Yobu 35

Mawu a Mulungu mu Chichewa Chalero

⁴ “Ine ndikufuna ndikuyankheni inu
    pamodzi ndi abwenzi anu omwe.
⁵ Yangʼanani kumwamba ndipo muone
    mitambo imene ili kutali ndi inuyo.
⁶ Inuyo mukachimwa, Iye zimamukhudza motani?
    Ngati machimo anu ndi ochuluka, zimenezo zimachita chiyani kwa Iye?
⁷ Ngati inu ndinu wolungama, mumamupatsa Iyeyo chiyani?
    Kapena Iye amalandira chiyani chochokera mʼdzanja lanu?
⁸ Kuyipa kwanu kumangokhudza anthu ngati inuyo,
    ndipo chilungamo chanu chimakhudza anthu anzanu.

⁹ “Anthu akufuwula chifukwa cha kuzunzidwa;
    akufuna chithandizo kuti achoke pansi pa ulamuliro wa anthu amphamvu.
¹⁰ Koma palibe amene akunena kuti, ‘Kodi ali kuti Mulungu, Mlengi wanga,
    amene amatisangalatsa nthawi ya usiku,
¹¹ amene amatiphunzitsa kupambana nyama za dziko lapansi
    ndipo amatipatsa nzeru kupambana mbalame zowuluka?’
¹² Iye sayankha pamene anthu akufuwulira kwa Iye
    chifukwa cha kudzikuza kwa anthu oyipa.
¹³ Ndithu, Mulungu samva kupempha kwawo kopanda pake;
    Wamphamvuzonse sasamalira zimenezi.
¹⁴ Ndipo ndi bodza lalikulu kunena kuti
    Iye saona zimene zikuchitika.
Iye adzaweruza molungama ngati
    inu mutamudikira
¹⁵ ndiye tsono popeza kuti ukali wake sukupereka chilango,
    zoyipa zambiri zimene anthu amachita,
¹⁶ abambo Yobu mumangoyankhula zopandapake,
    mukungochulukitsa mawu opanda nzeru.”