴ Si cujus opus manserit quod superaedificavit, mercedem accipiet.

¹⁵ Si cujus opus arserit, detrimentum patietur: ipse autem salvus erit, sic tamen quasi per ignem.