भजन संहिता 121

Awadhi Bible: Easy-to-Read Version

¹ मइँ ऊपर ऊँच पहाड़न क कइँती लखत हउँ।
    मुला फुरइ मइँ कहाँ स पावइँ?
² मोका तउ सहारा यहोवा स मिली
    जउन सरग अउ धरती क बनावइवाला अहइ।
³ परमेस्सर तोहका गिरइ नाहीं देइ।
    तोहर बचवइया कबहुँ भी नाहीं सोइ।
⁴ इस्राएल क उद्धारकर्त्ता कबहुँ न ही ओंघात ही
    अउर न ही सोवत अहइँ।
⁵ यहोवा तोहार रच्छक अहइ।
    उ तोहका आस्रय देइ बरे तोहार बगल मँ अहइ।
⁶ दिन क समइ सूरज तोहका हानि नाहीं पहोंचाइ सकत।
    राति मँ चाँद तोहार नोस्कान नाहीं कइ सकत।
⁷ यहोवा तोहार रच्छा हर संकट स करी।
    यहोवा तोहरी आतिमा क रच्छा करी।
⁸ यहोवा उ सबइ पइ धियान रखी जउन कछू तू करब्या।
    जहाँ कहुँ भी तू जाब्या अउ आउब्या, अबहुँ अउ सदा सर्वदा उ तोहार रच्छा करी।