Марко 1

Macedonian New Testament

Евангелието според

Марко

ПОДГОТОВКИ ЗА НАСТАПОТ НА ИСУС ХРИСТОС

Проповедањето на Јован Крстител

(Мт. 3:1-12; Лк. 3:1-18; Јвн. 1:19-28) 1 Ова е почетокот на Радосната вест за Божјиот Син Исус Христос. ² Таа започна онака како што беше предвестено од Бог, во Книгата напишана од пророкот Исаија:

„Ќе испратам Свој гласник, да ти го подготви патот.

³ Низ пустината ќе одекнува неговиот глас:

‚Пригответе пат за доаѓањето на Господ!

Исправете го патот за Него^[a]!‘“

⁴ Тој гласник беше Јован Крстител кој се појави во пустината и започна да проповеда крштавање како знак за обраќање кон Бог заради простување на гревовите.

⁵ Кај него почнаа да доаѓаат луѓе од цела Јудеја и од Ерусалим. Тие ги исповедаа своите гревови, а Јован ги крштаваше^[b] во реката Јордан.

⁶ Јован носеше облека исплетена од камилски влакна и беше препашан со кожен појас. Се хранеше со скакулци и див мед.

⁷ Тој им зборуваше на луѓето: „По мене доаѓа многу голем човек! Јас не сум достоен ни ремењата од Неговите сандали да Му ги одврзам! ⁸ Јас сега ве крштавам со^[c] вода, а Тој ќе ве крсти со Светиот Дух.“

⁹ Во тоа време дојде Исус од Назарет во Галилеја и Јован Крстител Го крсти во реката Јордан. ¹⁰ Во моментот кога Исус излегуваше од водата, Јован виде како се отвори небото и Светиот Дух во облик на гулаб слезе врз Исус. ¹¹ Се чу и глас од небото: „Ти си Мојот сакан Син; со Тебе Сум наполно задоволен!“

Исус и Сатаната

(Мт. 4:1-11; Лк. 4:1-13) ¹² Веднаш по ова, Божјиот Дух Го одведе Исуса во пустината. ¹³ Таму Тој остана четириесет дена и Сатаната Го искушуваше. Исус живееше сред диви животни, но ангелите се грижеа за Него.

Почетоци на Исусовата служба

(Мт. 4:12-17; Лк. 4:14-15) ¹⁴ Подоцна, кога владетелот Ирод Антипа го затвори Јована Крстител, Исус отиде во Галилеја за да ја проповеда Божјата Радосна вест. ¹⁵ Говореше: „Дојде времето! Божјото царство се приближува! Покајте се и верувајте во Радосната вест!“

Исус ги избира првите ученици

(Мт. 4:18

-22; Лк. 5:1-11) ¹⁶ Одејќи по брегот на Галилејското Езеро, Исус ги забележа браќата Симон и Андреј. Тие беа рибари и ги поставуваа своите рибарски мрежи во езерото. ¹⁷ Исус им рече: „Тргнете по Мене и Јас ќе ве научам како да ловите луѓе, а не риби!“ ¹⁸ Двајцата браќа веднаш ги оставија своите мрежи и тргнаа по Него.

¹⁹ Малку понатаму, Исус ги забележа Завдаевите синови Јаков и Јован. Тие седеа во своето бротче и си ги крпеа рибарските мрежи. Веднаш ги повика и нив. ²⁰ Оставајќи ги својот татко и наемните работници во бротчето, тие тргнаа по Исус.

Исус во Кафарнаум: сабота, во синагогата

(Лк. 4:31-37) ²¹ Придружуван од Своите ученици, Исус отиде во градот Кафарнаум. Во саботата, отиде во синагогата^[d] и почна да ги поучува луѓето. ²² Сите беа восхитени од Неговото учење. Тој поучуваше со вистински авторитет, а не како вероучителите^[e].

²³ Одненадеж, во синагогата влезе еден човек обземен^[f] со демонски дух и почна да вика: ²⁴ „Што ќе ни сториш, Исусе од Назарет!? Дојде за да нe уништиш, нели!? Те знам Кој си: Ти си Божјиот Светец!“

²⁵ Исус му заповеда на демонскиот дух: „Замолкни и излези од човекот!“ ²⁶ Демонскиот дух го стресе човекот и со силна викотница излезе од него.

²⁷ Луѓето останаа вчудовидени и си велеа еден на друг: „Што е ова? Некое ново и моќно учење! На демонски духови им заповеда и тие Му се покоруваат!“

²⁸ Вестите за Исус бргу се раширија по цела Галилеја.

Исус исцелува многу луѓе

(Мт. 8:14-17; Лк. 4:38-41) ²⁹ Напуштајќи ја синагогата, во придружба на Јаков и Јован, Исус отиде во куќата на Симон и Андреј. ³⁰ Таму Му кажаа дека тештата на Симон лежи болна со силна треска. ³¹ Исус влезе кај неа, ја фати за раката и ја поткрена. Треската веднаш и престана и таа почна да ги послужува.

³² Вечерта, по зајдисонце, сите што беа болни или обземени од демони ги доведуваа кај Исус. ³³ Целиот град се собра пред вратата. ³⁴ Исус ги исцелуваше сите заболени од најразлични болести и ги ослободуваше од демонски духови. Демоните знаеја Кој е Исус, но Тој не им дозволуваше да кажат.

³⁵ Рано утредента, уште в мугри, Исус стана и отиде на молитва, сам, на тивко место. ³⁶ Симон и другите тргнаа да Го бараат. ³⁷ Кога Го најдоа, Му рекоа: „Сите Те бараат!“ ³⁸ А Тој им одговори: „Да одиме на друго место, во соседните градови, за да им проповедам и ним, бидејќи за таа цел сум дојден.“ ³⁹ Така Исус ја помина целата покраина Галилеја, проповедајќи по тамошните синагоги и ослободувајќи луѓе од демонска обземеност.

Исцелување на еден лепрозен човек

(Мт. 8:1-4; Лк. 5:12-16) ⁴⁰ Еден човек, болен од лепра, дојде кај Исус, клекна на колена и почна да Го моли: „Ако сакаш, Ти можеш да ме исцелиш^[g]!“ ⁴¹ Исус се сожали, испружи рака и го допре, велејќи му: „Сакам! Еве, те исцелувам!“ ⁴² Во истиот момент лепрата исчезна и човекот оздраве.

⁴³ Испраќајќи го, Исус строго му нареди: ⁴⁴ „Не кажувај никому за ова! Оди само кај свештеникот^[h] и покажи му дека си здрав. Потоа принеси дар во храмот како што е пропишано со Мојсеевиот Закон, за да се увери јавноста.“

⁴⁵ Но тукушто излезе, човекот почна на сите да им раскажува за случката, така што Исус повеќе не можеше јавно да се движи во градот. Престојуваше надвор од населените места, а народ од сите страни доаѓаше кај Него.