यिर्मयाह 2

Awadhi Bible: Easy-to-Read Version

⁴ याकूब क परिवार, यहोवा क सँदेसा सुना।
    इस्राएल क तू सबहिं परिवार समूहों, सँदेसा सुना।

⁵ जउन यहोवा कहत ह, उ इ अहइ:
“तोहार पुरखन बरे मइँ का गलत किहउँ
    कि तोहार पुरखन मोहसे दूर होइ गएन?
तोहार पुरखन निरर्थक देव मूरतियन पूजेन।
    अउर उ पचे खुद निरर्थक होइ गएन।
⁶ तोहार पुरखन इ नाहीं कहेन,
    ‘यहोवा हमका मिस्र स निकारेस।
यहोवा मरूभूमि मँ हमार अगुअइँ किहेस।
    यहोवा हमका झुरान चट्टानी प्रदेस स लइके आवा,
यहोवा हमका अँधियारा स पूर अउर भय से भरे देसन मँ राह देखाएस।
    कउनो भी लोग हुआँ नाहीं रहतेन।
    कउनो भी लोग उ देस स जात्रा नाहीं करतेन।
मुला यहोवा उ प्रदेस मँ हमार अगुवाई किहेस।
    एह बरे उ यहोवा अब कहाँ अहइ?’”

⁷ यहोवा कहत ह, “मइँ तू पचन्क अनेक चिजियन स भरे उत्तिम देस मँ लाएउँ।
    मइँ इ किहेउँ जेहसे तू हुआँ उगे भए फल
अउर पइदावार क खाइ सका।
    मुला तू पचे आया अउर मोरे देस क ‘गन्दा’ किहा।
मइँ उ देस तू पचन्क दिहे रहेउँ,
    किन्तु तू पचे ओका बुरा ठउर बनाया।

⁸ “याजक लोग नाहीं पूछेन,
    ‘यहोवा कहाँ अहइ?’
उ लोग जउन व्यवस्था क सिच्छा देत ह उहइ मोका नाहीं जानत ह।
    इस्राएल क लोगन क प्रमुख मोरे खिलाफ चला गएन।
नबी लोग लबार बाल देवता क नाउँ भविस्सवाणी किहन।
    उ पचे निरर्थक देव मूरतियन क पूजा किहन।”

⁹ यहोवा कहत ह, “एह बरे मइँ तू पचन्क फुन दोखी करार देब,
    अउर तोहरे पचन्क पोतन क दोखी ठहराउब।
¹⁰ समुद्दर पार कित्तियन क द्वीपन क जा
    अउर लखा कउनो क केदार प्रदेसन क पठवा
अउर ओका धियान स लखइ द्या।
    धियान स लखा का कउनो अइसा काम किहेस:
¹¹ का कउनो रास्ट्र क लोग कबहुँ
    आपन पुरान देवतन क नवा देवतन स बदेलन ह? नाहीं।
    नि:संदेह ओनकर देवतन
असल मँ देवतन अहइँ ही नाहीं।
    मुला मोर लोग आपन यसस्वी परमेस्सर क निरर्थक देव मूरतियन स बदलेन ह।

¹² “आकास, जउन भवा ह ओहसे अपने हिरदइ क आघात पहोंचइ द्या।
    भय स काँप उठा।”
    इ सँदेसा यहोवा क रहा।
¹³ मोर लोग दुइ पाप किहेन ह।
    उ पचे मोका तजि दिहन (मइँ ताजा पानी क सोता अहउँ।)
    अउर उ पचे आपन पानी क निजी हौद खनेन ह, (उ पचे दूसर देवतन क भवत बनेन ह।)
किन्तु ओनकर हउज टूटेन ह।
    ओन हउजन मँ पानी नाहीं रुकी।

¹⁴ “का इस्राएल क लोग दास होइ गएन ह?
    का उ पचे एक जन्मजात दास स होइ गएन ह?
    इस्राएल क लोग क सम्पत्ति दूसर लोग काहे लइ लिहेन?
¹⁵ जवान सिंह (दुस्मन) इस्राएल रास्ट्र पइ दहाड़त हीं, गुर्रार्त्त हीं।
    सिंहन इस्राएल क लोगन क देस उजाड़ दिहेन ह।
इस्राएल क नगर बार दीन्ह गएन ह।
    ओनमाँ कउनो भी नाहीं रहि गवा ह।
¹⁶ नोप अउर तहपन्हेस नगर क लोग
    तू पचन्क मूँड़े क सीर्स क कुचरि दिहेन ह।
¹⁷ इ परेसानी तोहार पचन्क आपन दोख क कारण अहइ।
    तू पचे आपन यहोवा परमेस्सर स विमुख होइ गया,
    जबकि उ सही दिसा मँ तू पचन्क लइ जात रहा।
¹⁸ एकरे बारे मँ सोचा: का तू मिस्र जाइ समइ मँ सहायता पाएहस?
    का तू पानी पिअइ बरे नील नदी गएहस? नाहीं।
    क तू अस्सूर जाइ समइ मँ सहायता पाएस? का तू परात नदी क जल पिअइ बरे गएस? नाहीं।
¹⁹ तू पचे बुरे करम किहा,
    अउर उ सबइ बुरी चिजियन तू पचन्क सिरिफ सजा देवइहीं।
बिपदन तू पचन्पइ टूटि पड़िहीं
    अउर इ सबइ बिपदन तू पचन्क पाठ पढ़इहीं।
इ विसय मँ सोचा; तब तू पचे इ समुझब्या कि आपन परमेस्सर स बिमुख होइ जाब केतना बुरा अहइ।
    मोहसे न डेराब बुरा अहइ।”
    इ सँदेसा मोर सुआमी सर्वसक्तीमान यहोवा क रहा।
²⁰ “तू बहोत पहिले आपन जुआ लोकाइ दिहे रह्या।
    तू उ रस्सियन तोड़ पेंक्या जेका मइँ तू पचन्क अपने लगे धरइ मँ काम मँ लिआवत रह्या।
    तू मोहसे कह्या, ‘मइँ आप क सेवा नाहीं करब।’
तू रंडी क नाई हर एक ऊँची पहाड़ी पइ
    अउर हर एक हरियर बृच्छ क नीचे झुटे देवतन क उपासना कइ के तू बेवफाइ किहा।
²¹ मइँ तू पचन्क बिसेस अंगूरे क बेल क तरह रोपेउँ।
    तू सबहिं नीक बिया क समान रह्या।
तू उ अलग बेल मँ कइसे बदल्या
    जउन बुरा फल देत हीं।
²² अगर तू आपन क सज्जी^[a] स भी धोवा,
    बहोत साबुन भी लगावा,
तउ भी मइँ तोहरे दोख क दागे क लख सकत हउँ।”
    इ सदेस परमेस्सर यहोवा क रहा।
²³ “तू मोका कइसे कहि सकत ह,
    ‘मइँ अपराधी नाहीं अहउँ।
मइँ बाल क मूरतियन क पूजा नाहीं किहेउँ?’
    ओन कामन क बारे मँ सोचा जेनका तू घाटी मँ किहा।
उ बारे मँ सोचा, तू का कइ डाया ह।
    तू उ तेज ऊँटिन क नाई अहा जउन कि टेढ़ा-मेढ़ा रास्ता पइ तेज दउड़त ह।
²⁴ तू उ जंगली गदही क तरह अहा जउन रेगिस्तान मँ रहत ह
    अउर सहभोग क मौसम मँ जउन हवा क सूँधत ह गन्ध लेत ह।
    कउनो मनई ओका काम क उत्तेजना क समइ लउटाइके लिआइ नाहीं सकत।
सहभोग क समइ हर एक गद्धा जउन ओका चाहत ह, पाइ सकत ह।
    ओका खोज निकारब सहल अहइ।
²⁵ देवमूरतियन क पाछे दउड़ब बन्द करा।
    ओन दूसर देवतन बरे पियास रखाइ बंद करा।
मुला तू कहत अहा, ‘इ बियर्थ अहइ।
    मइँ तजि नाहीं सकत।
    मइँ ओन दूसर देवतन स पिरेम करत हउँ।
    मइँ ओनकर पूजा करइ चाहत हउँ।’

²⁶ “चोर लजात ह जब ओका लोग धइ लेत हीं।
    उहइ तरह इस्राएल क परिवार लजात ह।
राजा अउर प्रमुख याजक
    अउ नबी लजान अहइँ।
²⁷ उ पचे लोग काठे क टूकन स बात करत हीं,
    उ पचे कहत हीं, ‘तू मोर पिता अहा।’
उ सबइ लोग चट्टान स बात करत हीं,
    उ पचे कहत हीं, ‘तू मोका जन्म दिहा ह।’
उ पचे सबहिं लोग लजाइ जइहीं।
    उ पचे लोग मोरी कइँती धियान नाहीं देतेन।
    उ पचे मोहसे पीठ फेरि लिहन ह।
किन्तु जब ओन लोगन पइ बिपद आवत ह तब उ पचे मोहसे कहत हीं,
    ‘आवा अउर हमका बचावा।’
²⁸ ओन देवमूरतियन क आवइ अउर तोहका बचावइ द्या।
    उ सबइ देवमूरतियन कहाँ अहइँ जेनका तू अपने बरे बनाया ह? हमका लखइ द्या,
का उ सबइ मूरतियन आवत हीं अउर तोहार रच्छा बिपत्ति स करत हीं?
    यहूदा क लोगो, तू लोगोन क लगे ओतनी मूरतियन अहइँ जेतना नगर।

²⁹ “तू पचे मोहसे बिबाद काहे करत अहा?
    तू सबहिं मोरे खिलाफ होइ गवा अहा।”
    इ सँदेसा यहोवा क रहा।
³⁰ “मइँ तोहरे गदेलन क दण्ड दिहेउँ,
    मुला एकर कउनो नतीजा नाहीं निकरा।
तू पचे तब लउटिके नाहीं आया
    जब दण्डित कीन्ह गया।
तू पचे ओन नबियन क तरवार क घाट उतार्या जउन तोहरे पचन्क लगे आए रहेन।
    तू पचे खूखार सिंह क नाईँ रह्या अउर तू पचे नबियन क मार डाया।”
³¹ इ पीढ़ी क लोगो,
    यहोवा क सँदेसा पइ धियान द्या:

“का मइँ इस्राएल क लोगन बरे रेगिस्तान जइसा बन गएउँ?
    का मइँ ओनका बरे अँधियर अउर खउफनाक देस जइसा बन गएउँ?
मोर लोग कहत हीं, ‘हम आपन राह जाइ क अजाद अही,
    यहोवा, हम फुन तोहरे लगे नाहीं लउटब।’
    उ पचे ओन बातन क काहे कहत हीं?
³² का कउनो नउजवान अउरत आपन गहना बिसरत ह? नाहीं।
    का कउनो दुलहिन आपन रूप-संगार क लिबास बरे
आपन दुपटा बिसरि जात ह? नाहीं।
    मुला मोर लोग मोका अनगिनत दिनन बरे बिसरि गएन ह।

³³ “तू फुरइ पिरेमियन (लबार देवतन) क पाछे पड़ब जानत अहा।
    तू ओन दूसर लोगन बरे जउन बुरा करम करत ह नमुना बन गवा ह।
³⁴ तोहार पचन्क हाथ खून स रगां अहइँ।
    इ गरीब अउ भोले लोगन क खून अहइ।
तू पचे लोगन्क मार्या ह अउर उ पचे अइसे चोर भी नाहीं रहेन जेनका तू पचे धर्या ह।
    तू पचे उ सबइ बुरे काम करत अहा।
³⁵ किन्तु तू पचे फुन भी कहत रहत अहा, ‘हम निरपराध अही।
    परमेस्सर मोहे पइ कोहान नाहीं अहइ।’
एह बरे मइँ तू पचन्क झूठ बोलइवाला अपराधी होइ क भी निर्णय देब।
    काहेकि तू कहत बाट्या, ‘मइँ कछू भी बुरा नाहीं किहेउँ ह।’
³⁶ तोहरे पचन्क बरे इरादा क बदलब बहोत आसान अहइ।
    अस्सूर तू पचन्क निरास किहस।
एह बरे तू पचे अस्सूर क तज्या अउर मदद बरे मिस्र पहोंच्या।
    मिस्र तू पचन्क निरास करी।
³⁷ अइसा होइ कि तू पचे मिस्र भी तजब्या
    अउ तू पचन्क हाथ लज्जा स तोहार पचन्क आँखिन होइहीं।
मुला तू पचन्क ओन देसन स कउनो कामयाबी नाहीं मिली।
    काहेकि यहोवा ओन देसन्क
    अस्वीकार कइ दिहस ह।