1 इतिहास 6

Awadhi Bible: Easy-to-Read Version

लेवी क सन्तानन

6 लेवी क पूत गेर्सोन, कहात अउ मरारी रहेन।

²कहात क पूत अग्राम, यिसहार, हेब्रोन अउ उज्जीएल रहेन।

³अग्राम क बच्चन हारून, मूसा अउ मरियम रहेन।

हारून क पूत नादाब, अबीहू, एलीआजर अउ ईतामार रहेन। ⁴एलीआजर, पीनहास क बाप रहा। पीनहास, अबीस् क बाप रहा। ⁵अबीस्, बुक्की क बाप रहा। बुक्की उज्जी क बाप रहा। ⁶उज्जी, जरह्याह क बाप रहा। जरह्याह, मरायोत क बाप रहा। ⁷मरायोत, अमार्याह क बाप रहा। अमर्याह, अहीतूब क बाप रहा। ⁸अहीतूब, सादोक क बाप रहा सादोक, अहीमास क बाप रहा। ⁹अहीमास अजर्याह क बाप रहा। अजर्याह, योहानान क बाप रहा। ¹⁰योहानान, अजर्याह क बाप रहा। (अजर्याह उ मनइ रहा जउन यरूसलेम मँ सुलैमान क जरिये बनाए गए मन्दिर मँ याजक क रूप मँ सेवा किहस।) ¹¹अजर्याह, अमर्याह क बाप रहा। अमर्याह अहीतूब क बाप रहा। ¹²अहीतूब, सादोक क बाप रहा। सादोक, सल्लूम क बाप रहा। ¹³सल्लूम, हिलकिय्याह क बाप रहा। हिलकिय्याह, अजर्याह क बाप रहा। ¹⁴अजर्याह, सरायाह क बाप रहा। सरायाह, यहोसादाक क बाप रहा।

¹⁵यहोसादाक तब आपन घर तजइ बरे मजबूर कीन्ह गवा जब यहोवा यहूदा अउ यरूसलेम क लोगन क नबूकदनेस्सर क बन्दी क रूप मँ जिला-वतन मँ पठइ दिहेस।

लेवी क दूसर सन्तानन

¹⁶लेवी क पूत गेर्सोन, कहात अउर मरारी रहेन।

¹⁷गेर्सोन क पूतन क नाउँ लिब्नी अउ सिमी रहेन।

¹⁸कहात क पूत अम्राम, यिसहार, हेब्रोन अउ उज्जजीएल रहेन।

¹⁹मरारी क पूत महली अउर मूसी रहेन।

लेवी क परिवार समूहन क परिवारन क इ सूची अहइ। एनकर सूची ओनके बापन क नाउँ क पहिले राखिके इ अहइ।

²⁰गेर्सोन क सन्तान इ सबइ रहेन: लिब्नी, गेर्सोन क पूत रहा। यहत, लिब्नी क पूत रहा। जिम्मा, यहत क पूत रहा। ²¹योआह, जिम्मा क पूत रहा। इद्दो, योआह क पूत रहा। जेरह, इद्दो क पूत रहा। यातरै जेरह क पूत रहा।

²²इ सबइ कहात क सन्तान रहेन: अम्मीनादाब, कहात क पूत रहा। कोरह, अम्मीनादाब क पूत रहा। अस्सीर, कोरह क पूत रहा। ²³एल्काना, अस्सी क पूत रहा। एब्यासाप, एलकाना क पूत रहा। अस्सीर, एब्यासाप क पूत रहा। ²⁴तहत अस्सीर क पूत रहा। ऊरीएल तहत क पूत रहा। उज्जिय्याह ऊरीएल क पूत रहा। साऊल उज्जिय्याह क पूत रहा।

²⁵एल्काना क पूत अमासै अउ अहीमोत रहेन। ²⁶सोपै, एल्काना क पूत रहा। नहत सोपै क पूत रहा। ²⁷एलीआब, नहत क पूत रहा। यरोहाम, एलीआब क पूत रहा। एल्काना, यरोहाम क पूत रहा। समूएल एल्काना क पूत रहा।

²⁸समूएल क पूतन मँ स सब स बड़का योएल अउ दूसर अबिय्याह रहा। ²⁹मरारी क इ सबइ पूत रहेन: महली, मरारी क पूत रहा। लिब्नी, महली क पूत रहा। सिमी, लिब्नी क पूत रहा: उज्जा, सिमी क पूत रहा। ³⁰सिमा, उज्जा क पूत रहा। हग्गियाह, सिमी क पूत रहा। असायाह, हग्गियाह क पूत रहा।

मन्दिर क गायक

³¹इ सबइ उ सब लोग अहइँ जेनका दाऊद यहोवा क भवन क तम्बू मँ करार क सन्दूक धरे जाइ क पाछे संगीत क प्रबन्ध बरे चुनेस। ³²इ सबइ मनई पवित्तर तम्बू पइ गाइके सेवा करत रहेन। पवित्तर तम्बू क मिलापवाला तम्नू भी कहत हीं अउर एन लोग तब तलक सेवा किहन जब तलक सुलैमान यरूसलेम मँ यहोवा क मन्दिर नाहीं बनाएस। उ पचे अपने काम क बरे दीन्ह गए नेमन क अनुसरण करत भए सेवा किहन।

³³इ सबइ नाउँ ओन मनइयन अउ ओनके पूतन क अहइँ जउन संगीत क जरिये सेवा किहन:

कहाती लोगन क सन्तान रहेन: गायक हेमान। हेमान योएल क पूत रहा। योएल, समूएल क पूत रहा। ³⁴समूएल, एल्काना क पूत रहा। एल्काना, योहाम क पूत हरा। यरोहाम एलीएल क पूत रहा। एलीएल तोह क पूत रहा। ³⁵तोह, सूप क पूत रहा। सूप एल्काना क पूत रहा। एल्काना, महत क पूत रहा। महत अमासै क पूत रहा। ³⁶अमासै, एल्काना क पूत रहा। एल्काना, योएल क पूत रहा। योएल, अजर्याह क पूत रहा। अजर्याह, सपन्याह क पूत रहा। ³⁷सपन्याह, तहत क पूत रहा। तहत, अस्सीर क पूत रहा। अस्सीर, एब्यासाप क पूत रहा। एब्यासाप, कोरह क पूत रहा। ³⁸कोरह, यिसहर क पूत रहा। यिसहार, कहात क पूत रहा। कहात, लेवी क पूत रहा। लेवी, इस्राएल क पूत रहा।

³⁹हेमान क सम्बंधी असाप रहा। असाप हेमान क दाहिनी कइँती खड़े होइके सेवा किहस। असाप बेरेक्याह क पूत रहा। बेरेक्याह सिमा क पूत रहा। ⁴⁰सिमा मीकाएल क पूत रहा। मीकाएल बासेयाह क पूत रहा। बासेयाह मल्किय्याह क पूत रहा। ⁴¹मल्किय्याह एत्नी क पूत रहा। एत्नी जेरह क पूत रहा। जेरह अदायाह क पूत रहा। ⁴²अदायाह एतना क पूत रहा। एतना जिम्मा क पूत रहा। जिम्मा सिमी क पूत रहा। ⁴³सिमी यहत क पूत रहा। यहत गेर्सोन क पूत रहा। गेर्सोन लेवी क पूत रहा।

⁴⁴मरारी क सन्तान हेमान अउ असाप क सम्बंधी रहेन। उ पचे हेमान क बाएँ पच्छ क गायक समूह रहेन। एताव कीसी क पूत रहा। कीसी अब्दी क पूत रहा। अब्दी मल्लूक क पूत रहा। ⁴⁵मल्लूक हसब्याह क पूत रहा। हसब्याह अमस्याह क पूत रहा। अमस्याह हिलकय्याह क पूत रहा। ⁴⁶हिलकिय्याह अमसी क पूत रहा। अमसी बानी क पूत रहा। बानी सेमेर क पूत रहा। ⁴⁷सेमेर महली क पूत रहा। महली मूसी क पूत रहा। मूसी मरारी क पूत रहा। मरारी लेवी क पूत रहा।

⁴⁸हेमान अउ आसाप क भाई लेवी क परिवार समूह स रहेन। लेवी क परिवार समूह क लोग “लेवी बंसी” भी कहे जात रहेन। लेवीय पवित्तर तम्बू मँ करइबरे चुने जात रहेन। पवित्तर तम्बू परमेस्सर क घर रहा। ⁴⁹किन्तु सिरिफ हारून क सन्तानन क होमबलि क वेदी अउर धूप क वेदी पइ होमबलि अउर अउ धूपबलि चढ़ावइ क अनुमति रही। हारून क सन्तान परमेस्सर क घर मँ सब स जियादा पवित्तर स्थान मँ सारा काम करत रहेन। उ पचे इस्राएल क लोगन बरे प्रायस्चित क काम भी करत रहेन। उ पचे ओन सब नेमन अउ विधियन क अनुसरण करत रहेन जेनके बरे परमेस्सर क सेवक मूसा आदेस दिहे रहा।

हारून क सन्तान

⁵⁰हारून क पूत इ सबइ रहेन: एलीआज़र हारून क पूत रहा। पीनहास एलीआज़र क पूत रहा। अबीसू पीनहास क पूत रहा। बुक्की अबीसू क पूत रहा। उज्जी बुक्की क पूत रहा। ⁵¹बुक्की अबीसू क पूत रहा। उज्जी बुक्की क पूत रहा। जरह्याह उज्जी क पूत रहा। ⁵²मरायोत जरह्याह क पूत रहा। अमयीह मरायोत क पूत रहा। अहीतूब अमर्याह क पूत रहा। ⁵³सादोक अहीतूब क पूत रहा। अहीमास सादोक क पूत रहा।

लेवीवंसी परिवारन क बरे घर

⁵⁴इ सबइ उ सब जगहिया अहइँ जहाँ हारून क सन्तानन रहिन। उ पचे उ भुइँया पइ जउन ओनका दीन्ह गइ रही अपने उपनिवेसन मँ रहत रहेन। कहाती परिवारन उ भुइँया क पहिला भाग पाएस जउन लेवीवंस क दीन्ह गइ रही। ⁵⁵ओनका हेब्रोन नगर अउ ओकरे चारिहुँ कइँती क खेत दीन्ह ग रहेन। इ यहूदा पहँटा म रहा। ⁵⁶किन्तु हेब्रोन क नजिक क गाँवअन अउ दूर क खेतन, यपुन्ने क पूत कालेब क दीन्ह ग रहेन। ⁵⁷हारून क सन्तानन क हेब्रोन नगर दीन्ह गवा रहा। हेब्रोन क सुरच्छा नगर रहा। ओनके लिब्ना, यत्तीर, एसतमो, ⁵⁸हीलेन, दबीर, ⁵⁹आसान, जुत्ता, अउ बेतसेमेस नगर भी दीन्ह गएन। उ पचे ओन सबहिं नगरन अउर ओनके चारिहुँ कइँती क खेत प्राप्त किहन। ⁶⁰बिन्यामीन क परिवार समूह क लोगन क गिबोन, गेबा अउ अल्लेमेत अउर अनानोत नगरन दीन्ह गएन। उ पचे ओन सबहिं नगरन अउर ओनके चारिहुँ ओर क खेतन क प्राप्त किहन।

कहाती परिवार क तेरह नगर दीन्ह गएन।

⁶¹बाकी कहात क सन्तानन मनस्से परिवार समूह क आधे स दस नगर प्राप्त किहन।

⁶²गेर्सेम क सन्तानन क परिवार समूह तेरह नगर प्राप्त किहन। उ पचे ओन नगरन क इस्साकार, आसेर, नप्ताली अउर बासान छेत्र मँ रहइवाले मनस्से क एक हींसा स प्राप्त किहन।

⁶³मरारी क सन्तानन क परिवार समूह बारह नगर प्राप्त किहन। उ पचे ओन नगरन क रूबेन, गाद, अउर जबूलून क परिवार समूहन स प्राप्त किहन। उ पचे नगरन क गोटन डाइके प्राप्त किहन।

⁶⁴इ तरह इस्राएली लोग ओन नगरन अउ खेतन क लेवीबंसन क लोगन क दिहन। ⁶⁵उ पचे सबहिं नगर, यहूदा, सिमोन अउर बिन्यामीन क परिवार समूहन स मिलेन। उ पचे गोटन डाइके इ निहचइ किहन कि कउन सा नगर परिवार लेवी क कउन सा परिवार प्राप्त करी।

⁶⁶एप्रैम क परिवार समूह कछू कहाती परिवारन क कछू नगर दिहन। उ सबइ नगर गोटन डाइके चुने गएन। ⁶⁷ओनका साकेम नगर दीन्ह गवा। साकेम सुरच्छ नगर अहइ। ओनका गेजेर ⁶⁸योकमान, बेथोरेन, ⁶⁹अय्यालोन, अउर गत्रिम्मोन भी प्राप्त किहन। उ पचे ओन नगरन क संग क खेत भी पाएन। उ पचे एप्रैम नगर क पहाड़ी प्रदेस मँ रहेन। ⁷⁰अउर इस्राएली लोग, मनस्से परिवार समूह क आधे स, आनेर अउ बिलाम नगरन क कहाती परिवारन क दिहन। ओन कहाती परिवारन ओन नगरन क संग खेतन क भी प्राप्त किहन।

दूसर लेवीबंसी परिवारन घर प्राप्त किहन

⁷¹गेर्सेमी परिवारन मनस्से परिवार समूह क आधे स, बासान अउ अस्तारोत छेत्रन मँ गोलान क नगरन क प्राप्त किहन। उ पचे ओन नगरन क लगे क खेत भी पाएन।

^72-73गेर्सेमी परिवार केदसे, दाबरात, रामोत अउर गानेम नगरन क आसेर परिवार समूह स प्राप्त किहन। उ पचे ओन नगरन क लगे क खेतन भी प्राप्त किहन।

^74-75गेर्सेमी परिवार मसाल, अब्दोन, हूकोक अउर रहोब क नगरन क आसेर परिवार समूह स प्राप्त किहस। उ पचे ओन नगरन क लगे क खेतनभी प्राप्त किहन।

⁷⁶गेर्सोमी परिवार गालील मँ केदेस, हम्मोन अउर किर्यातेम नगरन क भी नप्ताली क परिवार समूह स प्राप्त किहस। उ पचे ओन नगरन क लगे क खेतन भी प्राप्त किहन।

⁷⁷लेवीबंसी लोगन मँ स बाकी मरारी परिवार क अहइँ। उ पचे जेक्रयम, कर्ता, सिम्मोन अउ ताबोर नगरन क जबूलून परिवार समूह स प्राप्त किहन। उ पचे ओन नगरन क लगे क खेत भी प्राप्त किहन।

^78-79मरारी परिवार रेगिस्ताने मँ बेसेर क नगरन, यहसा, कदेमोत, अउ मेपाता क भी रूबेन क परिवार समूह स प्राप्त किहन। रूबेन क परिवार समूह यरदन नदी क पूरब कइँती यरीहो नगर क पूरब मँ रहत रहा। एन मरारी परिवारन नगर क लगे क खेत भी पाएन।

^80-81मरारी परिवार गिलाद मँ रामोत, महनैम, हेसोबोन अउर याजेर नगरन क गाद क परिवार समूह स प्राप्त किहन। उ पचे ओन नगरन क लगे क खेत भी प्राप्त किहन।

Awadhi Bible: Easy-to-Read Version (ERV-AWA)