Ẹkun Jeremiah 4

Bíbélì Mímọ́ Yorùbá Òde Òn

4 Báwo ni wúrà ṣe sọ ògo dídán rẹ̀ nù,
    wúrà dídára di àìdán!
Òkúta ibi mímọ́ wá túká
    sí oríta gbogbo òpópó.

² Báwo ni àwọn ọ̀dọ́mọkùnrin Sioni tí ó ṣe iyebíye,
    tí wọ́n fi wúrà dídára ṣe
wá dàbí ìkòkò amọ̀ lásán
    iṣẹ́ ọwọ́ amọ̀kòkò!

³ Àwọn ajáko pèsè ọmú wọn
    fún ìtọ́jú àwọn ọmọ wọn,
ṣùgbọ́n àwọn ènìyàn mi wá láì lọ́kàn
    bí ògòǹgò ní aginjù.

⁴ Nítorí òǹgbẹ, ahọ́n àwọn ọmọ ọwọ́
    lẹ̀ mọ́ òkè ẹnu wọn;
àwọn ọmọdé bẹ̀bẹ̀ fún oúnjẹ
    Ṣùgbọ́n kò sí ẹni tí ó fi fún wọn.

⁵ Àwọn tí ó ń jẹ ohun dáradára
    di òtòṣì ní òpópó.
Àwọn tí a fi aṣọ dáradára wọ̀
    ni wọ́n sùn ní orí òkìtì eérú.

⁶ Ìjìyà àwọn ènìyàn mi
    tóbi ju ti Sodomu lọ,
tí a sí ní ipò ní òjijì
    láìsí ọwọ́ láti ràn án lọ́wọ́.

⁷ Ọmọ ọba ọkùnrin wọn mọ́ ju òjò-dídì,
    wọ́n sì funfun ju wàrà lọ
wọ́n ni ìtọ́jú bí iyùn pupa,
    ìrísí wọn dàbí safire.

⁸ Ṣùgbọ́n nísinsin yìí wọ́n dúdú ju èédú;
    wọn kò sì dá wọn mọ̀ ní òpópó.
Ara wọn hun mọ́ egungun;
    ó sì gbẹ bí igi gbígbẹ.

⁹ Àwọn tí ó kù nípasẹ̀ idà sàn
    ju àwọn tí ìyàn pa;
tí ó wọ àkísà ebi, tí ó ń ṣòfò
    fún àìní oúnjẹ láti inú pápá.

¹⁰ Pẹ̀lú ọwọ́ àwọn obìnrin aláàánú
    ni wọ́n ṣe ọmọ wọn jẹ
tí ó di oúnjẹ fún wọn
    nígbà tí a pa àwọn ènìyàn mi run.

¹¹ Olúwa ti fi ihò kíkún fún ìbínú rẹ̀;
    ó sì tú ìbínú gbígbóná rẹ̀ jáde.
Ó da iná ní Sioni
    tí ó jó ìpìlẹ̀ rẹ̀ run.

¹² Àwọn ọba ayé kò gbàgbọ́,
    tàbí àwọn ènìyàn ayé,
wí pé àwọn ọ̀tá àti aninilára le wọ
    odi ìlú Jerusalẹmu.

¹³ Èyí ṣẹlẹ̀ nítorí ẹ̀ṣẹ̀ àwọn wòlíì
    àti àìṣedéédéé àwọn olórí àlùfáà,
tí ó ta ẹ̀jẹ̀ àwọn olódodo
    sílẹ̀ láàrín rẹ̀.

¹⁴ Nísinsin yìí wọ́n ń rìn kiri ní òpópó
    bí ọkùnrin tí ó fọ́jú.
Ẹ̀jẹ̀ ara wọn sọ wọ́n di àbàwọ́n
    tí kò sẹ́ni tó láyà láti fọwọ́ kan aṣọ wọn.

¹⁵ “Lọ kúrò! Ẹ̀yin di aláìmọ́!” ni àwọn ènìyàn ń kígbe sí wọn.
    “Ẹ lọ! Ẹ lọ! Ẹ má ṣe fọwọ́ kàn wá!”
Àwọn ènìyàn láàrín orílẹ̀-èdè wí pé,
    “Wọn kì yóò tẹ̀dó síbí mọ́.”

¹⁶ Olúwa ti tú wọn ká fúnrarẹ̀;
    kò sí bojútó wọn mọ́.
Kò sí ọ̀wọ̀ fún olórí àlùfáà mọ́,
    àti àánú fún àwọn àgbàgbà.

¹⁷ Síwájú sí i, ojú wa kùnà
    fún wíwo ìrànlọ́wọ́ asán;
láti orí ìṣọ́ wa ni à ń wò
    fún orílẹ̀-èdè tí kò le gbà wá là.

¹⁸ Wọ́n ń ṣọ́ wa kiri,
    àwa kò sì le rìn ní òpópó wa mọ́.
Òpin wa ti súnmọ́, ọjọ́ wa sì níye
    nítorí òpin wa ti dé.

¹⁹ Àwọn tí ń lé wa yára
    ju idì ojú ọ̀run lọ;
wọ́n lé wa ní gbogbo orí òkè
    wọ́n sì gẹ̀gùn dè wá ní aginjù.

²⁰ Ẹni ààmì òróró Olúwa, èémí ìyè wa,
    ni wọ́n fi tàkúté wọn mú.
Àwa rò pé lábẹ́ òjìji rẹ̀
    ni àwa yóò máa gbé láàrín orílẹ̀-èdè gbogbo.

²¹ Ẹ yọ̀ kí inú yín sì dùn, ẹ̀yin ọmọbìnrin Edomu,
    ẹ̀yin tó ń gbé ní ilẹ̀ Usi.
Ṣùgbọ́n, a ó gbé ago náà kọjá sọ́dọ̀ rẹ pẹ̀lú;
    ìwọ yóò yó bí ọ̀mùtí, ìwọ yóò sì rìn ní ìhòhò.

²² Ìwọ ọmọbìnrin Sioni, ìjìyà rẹ yóò dópin;
    kò ní mú ìgbèkùn rẹ pẹ́ mọ́.
Ṣùgbọ́n, ìwọ ọmọbìnrin Edomu, yóò jẹ ẹ̀ṣẹ̀ rẹ ní yà
    yóò sì fi àìṣedéédéé rẹ hàn kedere.