Евреите 3

Macedonian New Testament

Исус е повозвишен од Мојсеј

3 Свети мои браќа, припадници на небесната покана: погледнете Го Исуса, Кого Бог Го испрати и Го назначи како Првосвештеник на нашата вера! ² Тој Му беше верен на Бог, Кој Го постави, исто како што Мојсеј верно служеше и му беше доверен целиот Божји дом. ³ Но Исус заслужува поголема слава од Мојсеј, исто како што градителот заслужува поголема почит од градбата. ⁴ Секоја куќа има свој градител, а Бог е градител на се.

⁵ Навистина, и Мојсеј беше верен во Божјиот дом, но само како слуга. Неговата работа беше илустрација на вистините што Бог подоцна ќе ги објави. ⁶ Но Христос е верен Син и затоа Тој го раководи целото Божјо семејство, а тоа семејство сме ние, ако останеме храбри и не ја загубиме нашата надеж во Христос.

Треба да

и останеме верни на Божјата порака ⁷ Затоа, како што вели Светиот Дух:

„Ако денес го слушнете Божјиот глас,

⁸ не стврднувајте ги вашите срца како вашите предци

кога кренаа бунт против Бог

и Го предизвикуваа во пустината!

⁹ Таму вашите предци Ме предизвикуваа,

иако четириесет години ги гледаа Моите дела!

¹⁰ Тогаш се разгневив против тие луѓе и реков:

Срцата на овие луѓе им се постојано во заблуди;

не ги слушаат упатствата што им ги давам!

¹¹ Затоа, разгневен се заветував, велејќи им:

,Вие нема никогаш да влезете во местото на Моето спокојство^[a]!‘ “

Непослушноста спрема Бог е погубна

¹² Внимавајте, драги пријатели христијани! Не дозволувајте вашите срца да станат зли и да се исполнат со невера, па да отпаднете од Живиот Бог! ¹³ Напротив, секојдневно, охрабрувајте се еден со друг се додека има време кое може да се нарече ,денес‘, за да не бидете измамени од гревот и да станете нечувствителни.

¹⁴ Ако цврсто и докрај веруваме онака како што верувавме на почетокот, ќе имаме удел во се што Му припаѓа на Христос. ¹⁵ Не заборавајте го предупредувањето: „Ако денес го слушнете Божјиот глас, не стврднувајте ги вашите срца, како оние Израелци што кренаа бунт против Бога^[b]“.

¹⁶ Кои беа тие луѓе што го слушнаа Божјиот глас, па се побунија против Него? Зар тоа не беа сите оние што излегоа од Египет под водството на Мојсеј? ¹⁷ Кои беа луѓето што го гневеа Бога четириесет години? Зар не беа тоа оние што згрешија, чии тела останаа во пустината? ¹⁸ Против кои луѓе Бог се заветува дека тие никогаш нема да влезат во местото на Неговото спокојство? Против оние што беа непослушни! ¹⁹ И така, гледаме дека не им беше дозволено да влезат во Неговото спокојство поради тоа што немаа вера.