Nnwom 92

Nkwa Asem

Ayeyi dwom

92 Eye sɛ wɔda wo Awurade ase na wɔto dwom de hyɛ wo anuonyam, O Ɔsorosoro Nyankopɔn; ² na wɔpae mu ka wo dɔ a wowɔ daa no anɔpa biara na wɔaka wo nokware nso ho asɛm anadwo biara ³ wɔ sanku a hama gu so ne sanku dwom mu. ⁴ Wo nneyɛe akɛse no, O Awurade, ma m’ani gye; esiane nea woayɛ nti, meto dwom ma me ho sɛpɛw me.

⁵ Awurade, wo nneyɛe di mu na wo nyansa nso mu dɔ! ⁶ Eyi yɛ biribi a ɔkwasea ntumi nhu; ogyimifo ntumi nte ase. ⁷ Amumɔyɛfo benyin sɛ wura, nnebɔneyɛfo bɛkɔ so nanso wɔbɛsɛe wɔn pasaa, ⁸ efisɛ, wo Awurade, woyɛ otumfoɔ daa daa. ⁹ Yenim sɛ w’atamfo bewuwu na wɔadi amumɔyɛfo nyinaa so.

¹⁰ Woama manya ahoɔden te sɛ torɔm na woahyira me ama manya ahotɔ. ¹¹ Mahu nkogu a m’atamfo adi, ate osu a amumɔyɛfo resu. ¹² Atreneefo no bɛkɔ so sɛ abedua, wobenyin sɛ Lebanon sida dua. ¹³ Wɔte sɛ nnua a wɔadua wɔ Awurade fi a enyin wɔ Onyankopɔn fi ¹⁴ a, ɛsow aba ne nyin mu na daa eye na ɛwɔ ahoɔden. ¹⁵ Eyi kyerɛ sɛ, Awurade yɛ ɔnokwafo, enti nea ɛnteɛ biara nni me hwɛfo ho.