پەندەکانی سلێمان 29

Kurdi Sorani Standard

29 ئەوەی زۆر سەرزەنشت بکرێت و هەر کەللەڕەق بێت،
    لەناکاو تێکدەشکێت و چارەسەریشی نابێت.

² کاتێک ڕاستودروستان زۆر بن گەل دڵخۆش دەبێت،
    کە بەدکار فەرمانڕەوا بێت گەل دەناڵێنێت.

³ ئەوەی حەز لە دانایی بکات باوکی دڵخۆش دەکات،
    هاوڕێی لەشفرۆشانیش سامان بەفیڕۆ دەدات.

⁴ پاشا بە دادوەری وڵات ڕادەگرێت،
    بەڵام ئەگەر بەدوای پارە بکەوێت وێرانی دەکات.

⁵ ئەو کەسەی لەگەڵ دراوسێکەی زمانلووسی بکات
    داو لەبەرپێی دەنێتەوە.

⁶ لە گوناهی پیاوخراپ تەڵە هەیە،
    بەڵام کەسی ڕاستودروست گۆرانی دەڵێت و دڵخۆش دەبێت.

⁷ کەسی ڕاستودروست گرنگی بە مافی هەژار دەدات،
    بەڵام بەدکار ئەو گرنگییە تێناگات.

⁸ گاڵتەجاڕان شار دەخەنە ئاژاوەوە،
    بەڵام دانایان تووڕەیی کپ دەکەنەوە.

⁹ ئەگەر پیاوێکی دانا گێلێک بداتە دادگا،
    گێلەکە تووڕە بێت یان گاڵتەی پێ بێت، بەڵام ئاشتی نابێت.

¹⁰ خوێنڕێژان ڕقیان لە کەسی دروست دەبێتەوە،
    بەڵام سەرڕاستان ژیانی دەپارێزن.

¹¹ گێل هەرچی تووڕەیی لە دڵدایە دەریدەبڕێت،
    بەڵام دانا خۆی دەگرێت.

¹² ئەگەر فەرمانڕەوایەک گوێ لە قسەی درۆ بگرێت،
    هەموو خزمەتکارەکانی دەبنە بەدکار.

¹³ هەژار لەگەڵ زۆردار لەمەدا لە یەکتری دەچن:
    یەزدان ڕووناکی بە چاوی هەردووکیان دەدات.

¹⁴ ئەگەر پاشایەک بە ڕاستی دادوەری هەژاران بکات،
    تەختەکەی هەتاهەتایە دەچەسپێت.

¹⁵ داری تەمبێکردن دانایی دەبەخشێت،
    بەڵام منداڵ جڵەوی بەربدرێت دایکی خۆی شەرمەزار دەکات.

¹⁶ کاتێک بەدکاران گەشە دەکەن گوناه زۆر دەبێت،
    بەڵام ڕاستودروستان کەوتنیان دەبینن.

¹⁷ کوڕەکەت تەمبێ بکە دەتحەسێنێتەوە،
    چێژ دەداتە گیانت.

¹⁸ بەبێ سروش^[a] گەل بەڕەڵا دەبێت،
    بەڵام ئەوەی تەورات پەیڕەو بکات خۆزگەی پێ دەخوازرێت.

¹⁹ خزمەتکار تەنها بە قسە تەمبێ نابێت،
    هەرچەندە تێدەگات، بەڵام گوێی ناداتێ.

²⁰ ئەو کەسەت بینیوە بە پەلەیە لە قسەکانی؟
    گێل لەو زیاتر ئومێدی پێ دەکرێت.

²¹ ئەوەی خزمەتکارەکەی لە منداڵییەوە بە ناز ڕابگرێت،
    لە کۆتاییدا لێی هەڵدەگەڕێتەوە.

²² کەسی تووڕە ناکۆکی دەوروژێنێت،
    کەسی هەڵچووش گوناهی زۆرە.

²³ لووتبەرزی مرۆڤ خۆی نزم دەکاتەوە،
    بەڵام بێفیز ڕێزدار دەبێت.

²⁴ هاوبەشی دز ڕقی لە خۆی دەبێتەوە،
    سوێند دەخوات و دانی پێدا نانێت.

²⁵ ترسی مرۆڤ تەڵە دەنێتەوە،
    بەڵام ئەوەی پشت بە یەزدان ببەستێت پەناگیر دەبێت.

²⁶ زۆر کەس داوای ڕەزامەندی فەرمانڕەوایان دەکەن،
    بەڵام مرۆڤ لەلایەن یەزدانەوە دادپەروەری بەدەستدەهێنێت.

²⁷ قێزی ڕاستودروستان لە کەسی ناڕەوایە،
    قێزی بەدکاریش لەوەیە کە ڕێگای ڕاستە.