Римјаните 15

Macedonian New Testament

Да го следиме Христовиот пример

15 Ние што имаме посилна вера треба да ја поднесуваме слабоста на оние со послаба вера, а не да си угодуваме самите на себе. ² Секој од нас треба да им угодува на христијаните што се околу него, за нивно добро, за да ги изградува. ³ Ни Христос не си угодуваше Себеси, туку, како што е напишано:

„Навредите што беа наменети за Тебе,

паднаа врз Мене^[a].“

⁴ Се што во минатото е напишано во Светото Писмо, напишано е за ние да се поучиме, да оцврснеме, да се охрабриме и да не губиме надеж.

⁵ А Бог, Кој е изворот на нашата стрпливост и утеха, нека ви даде слога меѓу вас и секој да го следи примерот на Исус Христос, ⁶ па сите заедно и сложно да Го прославувате Бога, Таткото на нашиот Господ Исус Христос.

⁷ Прифаќајте се еден со друг, како што Христос ве прифати вас. Со тоа Бог ќе биде прославен. ⁸ Сакам да знаете дека Христос им стана слуга на Евреите за да го исполни ветувањето што Бог им го беше дал на нивните предци, ⁹ а исто така и сите други народи да Го прославуваат Бога заради Неговата милост, како што е напишано во Светото Писмо:

„Затоа ќе Ти донесам слава меѓу нееврејските народи,

ќе Му пеам славопои на Твоето име^[b]!“

¹⁰ И на друго место вели:

„Радувајте се и вие што не сте Евреи,

заедно со Божјиот народ, Евреите^[c]!“

¹¹ И повторно:

„Славете Го Господа сите народи,

Него нека Го слават сите луѓе^[d]!“

¹² А Исаија вели:

„Ќе се појави потомок на Давид^[e],

ќе им стане владетел на нееврејските народи,

кои својата надеж во Него ќе ја положат^[f]!“

¹³ Сега Бог, изворот на надежта, нека ве исполни со радост и со мир заради вашата вера во Христос, а вашата надеж нека продолжи силно да расте и да се поткрепува од силата на Светиот Дух.

Мисионерската задача на апостол Павле

¹⁴ Уверен сум, драги пријатели христијани, дека вие сте полни со добрина, дека имате солидно знаење и дека сте способни еден со друг да се поучувате. ¹⁵ Сепак, си зедов слобода да ви пишам за некои работи, за да ве потсетам. Бог ми беше благонаклонет и ¹⁶ ме зеде во служба на Исус Христос меѓу нееврејските народи, за да извршувам една света задача: ширење на Божјата Радосна вест. На тој начин Светиот Дух ќе може да направи од нееврејските народи принос што ќе биде свет и прифатлив за Бог.

¹⁷ Сега, кога сум во служба на Исус Христос, се гордеам со тоа што го работам за Бог. ¹⁸ Се осмелувам да зборувам само за она што Христос го изврши преку мене, за тоа како ме испрати да проповедам со зборови и со дела, за да се обратат и оние што не се Евреи. ¹⁹ Зборувам за тоа како Христос правеше чуда и им даваше чудотворни знаци на луѓето со силата на Светиот Дух. Им ја проповедам во целост Радосната вест за Христос, почнувајќи од Ерусалим, па се до Илирија^[g].

²⁰ Мојата цел е да ја проповедам Радосната вест онаму каде што се уште не слушнале за Христос, зашто не сакам да градам врз туѓ темел. ²¹ Напротив, сакам да правам онака како што е напишано во Светото Писмо:

„Ќе им се отворат очите на народите на кои

не им беше кажувано за Господ,

ќе разберат оние што

за Него не беа чуле^[h].“

Намерата на Павле да го посети Рим

²² Мојата желба да ве посетам и вас, во Рим, беше многупати одложувана токму поради тоа што проповедав по таквите земји. ²³ Сега, меѓутоа, за мене повеќе нема поле за работа во овие краишта. Бидејќи веќе повеќе години имам желба да дојдам кај вас, во Рим, ²⁴ ќе ве посетам кога ќе одам за Шпанија. Се надевам дека на поминување ќе се видам со вас и дека вие, откако барем малку ќе ви се изнарадувам, ќе ме испратите понатаму.

Помош за христијаните во Ерусалим

²⁵ Но, пред да дојдам, прво ќе заминам за Ерусалим, за да им ги однесам доброволните прилози собрани за тамошните христијани. ²⁶ Христијаните од Македонија и Ахаја собраа доброволни прилози за сиромашните христијани во Ерусалим. ²⁷ Го сторија тоа од се срце. Се чувствуваа должни спрема нив. Сметаа дека, ако Евреите ги поделија духовните богатства со другите народи, ред е и тие да им помогнат со материјални добра. ²⁸ Кога ќе ја завршам оваа работа и ќе им ги предадам собраните прилози^[i], ќе ве посетам, а потоа ќе заминам за Шпанија. ²⁹ Знам дека моето доаѓање кај вас ќе биде со целосен благослов од страна на Христос.

Молете се за мене

³⁰ Драги пријатели христијани, во името на нашиот Господ Исус Христос и заради љубовта што Светиот Дух ви ја дава, ве молам да ми се придружите во борбата што ја водам со тоа што ќе Му се молите на Бог за мене. ³¹ Молете се Бог да ме заштити од оние луѓе во Јудеја што одбиваат да Му се покорат на Бог, а и за тоа христијаните во Ерусалим да го прифатат прилогот што им го носам^[j]. ³² Така, исполнет со радост, да дојдам кај вас и, ако е Божја волја, меѓусебно да се освежиме. ³³ Дотогаш Бог, Кој е извор на мир, нека биде со сите вас. Амин.