Panultihon 22

Ang Pulong Sa Dios

22 Mas maayo nga nindot kag reputasyon kaysa daghan kag bahandi. Ang pagtahod sa mga tawo kanimo mas bililhon pa kaysa bulawan ug pilak.

² Ang adunahan ug ang kabos parehas nga binuhat sa Ginoo.

³ Ang maalamon nga tawo molikay sa kakuyaw, apan ang walay alamag magpaduol hinuon niini, mao nga mag-antos siya.

⁴ Ang pagtahod sa Ginoo ug ang pagpaubos makahatag kanimo ug bahandi, dungog, ug taas nga kinabuhi.

⁵ Ang tawong daotan nagasubay sa dalan nga tunokon ug makuyaw. Ang tawong nagaamping sa iyang kinabuhi molikay niini.

⁶ Tudloi ang bata sa hustong gawi, ug mahinumdoman niya kini hangtod siya matigulang.

⁷ Ang kabos gamhan sa adunahan, ug ang utangan ulipon sa iyang giutangan.

⁸ Ang magpugas ug daotan moani ug kalaglagan, ug maundang na ang iyang pagpasakit sa uban.

⁹ Panalanginan sa Dios ang mga manggihatagon ug pagkaon ngadto sa mga kabos.

¹⁰ Aboga ang tawong tampalasan, ug mahunong ang panaglalis, panag-away, ug ang ininsultohanay.

¹¹ Ang tawo nga matinud-anon ug matinahoron manulti mahimong higala sa hari.

¹² Ginabantayan ug maayo sa Ginoo ang mga maalamon, apan daoton niya ang mga plano sa mga maluibon.

¹³ Ang tapolan nga tawo dili mogawas sa balay kay basin kuno ug may liyon sa gawas ug tukbon siya.

¹⁴ Ang mga pulong sa babayeng daotan nahisama sa lawom nga bangag, ug diha ipangtambog ang mga tawong gikapungtan sa Ginoo.

¹⁵ Kinaiya sa mga bata ang pagbinuang, apan matul-id kini kon disiplinahon sila.

¹⁶ Ang tawo nga mangdaog-daog sa mga kabos o manghatag ug regalo sa mga adunahan sa tuyo nga gustong maadunahan, mahimo na hinuong kabos.

Ang 30 ka Importanteng mga Panultihon

¹⁷ Pamatia ang mga pulong sa mga tawong maalamon. Pamati pag-ayo samtang ginatudlo ko kini kanimo, ¹⁸ kay magmalipayon ka gayod kon imo kining masayran ug masaulo. ¹⁹ Gitudlo ko kini karon kanimo aron mosalig ka sa Ginoo.

²⁰ Nagsulat ako ug 30 ka mga panultihon nga maggiya ug maghatag kanimog kaalam. ²¹ Pinaagi niini masayran mo ang kamatuoran, ug makahatag kag masaligan nga tubag ngadto sa tawo nga mangutana kanimo.^[a]

‒ 1 ‒

²² Ayaw pamintaha sa mga kabos, ug ayaw sila daog-daoga sa korte, ²³ kay ang Ginoo maoy manalipod kanila. Ug kon unsay dili maayong gibuhat ninyo kanila buhaton usab sa Ginoo diha kaninyo.

‒ 2 ‒

²⁴ Ayaw pakighigala sa tawong daling masuko, ²⁵ kay basig mapareho ka kaniya, ug maghatod kini kanimo sa kadaotan.

‒ 3 ‒

²⁶ Ayaw pagsaad nga ikaw mobayad sa utang sa uban. ²⁷ Kay kon dili ka makabayad, kuhaon nila bisan ang imong higdaanan.

‒ 4 ‒

²⁸ Ayaw ibta ang muhon nga giugbok sa imong mga katigulangan.

‒ 5 ‒

²⁹ Ang tawo nga maayong motrabaho magaalagad sa mga hari ug dili sa ordinaryong mga tawo.