विलापगीत 5

Awadhi Bible: Easy-to-Read Version

5 हे यहोवा, हमरे संग जउन घटा ह ओका याद राखा।
    हे यहोवा, हमरे तिरस्कार क लखा।
² हमार धरती परायन क हाथन मँ दइ दीन्ह गइ।
    हमार घर परदेसियन क हाथन मँ दीन्ह गएन।
³ हम अनाथ होइ गएन।
    हमार कउनो पिता नाहीं।
    हमार महतरियन विधवा स होइ गइन ह।
⁴ पानी पिअइ तलक हमका मोल देब पड़त ह,
    ईधन क लकड़ी तलक बेसहब पड़त ह।
⁵ आपन काँधन पइ हमका जुए क बोझा उठाउब पड़त ह।
    हम थकिके चूर होत ह किन्तु अराम तनिकउ हमका नाहीं मिलत।
⁶ हम पचन्क मिस्र अउर अस्सुर स खइया लेइ होब्या
    काहेकि हम पचन्क लगे खइया नाहीं अहइ।
⁷ हमार पुरखन तोहरे खिलाफ मँ पाप किहे रहेन। आजु उ पचे मर चुका अहइँ।
    किन्तु ओनका बदले मँ हम पचन विपत्तयन भोगत अहइँ।
⁸ हमार दास हो सुआमी बना अहइँ।
    हिआँ कउनो अइसा मनई नाहीं जउन हमका ओनसे बचाइ लेइ।
⁹ बस भोजन पावइ क हमका आपन जिन्नगी दाँव पइ लगावइ पड़त ह।
    रेगिस्तान मँ अइसे लोगन क कारण, जेनके लगे तरवार अहइ हमका आपन जिन्नगी दाँव पइ लगाउब पड़त ह।
¹⁰ हमार खाल तन्दूर सी तपत अहइ,
    हमार खाल तपत रही उ भूख क कारण जउन हमका लगी ह।
¹¹ सिय्योन क मेहररुअन क संग कुकर्म कीन्ह गवा ह।
    यहुदा क नगरियन क कुँवरियन क संग कुकर्म कीन्ह गवा अहइँ।
¹² हमार राज कुमार फाँसी पइ चढ़ावा गएन,
    उ पचे हमरे अग्रजन क आदर नाहीं किहन।
¹³ हमार दुस्मनन हमरे नउजवान मनसेधुअन स चक्की मँ आटा पिसवाएन।
    हमार नउजवान मनसेधुअन काठे क बोझ तरे ठोकर खाएन।
¹⁴ हमार बुजुर्गन अब नगर क दुआरन पइ बइठा नाहीं करतेन।
    हमार युवक अब संगीत मँ हींसा नाहीं लेतेन।
¹⁵ हमरे मने मँ अब कउनो खुसी नाहीं अहइ।
    हमार खुसी मरे भए लोगन क विलाप मँ बदल गवा अहइ।
¹⁶ हमार महिमा अउर हमरार मान संमान खतम होइ गवा अहइ।
    हम पचन्क सज़ा दीन्ह गएन ह।
¹⁷ एह बरे हमार मन रोगी भए हँ,
    एन ही बातन स हमार आँखिन मधिम भई हँ।
¹⁸ सिय्योन क पहाड़ वीरान होइ गवा ह।
    सिय्योन क पहाड़े पइ अब सियार घूमत हीं।
¹⁹ किन्तु हे यहोवा, तोहार राज्ज तउ अमर अहइ।
    तोहार महिमा स पूर सिंहासन सदा-सदा बना रहत ह।
²⁰ हे यहोवा, तू हम पचन्क क सदा बरे काहे भूला देब्या?
    तू हम पचन्क क अकेल्ला लम्बे समइ बरे काहे तजि देब्या?
²¹ हे यहोवा, हम लोगन क तू अपनी कइँती वापिस ल्या,
    अउर हम लोग लउटि आउब।
    हमार दिन फेर द्या जइसे उ पहिले रहेन।
²² का तू हम लोगन क पूरी तरह नकार दिहा ह?
    तू हम लोगन स बहोत कोहान रहा ह।