ئیشایا 54

Kurdi Sorani Standard

⁴ «مەترسە چونکە ڕیسوا نابیت،
    گاڵتەت پێ ناکرێت چونکە شەرمەزار نابیت.
ڕیسوایی سەردەمی گەنجیێتیت لەبیر دەکەیت،
    ئیتر شورەیی بێوەژنیێتیت بەبیر نایەتەوە.
⁵ چونکە مێردی^[a] تۆ دروستکەرەکەی تۆیە،
    ناوی یەزدانی سوپاسالارە.
ئەوەی دەتکڕێتەوە پیرۆزەکەی ئیسرائیلە،
    پێی دەگوترێت خودای هەموو زەوی.
⁶ چونکە وەک ژنێکی بەجێماو و ڕۆح پڕ لە ژان
    یەزدان بانگت دەکاتەوە،
وەک ژنێک کە لە گەنجیدا شووی کردبێت و ڕەتکرابێتەوە،»
    خودات دەفەرموێت.
⁷ «بۆ ساتێکی کەم بەجێم هێشتیت،
    بەڵام بە بەزەییەکی زۆرەوە کۆت دەکەمەوە.
⁸ بە زریانی تووڕەییەوە
    بۆ ساتێک ڕووی خۆمم لێت داپۆشی،
بەڵام بە خۆشەویستی نەگۆڕی هەتاهەتایی بەزەییم پێتدا هاتەوە،»
    ئەوە فەرمایشتی یەزدانە، ئەوەی دەتکڕێتەوە.

⁹ «چونکە ئەمە وەک لافاوی نوحە بۆ من
    ئەوەی سوێندم خوارد، کە لافاوەکەی نوح جارێکی دیکە بەسەر زەویدا تێنەپەڕێت.
ئاوا سوێندم خوارد، کە لێت تووڕە نەبم و
    لێت ڕانەخوڕم.
¹⁰ هەرچەندە چیاکان نامێنن و
    گردەکان دەهەژێن،
بەڵام خۆشەویستی نەگۆڕی من بۆ تۆ دەمێنێت و
    پەیمانی ئاشتیم ناهەژێت،»
ئەوە فەرمایشتی یەزدانە، ئەوەی بەزەیی پێتدا دێتەوە.

¹¹ «ئەی شارە زەلیلەکە، زریان لێداوەکە، دڵنەوایی نەکراوەکە،
    ئەوەتا من بەردەکانت بە بەردە پیرۆزە^[b] لەسەر ڕیز دەکەم،
    بە یاقووتی شین^[c] داتدەمەزرێنم.
¹² قوللەکانت دەکەم بە یاقووت^[d] و
    دەروازەکانیشت بە بەردی پڕشنگدار،
    هەموو سنوورەکانیشت بە بەردی گرانبەها.
¹³ هەموو کوڕەکانت لە یەزدانەوە فێر دەبن و
    ئاشتی منداڵەکانت زۆر دەبێت.
¹⁴ بە ڕاستودروستی دەچەسپێیت
دوور لە جەوروستەم،
    چونکە هیچ هۆیەک نییە بۆ ئەوەی بترسیت،
هەروەها دووریت لە تۆقینیش،
    چونکە لێت نزیک ناکەوێتەوە.
¹⁵ ئەگەر پەلامار درایت، ئەوە لەلایەن منەوە نابێت،
    ئەوەی هێرش دەکاتە سەرت، دەبێتە ژێر دەستت.

¹⁶ «ئەوەتا من ئاسنگەرم بەدیهێنا
    کە کوورەی ئاگری خەڵووز دەم دەدات،
    چەکی گونجاو دروستدەکات،
هەروەها من لەناوبەرم بەدیهێنا بۆ ئەوەی بفەوتێنێت.
¹⁷     هەر چەکێک لە دژی تۆ شێوەی بکێشرێت سەرناکەوێت و
    هەر زمانێک لە دادگا لە دژی تۆ ڕادەوەستێت بەرپەرچی دەدەیتەوە.
ئەمە میراتی خزمەتکارانی یەزدانە،
    بێتاوانیتان لەلایەن منەوەیە،»
            ئەوە فەرمایشتی یەزدانە.