दूसर इतिहास 17
Awadhi Bible: Easy-to-Read Version
यहूदा क राजा यहोसापात
17 आसा क जगह पइ यहोसापात यहूदा क नवा राजा भवा। यहोसापात आसा क पूत रहा। यहोसापात यहूदा क सक्तीसाली बनाएस जेहसे उ पचे इस्राएल क खिलाफ लड़ सकत रहेन। 2 उ फउजे क टुकड़ियन क यहूदा सबहिं किलाबन्द नगरन मँ रखेस। यहोसापात फउजे क टुकड़ियन क यहूदा अउ एप्रैम क ओन नगरन मँ राखेस जेनका ओकर बाप आसा अपने अधिकार मँ किहे रहेन।
3 यहोवा यहोसापात क संग रहा काहेकि पहिले क बरिसन मँ उ उ सबइ नीक काम किहेस जेनका ओकर पुरखा दाऊद किहे रहा। यहोसापात बाल क मूरतियन क अनुसरण नाहीं किहस। 4 यहोसापात उ परमेस्सर क हेरेस जेकर अनुसरण ओकरे पुरखन करत रहेन। उ परमेस्सर क आदेसन क पालन किहेस। उ उ तरह नाहीं रहा जइसा इस्राएल क दूसर लोग रहत रहेन। 5 यहोवा यहोसापात क यहूदा क सक्तीसाली राजा बनाएस। यहूदा क सबहिं लोग यहोसापात क भेट लिआएन। इ तरह यहोसापात क लगे बहोत स सम्पत्ति अउ सम्मान दुइनउँ रहेन। 6 यहोसापात यहोवा क मारग पइ चलेस अउ ओका ओन पइ गर्व रहा। उ ऊँच जगहियन अउ असेरा क खम्भन क यहूदा देस स बाहेर किहस।
7 यहोसापात अपने प्रमुखन क यहूदा क नगरन मँ सिच्छा देइ क बरे पठएस। इ यहोसापात क राज्जकाल क तीसरे बरिस भवा। उ पचे बेन्हैल, ओबद्याह, जकर्याह, नतनेल अउर मीकायाह रहेन। 8 उ लेवीबंसी क ओनकर संग पठइ दिहेस। उ सबइ समाया, नतन्याह, असाहेल, समीरामोत, यहोनातान, अदोनिय्याह अउर तोबियाह रहेन। यहोसापात याजक एलीसामा अउर यहोराम रहेन। 9 ओन प्रमुखन, लेवीबंसियन अउ याजकन यहूदा मँ लोगन क सिच्छा दिहन। ओनके लगे, यहोवा क नेमन क किताब रही। उ पचे यहूदा क सबहिं नगरन मँ गएन अउर लोगन क उ पचे सिच्छा दिहन।
10 यहूदा क आस-पास क रास्ट्रन यहोवा स डेरात रहेन। इहइ कारण रहा कि उ पचे यहोसापात क खिलाफ जुद्ध नाहीं छेड़ेन। 11 कछू पलिस्ती लोग यहोसापात क लगे भेंट लिआएन। उ पचे यहोसापात क लगे चाँदी लिआएन काहेकि उ पचे जानत रहेन कि उ बहोत सक्तीसाली राजा अहइ। कछू अरब क लोग यहोसापात क लगे रेवड़न लिआएन। उ पचे ओकरे लगे सात हजार सात सौ भेड़िन अउर सात हजार सात सौ बोकरियन लिआएन।
12 यहोसापात जियादा स जियादा सक्तीसाली होत गवा। उ यहूदा देस मँ किलन अउर मज़बूत नगर बनाएन। 13 यहोसापात क लगे बहोत स कलाकार अउर मजदूर रहेन जउन ओकरे बरे ओन नगरन मँ काम करत रहेन। उ यरूसलेम मँ प्रसिच्छित सैनिक रखेन। 14 ओन फउजियन क अपने परिवार समूह मँ गनती रही। यरूसलेम क ओन फउजियन क सूची इ अहइ:
यहूदा क परिवार समूह स इ सेनाध्यच्छ रहेन:
अदना तीन लाख फउजियन क सेनाध्यच्छ रहा।
15 यहोनानान दुइ लाख अस्सी हजार फउजियन क सेनाध्यच्छ रहा।
16 अमस्याह दुइ लाख फउजियन क सेनाध्यच्छ रहा। अमस्याह जिक्री क पूत रहा। अमास्याह अपने क यहोवा क सेवा मँ अर्पित करइ मँ खुस रहा।
17 बिन्यामीन क परिवार समूह स इ सेनाध्यच्छ रहेन: एल्यादा क लगे दुइ लाख फउजी रहेन जउन धनुस, बाण अउर ढाल क उपयोग करत रहेन।
एल्यादा एक साहसी फउजी रहा।
18 यहोनाबाद क लगे एक लाख अस्सी हजार मनई जुद्ध बरे तइयार रहेन।
19 उ सबइ सबहिं फउजी यहोसापात क सेवा करत रहेन। राजा पूरे यहूदा देस क किलन मँ दूसर मनइयन क भी रखे रहा।
Awadhi Bible: Easy-to-Read Version. Copyright © 2005 Bible League International.