यहेजकेल 19

Awadhi Bible: Easy-to-Read Version

⁴ “‘लोगन ओका गरजत सुनेन
    अउर उ पचे ओका आपन जालि मँ फँसाइ लिहस।
उ पचे ओकरे मुँहे मँ नकेल डाएन
    अउर जवान सिंह क मिस्र लइ गएन।

⁵ “‘सिंह महतारी क आसा रही कि सिंह बच्चा प्रमुख बनी।
    किन्तु अब ओकर सारी आसा लुप्त होइ गइन।
एह बरे आपन बच्चन मँ स उ एक दूसर क लिहस।
    ओका उ सिंह होइ क प्रसिच्छण दिहस।
⁶ उ जवान सिंहन क संग सिकार क निकरा।
    उ एक ठु बलवान जवान सिंह बना।
उ आपन भोजन क धरब सीखेस।
    उ एक ठु मनई क मारेस अउर ओका खाएस।
⁷ उ महलन पइ हमला किहस।
    उ नगरन क बर्बाद किहस।
उ देस क हर एक मनई तब भय स अवाक होत रहा।
    जब उ ओकर गरजत सुनत रहा।
⁸ तब ओकरे चारिहुँ कइँती रहइवाले लोग ओकरे बरे जालि बिछाएन
    अउर उ पचे ओका आपन जालि मँ फँसाइ लिहन।
⁹ उ पचे ओह पइ नकेल लगाएन अउर ओका बंद कइ दिहन।
    उ पचे ओका अपने जालि मँ बंद रखेन।
    इ तरह ओका उ पचे बाबुल क राजा क लगे लइ गएन।
अब, तू पचे इस्राएल क पर्वतन पइ
    ओकर गरजब सुन नाहीं सकत्या।

¹⁰ “‘तोहार पचन्क महतारी एक ठु अंगूरे क बेल जइसी रही,
    जेका पानी क लगे बोवा गवा रहा।
ओकरे पास काफी पानी रहा,
    एह बरे उ अनेक सक्तीसाली बेलन पइदा किहस।
¹¹ तब उ एक बड़की डार पइदा किहस,
    उ डार टहरइ क छड़ी जइसी रही।
    उ डार राजा क राजदण्ड जइसी रही।
बेल ऊँची, अउर ऊँच होत गइ।
    एकर ढेर डारन रहिन अउर उ बादरन क छुअइ लाग।
¹² किन्तु बेल क जड़ स उखाड़ दीन्ह गवा,
    अउर ओकर भुइँया पइ बहाइ दीन्ह गवा।
गरम पुरवइया हवा चली अउर ओकरे फलन क झुराइ दिहस
    सक्तीसाली डारन टूट गइन, अउर ओनका आगी मँ फेंक दीन्ह गवा।

¹³ “‘किन्तु उ अंगूरे क बेल अब रेगिस्ताने मँ बोइ गइ अहइ।
    इ बहोत झुरान अउर पियासी धरती अहइ।
¹⁴ बिसाल डारे स आगी फइली।
    आगी ओकर सारी टहनियन अउर फलन क बारि दिहस।
एह बरे कउनो सहारा क सक्तिसाली कुबरी नाहीं रही।
    कउनो राजा क राजदण्ड नाहीं रहा।’