Nnwom 97

Nkwa Asem

Onyankopɔn, Ɔhene Kɛse

97 Awurade yɛ ɔhene! Asase, ma w’ani nnye! Nsupɔw a ɛwɔ po mu nyinaa, monsɛpɛw mo ho!

² Omununkum ne esum atwa ne ho ahyia; odi hene atɛntrenee ne nokware mu. ³ Ogya di n’anim a ɛrehyew n’atamfo a wɔatwa ne ho ahyia no. ⁴ N’anyinam hyerɛn wiase nyinaa; asase hu ma ne ho popo. ⁵ Mmepɔw nan te sɛ nku wɔ Awurade anim, Awurade a asase nyinaa yɛ ne de anim. ⁶ Ɔsorofo da ne trenee adi, na aman nyinaa hu n’anuonyam.

⁷ Wogu obiara a ɔsom ahoni no anim ase; anyame nyinaa kotow Awurade anim. ⁸ Nnipa a wɔwɔ Sion ani agye, na Yuda nkurow nso ho sɛpɛw wɔn ma w’atɛn a worebebu no, O Awurade. ⁹ Awurade Tumfoɔ, wo na wudi asase nyinaa so; woso sen anyame nyinaa mpɛn bebree.

¹⁰ Awurade dɔ wɔn a wokyi bɔne; ɔbɔ ne nkurɔfo nkwa ho ban. Ogye wɔn fi amumɔyɛfo tumi ase. ¹¹ Hann hyerɛn atreneefo so, na anigye ba wɔn a wɔyɛ papa so. ¹² Mo atreneefo nyinaa mo ani nnye wɔ nea Awurade ayɛ ama mo no nti! Monkae nea Onyankopɔn kronkron no ayɛ, na monna no ase.