2 Nguni't magsalita ka ng mga bagay na nauukol sa aral na ^(A)magaling:

² Na ang matatandang lalake ay maging mapagpigil, ^(B)mahusay, mahinahon ang pagiisip, ^(C)magagaling sa ^(D)pananampalataya, sa pagibig, sa pagtitiis:

³ Na gayon din ang matatandang babae ^(E)ay maging magalang sa kanilang kilos, hindi palabintangin ni paalipin man sa maraming alak, mga guro ng kabutihan;

⁴ Upang kanilang maturuan ang mga babaing may kabataan na ^(F)magsiibig sa kanikaniyang asawa, magsiibig sa kanilang mga anak, mangagpakahinahon,

⁵ Mangagpakahinahon, mangagpakalinis, mangagpakasipag sa bahay, magagandang-loob, pasakop sa kanikaniyang asawa, upang huwag lapastanganin ang ^(G)salita ng Dios:

⁶ Iaral mo rin naman sa mga bagong tao na sila'y mangagpakahinahon ng pagiisip:

⁷ Sa lahat ng mga bagay ay magpakilala kang ikaw ay isang uliran sa mabubuting gawa; at sa iyong aral ay ipakilala mo ang walang kamalian ang kahusayan,

⁸ Pangungusap na magaling, ^(H)na di mahahatulan; ^(I)upang sila na nasa kabilang panig ay mahiya, nang walang anomang masamang masabi tungkol sa atin.

⁹ Iaral mo sa mga ^(J)alipin na sila'y pasakop sa kanikaniyang Panginoon, at kanilang kalugdan sa lahat ng mga bagay; at huwag mga masagutin;

¹⁰ Huwag mangagdaya, kundi mangagpakita ng buong buting pagtatapat; upang pamutihan sa lahat ng mga bagay ^(K)ang aral ng Dios na ^(L)ating Tagapagligtas.

¹¹ Sapagka't napakita ang biyaya ng Dios, na may dalang kaligtasan sa lahat ng mga tao,

¹² Na nagtuturo sa atin, upang, pagtanggi natin sa kalikuan ^(M)at sa mga kahalayan ng sanglibutan, ay marapat mabuhay tayong may pagpipigil at matuwid at banal sa panahong kasalukuyan ng sanglibutan ito;

¹³ Na hintayin yaong ^(N)mapalad na pagasa at ang pagpapakita ng ^(O)kaluwalhatian ng ating dakilang Dios at Tagapagligtas na si Jesucristo;

¹⁴ Na siyang ^(P)nagbigay ng kaniyang sarili dahil sa atin, ^(Q)upang tayo'y matubos niya sa lahat ng mga kasamaan, at malinis niya sa kaniyang sarili ^(R)ang bayang masikap sa mabubuting gawa, upang maging kaniyang sariling pagaari.

¹⁵ Ang mga bagay na ito ay iyong salitain at iaral at isaway ng buong kapangyarihan. ^(S)Sinoman ay huwag humamak sa iyo.

Ang Mahusay na Aral

2 Ngunit ikaw naman, magsalita ka ng mga bagay na angkop sa mahusay na aral.

² Ang matatandang lalaki ay dapat maging mapagpigil sa sarili, kagalang-galang, matino, malakas sa pananampalataya, sa pag-ibig, at sa pagtitiis.

³ Sabihan mo rin ang matatandang babae na maging magalang sa kanilang asal, hindi mapanirang-puri, ni paalipin man sa alak; dapat silang magturo ng kabutihan,

⁴ upang kanilang maturuan ang mga kabataang babae na ibigin ang kani-kanilang mga asawa, ibigin ang kanilang mga anak,

⁵ maging matino, dalisay, masipag sa gawaing bahay, mabait, na nagpapasakop sa kani-kanilang asawa, upang huwag lapastanganin ang salita ng Diyos.

⁶ Gayundin naman, himukin mo ang mga kabataang lalaki na maging matino sa pag-iisip.

⁷ Sa lahat ng mga bagay ay ipakita mo ang iyong sarili na isang uliran sa mabubuting gawa; at sa iyong pagtuturo ay magpakita ka ng katapatan, pagiging kagalang-galang,

⁸ wastong pananalita na hindi mapipintasan, upang ang kalaban ay mapahiya, na walang anumang masamang masasabi tungkol sa atin.

⁹ Ang mga alipin ay magpasakop sa kanilang mga panginoon at magbigay ng kasiyahan sa lahat ng mga bagay, at huwag maging palasagot,

¹⁰ ni huwag mangungupit, kundi magpakita ng lubos at tunay na katapatan, upang sa lahat ng bagay ay mapalamutian nila ang aral ng Diyos na ating Tagapagligtas.

¹¹ Sapagkat nagpakita ang biyaya ng Diyos, na nagdadala ng kaligtasan sa lahat ng tao,

¹² na nagtuturo sa atin na matapos itakuwil ang kasamaan, at mga makamundong pagnanasa, ay dapat tayong mamuhay nang may katinuan, matuwid at banal sa kasalukuyang panahon,

¹³ habang hinihintay natin ang mapalad na pag-asa at ang pagpapakita ng kaluwalhatian ng ating dakilang Diyos at Tagapagligtas na si Jesu-Cristo.

¹⁴ Siya^(A) ang nagbigay ng kanyang sarili alang-alang sa atin, upang tayo'y matubos niya sa lahat ng mga kasamaan, at pakalinisin para sa kanyang sarili ang sambayanang pag-aari niya na masigasig sa mabubuting gawa.

¹⁵ Ipahayag mo ang mga bagay na ito. Mangaral ka at sumaway na may buong kapamahalaan. Huwag mong hayaang hamakin ka ng sinuman.