Матеј 20

Macedonian New Testament

Споредба со наемни работници

20 „Небесното царство може да се опише со ваква споредба: Еден домаќин излезе рано наутро да повика наемни работници за своето лозје. ² Се погоди со нив да им плати по една надница и ги испрати на лозјето. ³ Околу девет^[a] часот наутро, тој повторно отиде на пазарот и виде и други луѓе кои чекаа за работа, ⁴ па им рече: ,Одете и вие на моето лозје, а јас ќе ви платам колку што ви следува.‘ И тие отидоа. ⁵ Потоа го направи истото околу дванаесет^[b] часот, и уште еднаш околу петнаесет часот. ⁶ Кога излезе околу седумнаесет^[c] часот, виде и други луѓе како стојат, па им се обрати: ,Зошто безделничите овде цел ден?‘ ⁷ ,Никој не ни понуди работа‘ - му одговорија тие. Тогаш и ним им рече: ,Одете и вие на моето лозје!‘ ⁸ Кога се стемни, господарот му рече на својот надзорник: ,Повикај ги работниците и исплати им по една надница на сите, почнувајќи од последните, па до првите.‘ ⁹ И така, оние што дојдоа на нивата во седумнаесет часот добија по една надница. ¹⁰ Кога дојдоа на ред првите мислеа дека ќе добијат повеќе, но и тие добија по една надница. ¹¹ Штом ги примија парите, тие почнаа да мрморат против господарот, велејќи: ¹² ,Овие последниве работеа само еден час, а ти ги израмни со нас, кои се мачевме цел ден на жегата!‘ ¹³ Обраќајќи му се на еден од нив, тој му рече: ,Пријателе, јас тебе не те оштетив. Зар не се погодивме за надницата? ¹⁴ Земи си ја и оди си! А јас сакам да му платам на последниот колку и тебе; ¹⁵ зар немам право да правам што сакам со своите пари? Или, пак, окото ти е завидливо затоа што сум дарежлив!?‘“

¹⁶ И така, тие што сега се последни, тогаш ќе бидат први, а тие што сега се први, тогаш ќе бидат последни“ - заклучи Исус.

Исус третпат ја навестува Својата смрт

(Мк. 10-32-34; Лк. 18:31-34) ¹⁷ Одејќи кон Ерусалим, Исус ги тргна настрана дванаесеттемина и додека чекореа по патот, им рече: ¹⁸ „Еве, на пат сме кон Ерусалим; таму Јас, Синот Човечки, ќе им бидам предаден на свештеничките поглавари и на вероучителите^[d]. ¹⁹ Тие ќе Ме осудат на смрт и ќе Ме предадат на Римјаните да Ми се подбиваат, да Ме камшикуваат и да Ме распнат. Но на третиот ден Јас ќе воскреснам.“

Алчност за власт над другите

(Мк. 10:35-45) ²⁰ Тогаш кај Исус дојде мајката на Завдаевите синови, заедно со своите двајца синови, Јаков и Јован, клекна пред Него и Го замоли за една услуга. ²¹ „Што сакаш?“ - ја праша Исус. „Дај им на моиве два сина почесни места од Твојата десна и лева страна во Твоето царство“ - Му рече таа. ²² Исус им се обрати на двајцата нејзини синови и им рече: „Не знаете што барате. Ќе можете ли да пиете од чашата на Моите страдања, од која Јас ќе пијам?“ А тие Му одговорија: „Ќе можеме!“ ²³ „Добро, и вие ќе пиете од Мојата чаша - им одоговори Исус - но Јас не можам да одредам кој ќе седи од Мојата десна страна, а кој од левата. Тие места им припаѓаат на оние за кои ги определил Мојот небесен Татко.“

²⁴ Кога преостанатите десет ученици разбраа за ова, им се налутија на двајцата браќа. ²⁵ Тогаш Исус ги повика кај Себе сите заедно и им рече: „Знаете дека владетелите на овој свет владеат сурово над луѓето. ²⁶ Но, меѓу вас не треба да биде така. Напротив, ако некој сака да биде водач меѓу вас - нека им служи на сите. ²⁷ Тој што сака да биде прв меѓу вас, нека ви биде слуга - ²⁸ како што Јас, Синот Човечки, не дојдов за да Ми служат, туку Јас да им служам на луѓето и да го дадам Својот живот како откупнина за мнозина.“

Исцелување на двајца слепи питачи

(Мк. 10:46-52; Лк. 18:35-43) ²⁹ На излегување од градот Јерихо, голема толпа народ врвеше по Исус и Неговите ученици. ³⁰ Покрај патот седеа двајца слепи и штом слушнаа дека Исус минува оттаму почнаа да викаат на сиот глас: „Господе, Сине Давидов^[e], покажи милост спрема нас!“ ³¹ Народот се обидуваше да ги замолкне, но тие уште погласно викаа: „Господе, Сине Давидов, покажи милост спрема нас!“ ³² Исус застана, ги повика кај Себе и ги праша: „Што сакате да сторам за вас?“ ³³ „Да прогледаме, Господе!“ - му одговорија тие. ³⁴ Исус се сожали и им ги допре очите и тие наеднаш прогледаа и тргнаа по Него.