Yobu 37

Mawu a Mulungu mu Chichewa Chalero

37 “Mtima wanga ukulumphalumpha pa chimenechinso
    ndipo ukuchoka mʼmalo mwake.
² Tamverani! Tamverani kubangula kwa liwu lake,
    kugunda kumene kukuchokera mʼkamwa mwake.
³ Iye amaponya chingʼaningʼani chake pansi pa thambo lonse
    ndipo amachitumiza ku dziko lapansi.
⁴ Pambuyo pake kubangula kwake kumamveka.
    Iye amabangula ndi liwu lake laulemerero.
Pamene wabangula,
    palibe chimene amalephera kuchita.
⁵ Liwu la Mulungu limabangula mʼnjira zambiri zodabwitsa
    Iye amachita zinthu zazikulu zimene sitingathe kuzimvetsa.
⁶ Amalamula chisanu chowundana kuti, ‘Igwa pa dziko lapansi,’
    ndipo amalamulanso mvula yamawawa kuti, ‘Khala mvula yamphamvu.’
⁷ Kuti anthu onse amene anawalenga athe kuzindikira ntchito yake.
    Iye amalepheretsa anthu kugwira ntchito zawo.
⁸ Zirombo zimakabisala
    ndipo zimakhala mʼmaenje mwawo.
⁹ Mphepo yamkuntho imatuluka ku malo ake,
    kuzizira kumatuluka mʼmphepo yamkunthoyo.
¹⁰ Mpweya wa Mulungu umawunditsa madzi
    ndipo madzi a mʼnyanja amawuma kuti gwaa.
¹¹ Iye amadzaza mitambo ndi madzi a mvula,
    amabalalitsa zingʼaningʼani zake kuchokera mʼmitambomo.
¹² Mulungu amayendetsa mitamboyo
    mozungulirazungulira dziko lonse lapansi
    kuti ichite zonse zimene Iye akufuna pa dziko lapansi.
¹³ Iye amagwetsa mvula kuti alange anthu,
    kapena kubweretsa chinyontho pa dziko lapansi kuti aonetse chikondi chake.

¹⁴ “Abambo Yobu, tamvani izi;
    imani ndipo muganizire ntchito zodabwitsa za Mulungu.
¹⁵ Kodi mukudziwa momwe Mulungu amayendetsera mitambo
    ndi kuchititsa kuti kukhale zingʼaningʼani?
¹⁶ Kodi mukudziwa momwe Mulungu amayalira mitambo,
    ntchito zodabwitsa za Iye amene ndi wanzeru zangwiro?
¹⁷ Inu amene mʼzovala zanu mumatuluka thukuta
    pamene kunja kwatentha chifukwa cha mphepo yakummwera,
¹⁸ kodi mungathe kuthandizana naye kutambasula thambo
    limene ndi lolimba ngati chitsulo?

¹⁹ “Tiwuzeni ife zoti tikanene kwa Iye;
    sitingathe kufotokoza mlandu wathu chifukwa cha mdima umene uli mwa ife.
²⁰ Kodi nʼkofunika kumudziwitsa Mulungu kuti ndili naye mawu?
    Kodi kutero sikuchita ngati kupempha kuti ndiwonongeke?
²¹ Tsopano munthu sangathe kuyangʼana dzuwa,
    ndi kunyezimira mlengalenga,
    kuwomba kwa mphepo kutachotsa mitambo yonse.
²² Kuwala kwake kumaonekera cha kumpoto;
    Mulungu amabwera ndi ulemerero woopsa.
²³ Wamphamvuzonse sitingathe kumufikira pafupi ndi wa mphamvu zoposa;
    pa chiweruzo chake cholungama ndi mʼchilungamo chake chachikulu Iye sapondereza anthu ozunzika.
²⁴ Nʼchifukwa chake anthu amamuopa kwambiri,
    kodi saganizira za onse amene amaganiza kuti ndi anzeru?”