Salmo 136

Ang Pulong Sa Dios

136 Pasalamati ang Ginoo kay maayo siya.
Ang iyang gugma walay kataposan.
² Pasalamati ang Dios nga labaw sa tanang mga dios.
Ang iyang gugma walay kataposan.
³ Pasalamati ang Ginoo nga labaw sa tanang mga ginoo.
Ang iyang gugma walay kataposan.
⁴ Siya lang gayod ang naghimo ug katingalahang mga butang.
Ang iyang gugma walay kataposan.
⁵ Pinaagi sa iyang kaalam, gihimo niya ang kalangitan.
Ang iyang gugma walay kataposan.
⁶ Gipahimutang niya ang yuta ibabaw sa katubigan.
Ang iyang gugma walay kataposan.
⁷ Gihimo niya ang adlaw ug ang bulan.
Ang iyang gugma walay kataposan.
⁸ Gihimo niya ang adlaw sa paghatag ug kahayag kon adlaw.
Ang iyang gugma walay kataposan.
⁹ Gihimo niya ang bulan ug ang mga bitoon sa paghatag ug kahayag sa kagabhion.
Ang iyang gugma walay kataposan.
¹⁰ Gipamatay niya ang mga kamagulangang anak nga lalaki sa mga Ehiptohanon.
Ang iyang gugma walay kataposan.
¹¹ Gipagawas niya ang mga Israelinhon gikan sa Ehipto.
Ang iyang gugma walay kataposan.
¹² Gipagawas niya sila pinaagi sa iyang dakong gahom.
Ang iyang gugma walay kataposan.
¹³ Gibahin niya ang Pulang Dagat.
Ang iyang gugma walay kataposan.
¹⁴ Ug gipatabok niya ang iyang mga katawhan sa taliwala niini.
Ang iyang gugma walay kataposan.
¹⁵ Apan gilumsan niya ang hari sa Ehipto^[a] ug ang mga sundalo niini didto sa Pulang Dagat.
Ang iyang gugma walay kataposan.
¹⁶ Gigiyahan niya ang iyang katawhan sa kamingawan.
Ang iyang gugma walay kataposan.
¹⁷ Gipanglaglag niya ang gamhanang mga hari.
Ang iyang gugma walay kataposan.
¹⁸ Gipamatay niya ang bantogang mga hari.
Ang iyang gugma walay kataposan.
¹⁹ Gipatay niya si Sihon, nga hari sa mga Amorihanon.
Ang iyang gugma walay kataposan.
²⁰ Gipatay usab niya si Og, nga hari sa Basan.
Ang iyang gugma walay kataposan.
²¹ Gihatag niya ang ilang yuta ngadto sa iyang katawhan aron ilang panag-iyahan.
Ang iyang gugma walay kataposan.
²² Kining yutaa gipanag-iyahan sa katawhan sa Israel nga iyang mga alagad.
Ang iyang gugma walay kataposan.
²³ Gihinumdoman niya kita sa dihang gipildi kita sa atong mga kaaway.
Ang iyang gugma walay kataposan.
²⁴ Giluwas niya kita gikan sa atong mga kaaway.
Ang iyang gugma walay kataposan.
²⁵ Gihatagan niya ug pagkaon ang tanan niyang mga binuhat.
Ang iyang gugma walay kataposan.
²⁶ Pasalamati ang Dios sa langit.^[b]
Ang iyang gugma walay kataposan.