अय्यूब 33

Awadhi Bible: Easy-to-Read Version

33 “मुला अय्यूब अब, मोर संदेस सुना।
    ओन बातन पइ धियान दया जेनका मइँ कहत हउँ।
² मइँ आपन बात कहइ क तइयार हउँ।
    मइँ आपन सब्द चुनत हउँ।
³ मोर मन सच्चा अहइ तउ मइँ सच सब्द बोलब।
    ओन बातन क बारे मँ जेनका मइँ जानत हउँ मइँ सच कहब।
⁴ परमेस्सर क आतिमा मोका बनाएस ह,
    मोका सर्वसक्तीसाली परमेस्सर स जिन्नगी मिलत ह।
⁵ अय्यूब, सुना अउ मोका जवाब द्या अगर तू सोचत ह कि तू दइ सकत ह।
    आपन जवाबन क तइयार रखा ताकि तू मोहसे तर्क कइ सक्या।
⁶ परमेस्सर क समन्वा हम दुइनउँ एक जइसे अहइँ,
    अउर हम दुइनउँ क ही उ माटी स बनाएस ह।
⁷ अय्यूब तू मोहसे जिन डेराअ।
    मइँ तोहरे संग कठोर न होब।

⁸ “मुला अय्यूब, मइँ सुनेउँ ह
    कि तू जउन कहा करत ह।
⁹ तू इ कहे रह्या, ‘मइँ अय्यूब, दोखी नाहीं हउँ,
    मइँ पाप नाहीं किहेउँ, या मइँ कछू भी अनुचित नाहीं करत हउँ।
¹⁰ अगर मइँ कछू भी अनुचित नाहीं किहेउँ, तउ भी परमेस्सर कछू खोट मोहमाँ पाएस ह।
    परमेस्सर सोचत ह कि मइँ अय्यूब, ओकर दुस्मन हउँ।
¹¹ एह बरे परमेस्सर मोरे गोड़े मँ बेड़ी डावत ह,
    मइँ जउन कछू भी करत हउँ, उ लखत रहत ह?’

¹² “मुला अय्यूब, मइँ तोहका निहचय क संग बतावत हउँ कि तू इ बारे मँ गैर मुनासिब अहा।
    काहेकि परमेस्सर कउनो भी मनई स जियादा जानत ह।
¹³ तू काहे सिकाइत करत अहा
    कि परमेस्सर तोहरे इलजाम जवाब नाहीं देत ह
¹⁴ मुला परमेस्सर निहचय ही हर उ बात क जेका उ करत ह स्पस्ट कइ देत ह
    परमेस्सर अलग-अलग रीति स बोलत ह मुला लोग ओका समुझ नाहीं पउतेन।
^15-16 होइ सकत ह कि परमेस्सर सपन मँ लोगन क काने मँ बोलत होइ,
    या कउनो दिब्यदर्सन मँ राति क जब उ पचे आपन बिसतरा पइ गहिर निंदिया मँ होइँ।
जब परमेस्सर क चितउनियन सुनत हीं
    तउ बहोतइ डर जात हीं।
¹⁷ परमेस्सर मनइयन क बुरी बात करइ रोकइ क होसियार करत ह,
    अउ ओनका अंहकारी बनवइ स रोकइ क।
¹⁸ परमेस्सर मनइयन क मउत क देस मँ जाइ स बचावइ खातिर होसियार करत ह।
    परमेस्सर मनई क नास स बचावइ बरे अइसा करत ह।

¹⁹ “कउनो मनई परमेस्सर क वाणी तब सुन सकत ह जब उ बिस्तरे पइ ओलरा होइ अउर परमेस्सर क सजा स दुःख भोगत होइ।
    उ मनई एँतनी गहिर पीरा मँ होता ह, कि ओकर हाड़न दुःखत हीं।
²⁰ फुन अइसा मनई कछू खाइ नाहीं सकत, उ मनई क एँतनी जियादी पीरा होत ह
    कि ओका सबन ते बढ़िया खइया क नाहीं सोहात।
²¹ ओकरे देहे क छय तब तलक होत जात ह, जब तलक उ कंकाल मात्र नाहीं होइ जात,
    अउर ओकर सबइ हाड़न नाहीं देखाँइ लग जातिन।
²² अइसा मनई मउत क देस क निअरे होत ह,
    अउर ओकर जिन्नगी मउत क निअरे होत ह।
²³ मुला होइ सकत ह कि कउनो सरगदूत,
    हजारन सरगदूत मँ स एक होइ जउन ओकरे उत्तिम चरित्तर क गवाही देइ।
²⁴ उ सरगदूत उ मनई पइ दयालु होइ, उ दूत परमेस्सर स कहीं:
    ‘महारबानी कइ क इ मनई क मउत क देस स बचा।
    एकर दाम चुकावइ क एक रस्ता मोका मिली गवा अहइ।’
²⁵ फिन मनई क देह जवान अउ खूब मजबूत होइ जाइ।
    उ मनई वइसा ही होइ जाइ जइसा उ तब रहा, जब उ जवान रहा।
²⁶ उ मनई परमेस्सर क स्तुति करी अउर परमेस्सर ओकरी स्तुति क जवाब देइ।
    फुन उ परमेस्सर क व्यक्तित्व मँ खुसी खुसी आइ जाब।
    अउर उ बहोत खुस होइ काहेकि परमेस्सर ओका ओकर ईमानदारी बरे बदला देहीं।
²⁷ फिन उ मनई मनइयन क मन्वा स्वीकार करी।
    उ कही; ‘मइँ पाप किहे रहउँ, भले क बुरा मइँ किहे रहेउँ,
    मुला मोका एहसे क मिला!
²⁸ परमेस्सर मउत क देस मँ गिरइ स मोर आतिमा क बचाएस।
    मइँ अउर जियादा जिअब अउर फुन स जिन्नगी क रस लेब।’

^29-30 “परमेस्सर मनई क संग ओका मउत क देस मँ दाखिल होवइ स रोक कि अहसा बार-बार करत ह।
    अइसा मनई फिन जिन्नगी क रस लेत ह।

³¹ “अय्यूब, धियान द्या अउर मोर बात सुना।
    तू चुप रहा अउर मोका कहइ द्या।
³² अगर तोहार लगे कहइ बरे कछू अहइ
    तउ ओका कहा
    काहेकि मइँ तोहका निर्दोख लखइ चाहत हउँ।
³³ अय्यूब, अगर तोहका कछु नाहीं कहइ क अहइ तउ तू मोर बात सुना।
    चुप रहा, मइँ तोहका बुध्दिमान बनवइ सिखाउबउँ।”