Nnwom 147

Nkwa Asem

Onyankopɔn Tumfoɔ nkamfo

147 Eye sɛ wɔto ayeyi dwom de kamfo Onyankopɔn; eye na ɛfata sɛ wɔkamfo no.

² Awurade resesɛw Yerusalem. Ɔde wɔn a wotu fii hɔ no resan aba. ³ Ɔsa wɔn a wɔn koma atu yare na ɔkyekyere wɔn akuru. ⁴ Wadwen nsoromma dodow ne din a ɔde bɛma wɔn mu biara no ho dedaw. ⁵ Yɛn Awurade so na ɔyɛ ɔkɛse; obi nte ne nyansa ase. ⁶ Ɔma ahobrɛasefo so na obubu amumɔyɛfo gu fam. ⁷ Monto ayeyi nnwom mma Awurade. Mommɔ nnwom wɔ sanku so mma Onyankopɔn. ⁸ Ɔma omununkum trɛw ɔsoro ani; ɔma asase osu. Ɔma sare nyin mmepɔw so. ⁹ Ɔma mmoa aduan na sɛ kwaakwaadabi mma su frɛ no a, ɔma wɔn aduan di. ¹⁰ N’anikade nni apɔnkɔ a wɔn ho yɛ den ne asraafo akokodurufo mu. ¹¹ Na mmom, n’ani gye wɔn a wodi no ni ne wɔn a wɔde wɔn ho to ne dɔ a ɛwɔ hɔ daa no so no ho.

¹² Kamfo Awurade, O Yerusalem! Kamfo wo Nyankopɔn, O Sion! ¹³ Ɔma w’apon mu yɛ den; ohyira mo nkurɔfo. ¹⁴ Ɔkora mo ahye so na ɔma mo awi pa. ¹⁵ Ɔkasa kyerɛ asase. Na nea ɔka biara, wɔyɛ no ntɛm so. ¹⁶ Ɔtɔ sukyerɛmma sɛ nnaso, na ɔtrɛw obosu nsukyenee mu sɛ mfutuma. ¹⁷ Ɔtɔ asukɔtweaa sɛ mmosea. Obi ntumi nnyina awɔw a ɔde ba ano! ¹⁸ Na afei, ɔkasa ma sukyerɛmma no nan. Ɔbɔ mframa ma nsu teɛ. ¹⁹ Ɔkasa kyerɛ ne nkurɔfo. Ɔhyɛ mmara ma Israel. ²⁰ Ɔnyɛɛ eyi mmaa aman foforo biara. Wonnim ne mmara.

Kamfo Awurade!