Yobu 17

Mawu a Mulungu mu Chichewa Chalero

³ “Inu Mulungu, patseni chikole chimene mukufuna.
    Ndani wina amene adzandiperekera ine chikole?
⁴ Inu mwatseka maganizo awo kuti asamvetse zinthu;
    choncho simudzawalola kuti apambane.
⁵ Ngati munthu apereka mnzake chifukwa cha chuma,
    ana ake sadzaona mwayi.

⁶ “Mulungu wandisandutsa chisudzo chochiseka aliyense,
    munthu amene anthu amalavulira malovu nkhope yake.
⁷ Mʼmaso mwanga mwada ndi chisoni;
    ndawonda ndi mutu womwe.
⁸ Anthu olungama akudabwa nazo zimenezi;
    anthu osachimwa akupsera mtima anthu osapembedza Mulungu.
⁹ Komabe anthu olungama adzasunga njira zawo,
    ndipo anthu a makhalidwe abwino mphamvu zawo zidzanka zikuchuluka.

¹⁰ “Tsono bwerani nonsenu, bwerezaninso mawu anuwo,
    sindidzapezapo munthu wanzeru pakati panupo.
¹¹ Masiku anga atha, zimene ndinakonza zalephereka,
    pamodzinso ndi zokhumba za mtima wanga.
¹² Anthu awa amasandutsa usiku kukhala usana,
    nthawi ya usiku iwo amati ‘kwatsala pangʼono kucha.’
¹³ Ngati nyumba imene ndikuyiyembekezera ndi manda,
    ngati ndiyala bedi langa mu mdima,
¹⁴ ngati ndinena kwa dzenje la manda ‘ndinu abambo anga,’
    ndiponso kwa mphutsi kuti, ‘ndinu amayi anga’ kapena ‘mlongo wanga,’
¹⁵ tsono chiyembekezo changa chili kuti?
    Ndani angaone populumukira panga?
¹⁶ Ndithu sindidzakhalanso ndi chiyembekezo chilichonse,
    polowa mʼmanda, pamene ndidzatsikira ku fumbi.”