Nyimbo ya Solomoni 5

Mawu a Mulungu mu Chichewa Chalero

5 Ndalowa mʼmunda mwanga, iwe mlongo wanga, iwe mkwatibwi wanga;
    ndasonkhanitsa mure wanga ndi zokometsera zakudya zanga.
Ndadya uchi wanga pamodzi ndi zisa zake zomwe;
    ndamwa vinyo wanga ndi mkaka wanga.

Idyani abwenzi anga, imwani;
    Inu okondana, imwani kwambiri.

² Ndinagona tulo koma mtima wanga unali maso.
    Tamverani, bwenzi langa akugogoda:
“Nditsekulire, mlongo wanga, bwenzi langa,
    nkhunda yanga, wangwiro wanga.
Mutu wanga wanyowa ndi mame,
    tsitsi langa lanyowa chifukwa cha nkhungu ya usiku.”
³ Ndavula kale zovala zanga,
    kodi ndizivalenso?
Ndasamba kale mapazi anga
    kodi ndiwadetsenso?
⁴ Bwenzi langa anapisa dzanja lake pa chibowo cha pa chitseko;
    mtima wanga unagunda chifukwa cha iye.
⁵ Ndinanyamuka kukamutsekulira wachikondi wangayo,
    ndipo manja anga anali noninoni ndi mure,
zala zanga zinali mure chuchuchu,
    pa zogwirira za chotsekera.
⁶ Ndinamutsekulira wachikondi wanga,
    koma nʼkuti wachikondi wangayo atachoka; iye anali atapita.
    Mtima wanga unafumuka chifukwa cha kuchoka kwake.
Ndinamuyangʼanayangʼana koma sindinamupeze.
    Ndinamuyitana koma sanandiyankhe.
⁷ Alonda anandipeza
    pamene ankayendera mzindawo.
Anandimenya ndipo anandipweteka;
    iwo anandilanda mwinjiro wanga,
    alonda a pa khoma aja!
⁸ Inu akazi a ku Yerusalemu ndithu ndikukupemphani,
    mukapeza wokondedwa wangayo,
kodi mudzamuwuza chiyani?
    Muwuzeni kuti ine ndadwala nacho chikondi.

⁹ Iwe wokongola kuposa akazi onsewa,
    kodi wokondedwa wakoyo ndi wopambana wina aliyense bwanji?
Kodi wokondedwa wakoyo ndi wopambana ena onse chotani
    kuti uzichita kutipempha motere?

¹⁰ Wokondedwa wangayo ndi wowala kwambiri ndi wathanzi
    pakati pa anthu 1,000.
¹¹ Mutu wake ndi golide woyengeka bwino;
    tsitsi lake ndi lopotanapotana,
    ndiponso lakuda bwino ngati khwangwala.
¹² Maso ake ali ngati nkhunda
    mʼmbali mwa mitsinje ya madzi,
ngati nkhunda zitasamba mu mkaka,
    zitayima ngati miyala yamtengowapatali.
¹³ Masaya ake ali ngati timinda ta mbewu zokometsera zakudya
    zopatsa fungo lokoma.
Milomo yake ili ngati maluwa okongola
    amene akuchucha mure.
¹⁴ Manja ake ali ngati ndodo zagolide
    zokongoletsedwa ndi miyala yamtengowapatali.
Thupi lake ndi losalala ngati mnyanga wanjovu
    woyikamo miyala ya safiro.
¹⁵ Miyendo yake ili ngati mizati yamwala,
    yokhazikika pa maziko a golide.
Maonekedwe ake ali ngati Lebanoni,
    abwino kwambiri ngati mkungudza.
¹⁶ Milomo yake ndi yosangalatsa kwambiri;
    munthuyo ndi wokongola kwambiri!
Uyu ndiye wachikondi wanga ndi bwenzi langa,
    inu akazi a ku Yerusalemu.