ناحوم 2

Kurdi Sorani Standard

² یەزدان سەروەری یاقوب دەگەڕێنێتەوە
    وەک سەروەری ئیسرائیل،
هەرچەندە تاڵانکەران تاڵانیان کردن و
    ڕەزەمێوەکانیان تێکدان.

³ قەڵغانی پاڵەوانەکانی ئاڵ هەڵگەڕاون،
    قارەمانەکانی لە بەرگی سووردان،
لە ڕۆژی خۆ ئامادەکردنیاندا
    پۆڵای گالیسکەکان بریسکە دەداتەوە،
    ئەو ڕمانەی لە دار سنەوبەر دروستکراون دەلەرنەوە.
⁴ گالیسکەکان لە شەقامەکان تیژڕەون،
    لە گۆڕەپانەکان سەرەڕۆن.
دیمەنیان وەک مەشخەڵە،
    وەک بروسک غار دەدەن.

⁵ نەینەوا پاڵەوانەکانی بانگ دەکات،
    بەڵام ساتمە دەکەن و لە ڕۆیشتنیاندا دەکەون.
پەلە دەکەن بۆ لای شووراکانی و
    قەڵغانەکان ئامادە کراون.
⁶ دەروازەکانی ڕووبار دەکرێنەوە و
    کۆشکەکە دەڕمێت.
⁷ بە فەرمانی خودا بە دیل دەگیرێت و
    ڕاپێچ دەکرێت.
کەنیزەکانی هەروەک کۆتر دەگمێنن،
    سنگیان دەکوتن.
⁸ نەینەوا وەک حەوزێکی وشکبووە.
    هاوار دەکەن، «ڕاوەستن! ڕاوەستن!»
    بەڵام کەس ئاوڕ ناداتەوە.
⁹ «زیو تاڵان بکەن!
    زێڕ تاڵان بکەن!
گەنجینەکانی لەبن نایەن،
    پڕە لە گەوهەری بەهادار.»
¹⁰ چۆڵ و تاڵانکراو و داماڵراوە،
    دڵ دەتوێتەوە و ئەژنۆکان شلن،
    هەموویان دەلەرزن، ڕەنگیان دەپەڕێت.

¹¹ کوا لانەی شێرەکان،
    لەوەڕگای بەچکە شێران؟
لەوێدا شێر و شێرە مێ دەگەڕان
    لەگەڵ بەچکە شێر، هیچ شتێک نەیدەترساندن.
¹² شێر بۆ پێویستی بەچکەکانی پەلاماری دەدا و
    نێچیرەکەی بۆ شێرە مێیەکەی دەخنکاند،
ئەشکەوتەکەی پڕ دەکرد لە نێچیر،
    لانەکانیشی لەوانەی پەلاماری داون.

¹³ یەزدانی سوپاسالار دەفەرموێت:
    «من لە دژی تۆم.
گالیسکەکانت دەسووتێنم و دەبنە دووکەڵ،
    بەچکە شێرەکانیشت شمشێر دەیانخوات و
نێچیرت لەسەر زەوی لێ دەبڕم.
    ئیتر دەنگی نێردراوەکانت نابیسترێن.»