अय्यूब 32

Awadhi Bible: Easy-to-Read Version

¹⁰ “एँह बरे मइँ जउन कछू जानत हउँ तोहका कहत हउँ।
    तू पचे मोर बात सुना मइँ तू पचन्क बताउब कि मइँ का सोचत हउँ।
¹¹ जब तलक तू लोग बोलत रह्या, मइँ बाट जोहत रहा।
    मइँ तोहार बुद्धि सुनइ चाही रहा।
    मइँ खामूस रह्या जब तू पचे बोलइ बरे सोच बिचार किहस।
¹² मइँ तोहरे मर्म स भरे सब्दन क अय्यूब क उत्तर देइ खातिर धियान स सुनत रहेउँ।
    मुला तीनउँ ही इ सिद्ध नाहीं कइ पाया कि अय्यूब बुरा अहइ।
    तोहमाँ स कउनो भी अय्यूब क तर्कन क जवाब नाहीं दइ पावा।
¹³ तू लोगन क इहइ नाहीं कहइ चाही कि तू पचे गियान क पाइ लिहा ह।
    लोग नाहीं, परमेस्सर निहचय ह अय्यूब क तर्कन क जवाब देइ।
¹⁴ मुला अय्यूब मोरे खिलाफत मँ नाहीं बोलत रहा,
    एह बरे मइँ ओन तर्कन क प्रयोग नाहीं करब जेकर प्रयोग तू पचे तीनहुँ किहा ह।

¹⁵ “अय्यूब, तोहरे तीनहुँ मीत असमंजस मँ पड़ा अहइँ,
    ओनके लगे कछू भी अउर कहइ क नाहीं अहइ,
    ओनके लगे जवाब दइ बरे अउर कछु नाहीं अहइ
¹⁶ इ सबइ तीनहुँ लोग हिआँ चुप खड़ा अहइँ
    अउर ओनके लगे जवाब नाहीं अहइ।
    तउ का अबहिं भी मोका प्रतीच्छा करइ चाही?
¹⁷ नाहीं! मइँ भी आपन जवाब देब।
    मइँ भी बताउब तू पचन्क कि मइँ का सोचत हउँ।
¹⁸ काहेकि मोरे लगे कहइ क बहोत अहइ।
    मोरे भितरे जउन आतिमा अहइ, उ मोका बोलइ क मजबूर करत ह।
¹⁹ मइँ आपन भितरे अइसी नई दाखरस सा हउँ, जउन हाली ही बाहेर उफनइ क अहइ।
    मइँ उ नई दाखरस मसक जइसा हउँ जउन हाली ही फट जाइ क अहइ।
²⁰ तउ निहचय ही मोका बोलइ चाही, तबहीं मोका नीक लागी।
    आपन मुँह मोका खोलइ चाही अउर मोका अय्यूब क सिकाइतन क जवाब देइ चाही।
²¹ इ बहस मँ मइँ कउनो क पच्छ नाहीं लेबइँ अउ अय्यूब क वइसे ही पच्छ लेबउँ जइसे दूसर क होइ चाहीं।
    मइँ कउनो क खुसामद न करब।
²² मइँ नाहीं जानत हउँ कि कइसे कउनो क खुसामद कीन्ह जात ह।
    अगर मइँ कउनो क खुसामद करइ जानत तउ हाली ही परमेस्सर ओका सजा देत।