Nnwom 77

Nkwa Asem

Amane mu awerɛkyekyere

77 Misu dennen mefrɛ Onyankopɔn; misu dennen na otie me. ² Ɔhaw mu, mebɔ Awurade mpae; anadwo mu nyinaa, mema me nsa so bɔ mpae nanso me werɛ nkyekye. ³ Sɛ midwen Onyankopɔn ho a, migu ahome; sɛ midwen komm a, mabasa mu bu. ⁴ Ɔma me si pɛ anadwo nyinaa. Nsɛm haw me nti, mintumi nkasa.

⁵ Midwen nna a atwam no na mekae nna a atwam dedaw no. ⁶ Anadwo mu no nyinaa midwenee yiye. Midwenee komm no, asɛm a mibisaa me ho ni, ⁷ “Enti daa Awurade bɛpo yɛn saa? Afei n’ani rensɔ yɛn bio? ⁸ Wagyae dɔ a ɔdɔ yɛn no? Na ne bɔhyɛ no, wagyae? ⁹ Onyankopɔn werɛ afi sɛ obehu mmɔbɔ? Abufuw abesi n’ahummɔbɔ ananmu anaa?” ¹⁰ Afei mekae se, “Nea ɛhaw me titiriw koraa ne sɛ afei de, Onyankopɔn nni tumi bio.” ¹¹ Mɛkae nneɛma akɛse a woyɛe no, Awurade; mɛkae anwonwade a woyɛɛ no tete no. ¹² Medwen nea woayɛ no nyinaa ho. Medwen wo tumideyɛ no nyinaa ho komm. ¹³ Biribiara a woyɛ no, O Onyankopɔn, yɛ kronn; onyame bi nso nsen wo. ¹⁴ Woyɛ Onyankopɔn a woyɛ anwonwade; wokyerɛ wo tumi wɔ aman so.

¹⁵ Wonam wo tumi so gye wo nkurɔfo a wɔyɛ Yakob ne Yosef asefo no nkwa. ¹⁶ Bere a ɛpo huu wo no, esuroe, O Onyankopɔn, na ɛpo mu donkudonku no mpo wosowee. ¹⁷ Omununkum tɔɔ nsu; aprannaa paapae fii soro na anyinam tetew fii mmeae nyinaa. ¹⁸ W’aprannaa a ɛpaapaee no bobɔe na anyinam a ɛtetewee no maa wiase sɔɔ hann. Asase wosowee.

¹⁹ Wonantewee asorɔkye no mu; wutwaa ɛpo a ɛmu dɔ no, nanso wɔanhu w’anammɔn. ²⁰ Wudii wo nkurɔfo anim sɛ oguanhwɛfo a, na Mose ne Aaron na na wɔka wɔn ho.